وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە اتالعان وقۋ ورنىنىڭ جۋرناليستيكا ءبولىمىنىڭ قۇرىلۋىنىڭ 20 جىلدىعى اياسىندا «ALTAI JASTARY» دەپ اتالاتىن ستۋدەنتتەردىڭ تەلە-راديو كەشەنى اشىلدى.
ۋنيۆەرسيتەت پەن وبلىستىق «Altai» تەلەارناسىنىڭ بىرلەسۋى ناتيجەسىندە جۇمىسىن باستاعان كەشەننىڭ اشىلۋ سالتاناتىنا بەلگىلى ابايتانۋشى عالىم مەكەمتاس مىرزاحمەتوۆ, تانىمال تەلەجۇرگىزۋشى نۇرتىلەۋ يمانعالي ۇلى, وبلىس اكىمىنىڭ ورىنباسارى اسەم ءنۇسىپوۆا مەن وقۋ ورنىنىڭ رەكتورى مۇحتار تولەگەن قاتىستى. «شىعىس قازاقستاننىڭ جۋرناليستيكا مەكتەبىنىڭ وزىندىك قالىپتاسقان جولى بار. سوندىقتان بۇل ستۋديا جاس جۋرناليستەردىڭ تەوريالىق ءبىلىمىن تاجىريبەمەن ۇشتاستىرىپ, ودان ءارى شىڭدالا تۇسۋىنە ۇلكەن سەرپىن بەرەدى دەپ ويلايمىز», دەدى ءوزىنىڭ قۇتتىقتاۋ سوزىندە اسەم بەكقىزى.
بەلگىلى ابايتانۋشى مەكەمتاس مىرزاحمەتوۆ وبلىس اكىمىنىڭ ورىنباسارىمەن بىرگە جاڭا ستۋديانىڭ العاشقى قوناعى بولىپ, جۋرناليستەردىڭ قويعان ساۋالدارىنا جاۋاپ بەردى. ء«بىزدىڭ قازاق جۋرناليستەرى كوبىنە ءبىر سۇرلەۋمەن جۇرگەندى ءجون كورەدى. شەتەلدىڭ جۋرناليستەرى جان-جاقتى. وزدەرىنىڭ ويلارىن دا باتىل جەتكىزىپ وتىرادى. جاس جۋرناليستەر كەلەشەكتە وسى جاعىن ەسكەرسە دەيمىن», دەدى عالىم.
ستۋديانىڭ اشىلعانىنا, اسىرەسە جۋرناليستيكا ءبولىمىنىڭ ستۋدەنتتەرى ەرەكشە قۋانۋلى. «وسىدان ءبىر-ەكى اي بۇرىن ۋنيۆەرسيتەتىمىزدىڭ رەكتورى مۇحتار ادىلبەك ۇلى ستۋدەنتتەرمەن كەزدەسكەندە ستۋديا اشۋ ماسەلەسىن ايتقان ەدىك. ءبىزدىڭ تىلەگىمىزدىڭ تەز ارادا ورىندالعانىنا قۋانىشتىمىز», دەيدى جۋرناليستيكا ءبولىمىنىڭ 3-كۋرس ستۋدەنتى تاسقىن بولات ۇلى.
بۇرىنىراقتا جۋرناليستيكا ءبولىمى ستۋدەنتتەرىنە ءدارىس وقىعان تاجىريبەلى جۋرناليستەر دە يگى ىسكە وڭ باعالارىن بەرىپ, لەبىزدەرىن جەتكىزدى. ء«بارى ءبىرىنشى باسشىعا بايلانىستى عوي. جۋرناليستيكا ءبولىمىنىڭ ءبىراز ۋاقىت قاقپاقىلعا اينالعان كەزدەرى دە بولدى. ءبىر باسشى ءبولىمدى جاپپاق بولدى, بىردە فيلولوگيا, بىردە فيلوسوفيا فاكۋلتەتىنە قوسىلدى. دەگەنمەن قازىر ۋنيۆەرسيتەت باسشىلىعى تاراپىنان بولاشاق جۋرناليستەرگە جاقسى كوڭىل ءبولىنىپ جاتقان سەكىلدى. مۇمكىن الداعى ۋاقىتتا ءبولىمدى كافەدراعا اينالدىرۋ ماسەلەسىن دە ويلاستىرىپ كورۋ كەرەك شىعار», دەدى وبلىستىق «ديدار» گازەتىنىڭ بۇرىنعى باس رەداكتورى, بەلگىلى جۋرناليست ايتمۇحامەد قاسىموۆ.
ازامات قاسىم, «ەگەمەن قازاقستان»
وسكەمەن