2014 جىل. فۋتبولدان برازيليادا وتكەن الەم چەمپيوناتىنىڭ توپتىق ءتۋرنيرى. كۋيابا قالاسىنداعى «ارەنا پانتانال» ستاديونىندا وتكەن كولۋمبيا مەن جاپونيا قۇرامالارى اراسىنداعى كەزدەسۋدىڭ 85-مينۋتىندا قاقپاشىلار الماسىپ, الاڭعا اتىشۋلى فاريد ماندراگون شىقتى. وسىلايشا, 43 جاستاعى وڭتۇستىك امەريكا قۇرلىعى وكىلىنىڭ ەسىمى دۇنيەجۇزىلىك دوپ دوداسىندا ونەر كورسەتكەن ەڭ ارداگەر فۋتبولشى رەتىندە تاريحتا قالدى.
ۇستىمىزدەگى جىلدىڭ 15 ماۋسىمى مەن 15 شىلدەسى ارالىعىندا رەسەيدە وتەتىن الەم چەمپيوناتىندا جوعارىدا اتالعان رەكوردتىڭ بۇزىلاتىن ءتۇرى بار. ولاي دەۋگە نەگىز, اراعا باقانداي 28 جىل سالىپ, مۋنديالمەن قايتا قاۋىشقان ەگيپەت ۇلتتىق قۇراماسىنىڭ ساپىندا 45 جاستاعى ارداگەر ويىنشىنىڭ ونەر كورسەتۋى ابدەن مۇمكىن. ول – مىسىرلىق كوماندانىڭ نەگىزگى قاقپاشىسى ەسسام ءال-حاداري.
1973 جىلدىڭ 15 قاڭتارىندا جەرورتا تەڭىزى مەن ءنىل وزەنىنىڭ ساعاسىندا ورنالاسقان دۋميات قالاسىنىڭ ماڭىنداعى كافردە دۇنيەگە كەلگەن ەسسام ءوز ەلىنىڭ بىرقاتار بەلدى كوماندالارىمەن قاتار, شۆەيتساريانىڭ «سون», سۋداننىڭ ء«ال-مەرررەيح» جانە ساۋد ارابياسىنىڭ ء«ال-تااۆۋن» كلۋبتارىندا ونەر كورسەتتى. ايتۋلى كوماندالارمەن بىرگە ول تولاعاي تابىستارعا قول جەتكىزدى. ەلىشىلىك بىرىنشىلىكتەردە تالاي مارتە توپ جاردى. افريكا چەمپيوندار كۋبوگى مەن سۋپەركۋبوگىن ءۇش رەتتەن ولجالادى. ارابتار سۋپەركۋبوگىن ەكى مارتە توبەسىنە كوتەردى. ال سول تابىستارىنىڭ اراسىنداعى ەڭ ءىرىسى – ەگيپەتتىڭ ء«ال-ءاحلينىڭ» ساپىندا 2006 جىلى جاپونيادا وتكەن كلۋبتىق الەم چەمپيوناتىندا قولا مەدالدى يەلەنۋى.
1996 جىلى ەسسام ءال-حاداري ەگيپەت قۇراما كومانداسىنا قابىلداندى. بۇل رەتتە دە ول ايشىقتى ونەرىمەن كوزگە ءتۇسىپ, ءوز وتانداستارىمەن بىرگە تالاي بيىك بەلەستى باعىندىردى. اتاپ ايتساق, افريكا ۇلتتارى كۋبوگى جولىنداعى جارىستا قارا قۇرلىق كوكجالدارىنىڭ بارلىعىن قاپى قالدىرىپ, 4 مارتە (1998, 2006, 2008, 2010) باس جۇلدەنى ولجالادى. وسى ورايدا, 2006 جىلى ەگيپەتتە جالاۋى جەلبىرەگەن افريكا ۇلتتارى كۋبوگىنىڭ اقتىق سايىسى جايىندا ازدى-كەمدى ايتا كەتسەك, ەش ارتىعى جوق دەپ ويلايمىز. ايتۋلى جارىستىڭ باس جۇلدەسى ءۇشىن باسەكەدە جارىس قوجايىندارى مەن كوت-د’يۆۋار قۇرامالارى كۇش سىناسىپ, نەگىزگى جانە قوسىمشا ۋاقىتتا جەڭىمپازدى انىقتاي المادى. 11 مەترلىك ايىپ دوبىن سوعۋ بارىسىندا قاقپاشى ءال-حاداري العاشىندا داڭقتى ديدە دروگبانىڭ, ىلە-شالا تاعى ءبىر مىقتى ويىنشى باكاري كونەنىڭ سوققىلارىن كەرى قايتارىپ, جەرگىلىكتى جانكۇيەرلەردى شاتتىق پەن قۋانىشقا بولەگەن ەدى.
ەسسام ءوز ەلىندە ەرەكشە قۇرمەتكە يە. ەگيپەتتە ونى ەڭكەيگەن قارتتان ەڭبەكتەگەن بالاعا دەيىن جاقسى تانيدى, ءپىر تۇتادى. ءوز ەلىنىڭ ۇلتتىق قۇراماسى ساپىندا ول تاپجىلماي 22 جىل بويى ونەر كورسەتىپ, 156 رەت جاسىل الاڭعا شىقتى. بۇل – الەمدىك فۋتبولدا تىم سيرەك كەزدەسەتىن وقيعا. سول ۋاقىت ارالىعىندا ول تالاي رەت ەگيپەتتىڭ تەڭدەسسىز قاقپاشىسى رەتىندە تانىلىپ, 2001 جانە 2006 جىلدارى افريكانىڭ ۇزدىگى اتاندى. بۇگىنگى تاڭداعى تەڭبىل دوپ شەبەرلەرى اراسىنان وسى كورسەتكىش جاعىنان ونىمەن تەك دجانلۋيدجي بۋففون عانا تەڭەسە الادى. يتاليانىڭ ماقتانىشى وسى كۇنگە دەيىن 176 رەت جاسىل الاڭعا شىقان ەكەن. بۇل رەتتە ول مىسىرلىقتىڭ الدىن وراپ تۇر. دەسەك تە ءال-حاداري ەگيپەت قۇراماسىنىڭ جەيدەسىن 1996 جىلى كيسە, بۋففون ءبىر جىل وتكەننەن كەيىن عانا ءوز ەلىنىڭ باس كومانداسى قاتارىنا قابىلداندى. وسى جاعىنان العاندا ەسسامنىڭ كوشى ىلگەرى.
ءوز تاريحىندا ەگيپەت فۋتبولشىلارى ەكى رەت قانا الەم چەمپيوناتىندا ونەر كورسەتتى. 1934 جانە 1990 جىلدارى. وسى جارىستىڭ ەكەۋىندە دە ولار بىردە-ءبىر رەت جەڭىسكە جەتكەن جوق. ال بيىلعى دودادا سول ولقىلىقتىڭ ورنىن تولتىرۋعا تاماشا مۇمكىندىك تۋىپ تۇر. قۇرامىندا مۇحاممەد سالاحتاي سۇرمەرگەنى, ەسسام ءال-حادريدەي قاقپاشىسى جانە كۇللى مىسىر حالقىن قۋانتۋعا قۇشتارلانىپ وتىرعان رۋحى بيىك باسقا دا ءور مىنەزدى ويىنشىلارى بار ازۋلى كوماندانىڭ رەسەي جەرىندە ءوز جانكۇيەرلەرىن قۋانتاتىنىنا سەنىمدىمىز.
عالىم سۇلەيمەن, «ەگەمەن قازاقستان»