اۋىلدان اۋدان ورتالىعىنا مەديتسينالىق تەكسەرۋگە كەلگەن ءتورت ءجاسوسپىرىمنىڭ ەمحانا ماڭايىندا الاڭسىز شەكىلدەۋىك شاعىپ, اڭگىمەگە ەلتىپ تۇرعانىن ۋچاسكەلىك ينسپەكتوردىڭ «قىراعى كوزى» بايقاپ قالىپ, زاماتتا حاتتاما تولتىرادى.
بارىنە دە ايىپپۇل سالادى. ولاردىڭ «اعاتاي, كەشىرىڭىز, قۇلدىعىڭىز بولايىق. كۇل-قوقىس شاشقان جەردى تىلىمىزبەن جالاعانداي تازالاپ بەرەيىك. ەندىگارى قايتالانبايدى «دەگەن جان شىرىلىن شىبىن شاققان قۇرلى كورمەيدى. اي-كۇننىڭ امانىندا باستارى شاتىلعان ء«تورت باتىردىڭ» ەڭ كىشىسى 14 جاستاعى دانيل تولىققاندى وتباسىدان بولعاندىقتان, ونىڭ موينىنا قوس بىردەي ايىپپۇلدى ءىلىندىرىپ جىبەرەدى. قالعان ۇشەۋى تەك شەشەلەرىنىڭ قاراۋىندا ەكەنى ەسكەرىلىپ, جەڭىلدەۋ شارامەن قۇتىلادى.
ءدانيلدىڭ اناسى ناتاليانىڭ شىر-پىر بولىپ وتقا دا, سۋعا دا تۇسۋدەن تايىنبايتىن ءتۇرى بار. ۋچاسكەلىك ينسپەكتوردىڭ ءىس-ارەكەتى دە, ەكى ايىپپۇل تولەتتىرۋى دە زاڭسىز دەگەن دايەكتى العا تارتىپ, اۋداندىق سوتقا جۇگىنگەن ەكەن, ءوتىنىشىن قاناعاتتاندىرماي تاستاعان. ودان ءىس وبلىستىق سوتقا ءتۇسىپ, اكەسى عانا ايىپپۇل تولەسىن دەگەن شەشىم شىعارعان.
بالانىڭ ادۆوكاتى دا زاڭ تالاپتارىنىڭ ورەسكەل بۇرمالانعانىنا بۇلتارتپاس دەرەكتەر جەتكىلىكتى دەپ وتىر. ونىڭ ايتۋىنشا, كامەلەتتىك جاسقا تولماعان جەتكىنشەكتەرگە حاتتاما كۋاگەرسىز, اتا-انالاردىڭ قاتىسۋىنسىز تولتىرىلعان. مەكتەپتىڭ الەۋمەتتىك پەداگوگى شاقىرىلماعان. باقىلاۋ كامەراسىنىڭ جازبالارى الدىرتىلماعان. ءتارتىپ بۇزۋشىلىق ورىن العان جانە حاتتاما تولتىرىلعان كۇندەر ءارتۇرلى. سوندىقتان تاعى دا سوتقا جۇگىنبەكشى.
زاڭگەرلەر بولسا, داۋ-دامايدىڭ ءورشۋىن زاڭنىڭ سولقىلداق تۇستارىنان ىزدەيدى. ولاردىڭ ايتۋلارىنشا زاڭدا كامەلەتكە تولماعان بالا ءتارتىپ بۇزسا, اتا-اناسىنا ايىپپۇل سالىنسىن دەگەن باپ قاراستىرىلعان. قۇقىقتىق قۇجاتتىڭ ءار قارپىن تۋرا تۇسىنەتىن, بۇلجىتپاي ورىندايتىن ءتارتىپ ساقشىلارى اكەسىن دە, اناسىن دا جازالاعان.
ال ەش جەردە جۇمىس ىستەمەيتىن ناتاليا بالام 17 مىڭ تەڭگە ايىپپۇل تولەيتىندەي باس جارىپ, كوز شىعارعان جوق قوي. ەسكەرتۋمەن شەكتەلسە, قازاندارى ورتايىپ قالا ما دەپ كۇيىپ-پىسۋمەن ءجۇر.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى