اقمولا وبلىسىندا ا.ي.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىندا ەگىنشىلىك پوليگونى جۇمىس ىستەي باستادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا عىلىمي-وندىرىستىك ورتالىقتىڭ باس ديرەكتورى كەنجە ابدۋللاەۆ مالىمدەدى.
بۇل اۋقىمدى جوبا ۇلتتىق بيوتەحنولوگيا ورتالىعىنىڭ عالىمدارى مەن الدىڭعى قاتارلى اۋىلشارۋاشىلىق كاسىپورىندارى جانە وبلىس اكىمدىگى وكىلدەرى ەنگەن عىلىمي-وندىرىستىك كەڭەستىڭ بىرلەسە اتقارعان جۇمىسى ناتيجەسىندە جۇزەگە اسىپ وتىر. جوبا ماقساتى – اگروتسەنوزدى باسقارۋ مەن مونيتورينگ نەگىزىندە ەگىنشىلىكتىڭ ناقتى تەحنولوگيالارىن بەيىمدەۋ جانە ترانسفەرت جاساۋ. سونداي-اق اۋىل شارۋاشىلىعىنىڭ ونىمدىلىگىن ارتتىرىپ, شىعىنداردى ازايتۋ.
ەگىنشىلىك پوليگونىنىڭ اۋماعى 3 مىڭ گەكتاردى الىپ جاتىر. جاڭا تەحنولوگيانى قولدانۋدىڭ ناتيجەسىندە ەگىن ەگۋ مەن استىقتى جيناۋدىڭ وڭتايلى ۋاقىتىن بولجاۋدىڭ, «اقىلدى سۋارۋدىڭ», مينەرالدى تىڭايتقىشتى سەبۋدىڭ, زيانكەستەر مەن ارامشوپكە قارسى كۇرەسۋدىڭ ينتەللەكتۋالدى جۇيەلەرىن پايدالانا وتىرىپ ەڭبەك ونىمدىلىگىن بىرنەشە ەسەگە دەيىن ارتتىرۋعا بولادى ەكەن. ال جۇرگىزۋشىسى جوق تەحنيكا ادامي فاكتوردى ازايتىپ, استىقتىڭ وزىندىك قۇنىن تومەندەتۋگە مۇمكىندىك بەرمەك. بريفينگ بارىسىندا ك.ابدۋللاەۆ جوبانى جۇزەگە اسىرۋ استىق ونىمدىلىگىن گەكتارىنا 25 تسەنتنەرگە, ال ەڭبەك ونىمدىلىگىن 2-2,5 ەسە ارتتىرۋعا مۇمكىندىك بەرەتىنىن جەتكىزدى.
ۆەنەرا تۇگەلباي, «ەگەمەن قازاقستان»