قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى نۇرلان ەرمەكباەۆتىڭ توراعالىعىمەن ۇجىمدىق قاۋىپسىزدىك تۋرالى شارت ۇيىمىنىڭ قاۋىپسىزدىك كەڭەستەرى حاتشىلارى كوميتەتىنىڭ كەزەكتى وتىرىسى ءوتتى, دەپ حابارلادى پرەزيدەنتتىڭ ءباسپاسوز قىزمەتى.
ءىس-شاراعا ارمەنيا, بەلارۋس, قازاقستان, قىرعىزستان, رەسەي, تاجىكستان قاۋىپسىزدىك كەڭەستەرىنىڭ حاتشىلارى, سونداي-اق ۇيىمنىڭ باس حاتشىسى يۋري حاچاتۋروۆ قاتىستى.
باسقوسۋعا قاتىسۋشىلار حالىقارالىق احۋالدىڭ وزەكتى ماسەلەلەرى بويىنشا پىكىر الماسىپ, وسى ۇيىمعا مۇشە مەملەكەتتەردىڭ قاۋىپسىزدىگى ءۇشىن ماڭىزدى بولىپ سانالاتىن زاماناۋي سىن-تەگەۋرىندەر مەن قاتەرلەرگە قارسى ءىس-قيمىل جونىندەگى ماسەلەلەردى قاراستىردى.
نۇرلان ەرمەكباەۆ وتىرىس بارىسىندا ۇقشۇ-عا مۇشە ەلدەردە بۇگىنگى حالىقارالىق احۋالدىڭ دامۋ ءۇردىسى تۋرالى ورتاق تۇسىنىستىك بار ەكەنىنە نازار اۋدارىپ, قالىپتاسىپ وتىرعان جاعداي تۋىنداعان پروبلەمالارعا قاتىستى جان-جاقتى ءارى جۇيەلى تالداۋ جۇرگىزۋدى جانە سىن-تەگەۋرىندەردىڭ الدىن الۋ مەن قاتەرلەردى جويۋ ءۇشىن شەشىمدەر قابىلداۋدى تالاپ ەتەتىنىن ايتتى.
تاراپتار ۇلتارالىق شيەلەنىس وشاقتارىن رەتتەۋدىڭ ىقتيمال جولدارى تۋرالى پىكىر الماستى.
جيىن قورىتىندىسى بويىنشا ۇقشۇ-عا مۇشە ەلدەردىڭ قاۋىپسىزدىك كەڭەستەرى حاتشىلارى كوميتەتىنىڭ قۇزىرەتىنە جاتاتىن ماسەلەلەر بويىنشا قۇزىرەتتى ورگانداردىڭ ىنتىماقتاستىعىن نىعايتۋ جونىندەگى قۇجاتتارعا قول قويىلدى. اتاپ ايتقاندا, حالىقارالىق تەرروريزمگە, زاڭسىز ەسىرتكى اينالىمىنا, زاڭسىز ميگراتسياعا قارسى ءىس-قيمىل, سونداي-اق ۇقشۇ-نىڭ ارنايى ماقساتتاعى جەدەل ارەكەت ەتۋشى ۇجىمدىق كۇش قۇرىلىمدارىنىڭ جۇمىسىن جەتىلدىرۋ جونىندەگى شارالار كوزدەلگەن.
بۇعان دەيىن مەملەكەت باسشىسى نۇرسۇلتان نازارباەۆ دەلەگاتسيالار باسشىلارىن قابىلداپ, قازاقستاننىڭ ۇقشۇ-عا قاتىسۋىن ۇلتتىق قاۋىپسىزدىكتى قامتاماسىز ەتەتىن ماڭىزدى تەتىكتەردىڭ ءبىرى رەتىندە قاراستىراتىنىن اتاپ وتكەن بولاتىن.
قازاقستان ۇقشۇ-عا توراعالىق ەتۋىنە بايلانىستى بيىلعى ەكىنشى جارتى جىلدىقتا استانادا مەملەكەت باسشىلارى دەڭگەيىندە ۇقشۇ ۇجىمدىق قاۋىپسىزدىك كەڭەسىنىڭ وتىرىسىن وتكىزۋ جوسپارلانىپ وتىر.