پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆ قىزىلجار وڭىرىندە جۇمىس ساپارىمەن بولىپ, كوكتەمگى ەگىس ناۋقانىنىڭ بارىسىمەن تانىستى. ءوندىرىس ورىندارىن ارالاپ, ەڭبەك ۇجىمدارىمەن كەزدەستى.
قىزىلجار اۋدانىندا ورنالاسقان «ايتەكە بي» جشس سيممەنتال تۇقىمداس اتالىق مالداردى جالعا بەرۋمەن دە اينالىسادى. قازىر مۇندا 720 باس اسىل تۇقىمدى مال وسىرىلەدى. ارقايسىسىنىڭ سالماعى 900 كيلوعا دەيىن جەتەدى. بورداقىلاۋ كەشەنىندە الداعى ۋاقىتتا مال باسى ەكى مىڭعا دەيىن كوبەيتىلمەك. 7 مىڭعا جۋىق ەگىستىك القابىنىڭ جارتىسىنا ءدان سەبىلىپتى. سەرىكتەستىك ديرەكتورى اسقار ماديەۆتىڭ ايتۋىنشا, ساتىپ الىنعان ءار ءىرى قارا 170 مىڭ تەڭگە كولەمىندە سۋبسيديالانسا, جالعا الۋشىلارعا 40 مىڭ تەڭگەدەن تولەنەدى. بۇل وتە ءتيىمدى. قازىر 20-دان استام جالعا الۋشى بار. وسىندا اگروقۇرىلىم جەتەكشىلەرىمەن كەزدەسكەن ۇكىمەت باسشىسىنىڭ ورىنباسارى اگروونەركاسىپ سالاسىن, ونىڭ ىشىندە مال شارۋاشىلىعىن قولداۋعا باعىتتالعان باعدارلامالار جونىندە اڭگىمەلەدى. اۋىل شارۋاشىلىعىنا بەرىلەتىن دەمەۋقارجى بۇگىندە 240 ميلليارد تەڭگەنى قۇراپ وتىر. تاياۋ جىلدارى اۋىلشارۋاشىلىق ونىمدەرىن 2,5 ەسە دەيىن ارتتىرۋ مىندەتى تۇر. الداعى ۋاقىتتا وتەتىن ۇكىمەت وتىرىسىندا سالانى ودان ءارى دامىتۋدىڭ تىڭ باعىتتارى قابىلدانادى. ەلىمىزدە 16 مىڭ قۇرىلىم مال شارۋاشىلىعىمەن شۇعىلدانادى. ولار 100 مىڭعا دەيىن جەتكىزىلەدى. مال بورداقىلاۋ الاڭدارى كوپتەپ اشىلادى.
«زەنچەنكو جانە ك» كومانديتتىك سەرىكتەستىگىندە 8 مىڭداي ءىرى قارا مالى وسىرىلەدى. 630 ادام تۇراقتى جۇمىسپەن قامتاماسىز ەتىلگەن. سەرىكتەستىكتىڭ ونىمدەرى ۇلكەن سۇرانىسقا يە. بىلتىر 16 مىڭ توننا ءسۇت, 935 توننا ەت وندىرىلگەن. ەگىستىك القاپتار 22 مىڭ گەكتاردى قۇراسا, 10 مىڭ گەكتارى ءداندى داقىلدارعا تيەسىلى. سەرىكتەستىكتىڭ مادەنيەت ۇيىندە وتكەن كەڭەستە ءو.شوكەەۆ اگروونەركاسىپ كەشەنىندە مەملەكەتتىك ساياساتتى جۇزەگە اسىرۋدىڭ ىلكىمدى تەتىكتەرىن, سونداي-اق تۇقىم شارۋاشىلىعىن سۋبسيديالاۋداعى وزگەرىستەر مەن جاڭاشىلدىقتاردى تىلگە تيەك ەتتى. 2021 جىلعا تامان تۇگەلگە دەرلىك جوعارى ساپالى تۇقىممەن قامتۋ بەلگىلەنگەن. ءسۇتتى مال شارۋاشىلىعىن وركەندەتۋگە باسىمدىق بەرىلەدى.
پرەمەر-ءمينيستردىڭ ورىنباسارى «زيكستو» كاسىپورنىندا بولىپ, استىق تاسيتىن ۆاگونداردىڭ ەرەكشەلىگىنە نازار اۋداردى. بۇرىن شىعارىلىپ كەلگەن ۆاگون-حوپپەر جاڭالانىپ, سىيىمدىلىعى ۇلعايعان. جىلىنا ەكىمىڭ داناسىن شىعارۋعا قابىلەتتى. ال «قازتەحماش» زاۋىتىندا «سامپو» كومبايندارى قۇراستىرىلادى. قۋاتتىلىعى 400-500 ات كۇشىنە تەڭ 300 كومبايندى ورتالىق ازيا مەن رەسەي نارىعىنا جونەلتۋ جوسپارلانعان.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى