مەملەكەت باسشىسى نۇرسۇلتان نازارباەۆتىڭ تاپسىرماسىمەن ەلىمىزدىڭ سىرتقى ىستەر ءمينيسترى قايرات ءابدىراحمانوۆ گازا سەكتورىندا ورىن العان وقيعاعا بايلانىستى يىۇ توراعاسى – تۇركيا پرەزيدەنتى رەجەپ تايپ ەردوعاننىڭ باستاماسىمەن ىستانبۇلدا ۇيىمداستىرىلعان يىۇ توتەنشە سامميتىنە قاتىستى.
جيىندا قازاقستان تاراپى پالەستيناداعى احۋالدىڭ شيەلەنىسۋىنە الاڭداۋشىلىعىن ءبىلدىرىپ, بەيبىت حالىققا قارسى قارۋلى كۇش قولدانىلۋىنا قارسى ەكەندىگىن جەتكىزدى, سونداي-اق زورلىق-زومبىلىقتى دەرەۋ توقتاتۋ ءۇشىن حالىقارالىق قوعامداستىقتى بارلىق مۇمكىن شارالاردى قولدانۋعا شاقىردى.
سونىمەن قاتار سىرتقى ساياسات ۆەدومستۆوسىنىڭ باسشىسى ءارتۇرلى ەتنوستىق توپتار مەن ءدىني نانىمداردى ۇستانعان حالىقتاردىڭ ورتاق ءۇيى بولىپ تابىلاتىن يەرۋساليم قالاسىنداعى پالەستينالىقتار مەن يزرايلدىكتەر ءبىر-ءبىرىنىڭ ءومىر ءسۇرۋ قۇقىقتارىنا قۇرمەت كورسەتۋ قاجەتتىلىگىن باسا ايتتى.
بۇۇ قاۋىپسىزدىك كەڭەسى مەن باس اسسامبلەياسىنىڭ شەشىمدەرى مەن قارارلارىنا قاتىستى ءوز اينىماستىعىن راستاي وتىرىپ, سىرتقى ىستەر ءمينيسترى ق.ءابدىراحمانوۆ قازاقستاننىڭ تاياۋ شىعىستاعى جاعدايدى ساياسي ديالوگ جولىمەن بەيبىت ساياسي پروتسەسىنىڭ اياسىندا تولىققاندى رەتتەۋ ءۇشىن دەرەۋ, دايەكتى جانە جان-جاقتى شەشىمدەر قابىلدانۋىنا قولداۋ كورسەتەتىنىن بايانداي كەلە, يزرايل مەن پالەستينا باسشىلىعىن ەكى مەملەكەتتىڭ بەيبىتشىلىكتە ءومىر ءسۇرۋىن قامتاماسىز ەتۋگە باعىتتالعان ناقتى قادامدار جاساۋعا شاقىردى.
ىستانبۇلدا وتكەن يىۇ-نىڭ توتەنشە سامميتىنە يىۇ-نىڭ 40-تان استام مۇشە ەلدەرىنەن مەملەكەت, ۇكىمەت, پارلامەنت باسشىلارى مەن سىرتقى ىستەر مينيسترلەرى قاتىستى.
سامميت ناتيجەسىندە كومميۋنيكە قابىلداندى. قۇجاتتا يىۇ ەلدەرىنىڭ وكىلدەرى پالەستينا حالقىنا تولىق جانە جان-جاقتى قولداۋ ءبىلدىردى.
ءسامميتتىڭ اياسىندا ق. ءابدىراحمانوۆتىڭ بۇۇ باس حاتشىسىنىڭ ساياسي ماسەلەلەرى بويىنشا كومەكشىسى ميروسلاۆ ەنچامەن كەزدەسۋى ءوتتى. سۇحباتتاسۋشىلار بىرىككەن ۇلتتار ۇيىمىنىڭ شەڭبەرىندە, ونىڭ ىشىندە قازاقستاننىڭ بۇۇ قاۋىپسىزدىك كەڭەسىندەگى مۇشەلىگى تۇرعىسىندا ءوزارا ءىس-قيمىلدىڭ وزەكتى ماسەلەلەرىن تالقىلادى.
«ەگەمەن-اقپارات»