قاراعاندى وبلىسىندا جول پروبلەماسى تولاستاعان ەمەس. جىل سايىن قانشاما شاقىرىم جول كۇردەلى نەمەسە اعىمداعى جوندەۋدەن وتكىزىلەدى.
جاقىندا قوعام بەلسەندىسى, سۋرەتشى كارىپبەك كۇيىكوۆ الەۋمەتتىك جەلىدە قارقارالى اۋدانىنىڭ ەگىندىبۇلاق باعىتىنداعى تاس جولدىڭ احۋالىن ايتىپ دابىل قاققان بولاتىن. ول وسى وڭىردەگى تەرەكتى اۋىلىنىڭ ماڭىندا كەيىنگى جىلدارى اشىلعان كەن ورنىنان قاراعايلى-قاراعاندى تەمىر جولىنا كەن تاسىعان اۋىر سالماقتى ماشينالار جولدى تالقانداپ جاتقانىن ايتىپ قىنجىلىس ءبىلدىردى. سودان كەيىن وتكەن جول ماسەلەلەرىنە ارنالعان جيىندا وبلىس باسشىسى ەرلان قوشانوۆ قارقارالى اۋدانىنىڭ اكىمى حالەل ماقسۇتوۆتى وسى ماسەلەگە قاتىستى سىنعا الدى.
شىنىندا دا, ەگىندىبۇلاقتىڭ جولى بىلتىر عانا جوندەۋدەن وتكىزىلگەن بولاتىن. «التايپوليمەتالل» جشس-نىڭ كۇندىز-ءتۇنى كەن تاسىعان اۋىر كولىكتەرى سول ەڭبەكتىڭ ءبارىن ەش قىلىپ, جىلعا دا جەتكىزبەستەن جولدىڭ ويدىم-شويدىمىن شىعاردى.
– جولعا زاقىم كەلمەۋى ءۇشىن جۇك كولىگىنىڭ سالماعى 8 توننادان اسپاۋى كەرەكتىگىن بىلەسىز عوي. جول ينسپەكتسياسى نەگە جۇمىس ىستەمەيدى؟! شتاتتا 32 ادامدى ۇستاپ وتىرىپ, وڭىردەگى جولدىڭ جاعدايىن قاداعالاي المايسىز با؟ – دەدى ءوڭىر باسشىسى اۋدان اكىمىنە.
قارقارالى اۋدانىنىڭ اكىمى جولدىڭ اتالعان بولىگىندە 25 شاقىرىم ارالىقتى جاماپ-جاسقاۋ جۇمىستارى ءجۇرىپ جاتقانىن, تاعى دا 25 شاقىرىمعا ورتاشا جوندەۋ جاسالاتىنىن ايتىپ اقتالدى.
– جوسپارلانعان 50 شاقىرىم جولدىڭ جارتىسىن جوندەۋگە تەندەر وتكىزىلدى. تەندەر باعاسى 234 ميلليون تەڭگەنى قۇرايدى. مەردىگەر جۇمىسقا كىرىسكەلى وتىر, – دەدى ول.
اۋدان اكىمىنىڭ ايتۋىنشا, «التايپوليمەتالل» جشس بۇدان بىلاي اسا اۋىر جۇك كولىكتەرىمەن كەن تاسىعان مەردىگەرمەن جۇمىس ىستەمەيتىن بولىپتى. كومپانيا جولعا زالال كەلتىرمەۋ ءۇشىن كەندى ەندىگىدە جالپى سالماعى 8 توننادان اسپايتىن «كاماز» كولىكتەرىمەن تاسيدى. بەلگىلەنگەن تارتىپكە باعىنباي جولعا شىققان اسا اۋىر جۇك كولىكتەرىنىڭ يەلەرىنە ۇلكەن ايىپپۇلدار سالىناتىن بولادى.
وسىنىڭ ءبارى ەلدى شۋلاتپاي, وبلىس باسشىسىنا دەيىن جەتكىزبەي تىندىرۋعا بولاتىن شارۋا ەدى. اۋدان ورتالىعىمەن, ودان ءارى قاراعاندىمەن جالعايتىن جالعىز جولمەن قاتىناۋ مۇمكىن بولماي قالعان سوڭ, حالىق, ارينە ۇندەمەي وتىرا المايدى. جيىرما جىلدان استام ۋاقىت بۇرىن اۋدان مارتەبەسىنەن ايىرىلىپ, قارقارالىعا قوسىلعان ەگىندىبۇلاقتىڭ جولدان باسقا پروبلەماسى دا جەتىپ-ارتىلادى. قارقارالىنىڭ قۇرامىندا دەگەن اتى بولماسا, الەۋمەتتىك-ەكونوميكالىق تۇرعىدان ۇنەمى شەتقاقپاي قالىپ جاتاتىنىن وسى ءوڭىردىڭ تۇرعىندارىنان ءجيى ەستيتىنىمىز راس. شالعايدا جاتقان ەل قانداي دا ءبىر شارۋاسىن شەشۋ ءۇشىن مىندەتتى تۇردە جولعا شىعادى. قاراعاندىدان ەگىندىبۇلاققا كۇنىنە ەكى مارتە قاتىنايتىن اۆتوبۋستىڭ ءوزى ءجۇرۋ مۇمكىن بولماي قالعان جولعا امالسىزدىڭ كۇنىنەن ارەڭ شىعاتىن بولعان. ونداعان ەلدى مەكەنگە تەك ەگىندىبۇلاق, ياعني وسى جول ارقىلى عانا بارۋعا بولاتىنىن, ولاردا سىرتتان باراتىنداردى ەسەپتەمەگەننىڭ وزىندە, ون مىڭنان استام حالىق تۇراتىنىن ەسكەرسەك, اۋدان اكىمىنىڭ الاڭسىزدىعىن ءتۇسىنۋ قيىن.
وبلىس اكىمى ە.قوشانوۆ جول پوليتسياسىنىڭ وكىلدەرىنە دە وڭىردەگى بارلىق جولداردى قاتاڭ باقىلاۋعا الىپ, اۋىر جۇك كولىكتەرىنىڭ قوزعالىسىن قاداعالاۋدى تاپسىردى.
قايرات ءابىلدا, «ەگەمەن قازاقستان»
قاراعاندى