ءماجىلىس توراعاسى نۇرلان نىعماتۋلين رەسمي ساپارمەن ماسكەۋگە كەلدى. ساپار بارىسىندا ءماجىلىس توراعاسى رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ سپيكەرى ۆياچەسلاۆ ۆولودينمەن كەلىسسوز جۇرگىزىپ, مەملەكەتتىك دۋما مەن پارلامەنت ءماجىلىسى اراسىنداعى ىنتىماقتاستىق تۋرالى پالاتاارالىق پارلامەنتتىك كوميسسيانىڭ ونىنشى وتىرىسىنا قاتىستى, دەپ حابارلادى ءماجىلىستىڭ ءباسپاسوز قىزمەتى.
سونىمەن بىرگە مەملەكەتتىك دۋمادا «قازاقستان – رەسەي عاسىرلارعا جالعاسقان دوستىق» كورمەسىنىڭ اشىلۋى بولدى.
پارلامەنت پالاتالارى باسشىلارىنىڭ كەزدەسۋىنە قازاقستان مەن رەسەي اراسىنداعى قارىم-قاتىناستى ءسوز ەتكەن ءماجىلىس توراعاسى جوعارى دەڭگەيدەگى كەزدەسۋلەر مەن جەتكەن جەتىستىكتەر ستراتەگيالىق ارىپتەس سانالاتىن قوس مەملەكەتتىڭ ءوزارا ءىس-قيمىلىنىڭ جارقىن ۇلگىسىنە اينالعاندىعىن اتاپ ءوتتى.
ن. نىعماتۋليننىڭ پىكىرىنشە, ءبىزدىڭ ەلدەرىمىز اراسىندا سەنىمدى ساياسي ۇنقاتىسۋ ورناپ, تەرەڭ ەكونوميكالىق بايلانىستار ارتقان, مادەني-گۋمانيتارلىق ىنتىماقتاستىق جىل سايىن نىعايىپ كەلەدى. ءماجىلىس سپيكەرى اتاپ وتكەندەي, بۇل – قازاقستان مەن رەسەي باسشىلارى نۇرسۇلتان نازارباەۆ پەن ۆلاديمير ءپۋتيننىڭ ءوزارا تۇسىنىستىك پەن دوستىققا نەگىزدەلگەن بىرلەسكەن ءتيىمدى جۇمىسىنىڭ ناتيجەسى.
ن.نىعماتۋلين ەكى ەل باسشىلارىنىڭ كەلىسىمدەرىن زاڭنامالىق تۇرعىدان قولداۋعا ەرەكشە نازار اۋداردى.
مەملەكەتتىك دۋما توراعاسى ءماجىلىس دەلەگاتسياسىنىڭ رەسمي ساپارىنىڭ ماڭىزدىلىعىنا توقتالدى. بۇل – سوڭعى 10 جىلداعى العاشقى ساپار. ۆ.ۆولودين قازاقستاندىق جانە رەسەيلىك دەپۋتاتتاردىڭ بۇگىنگى كەزدەسۋلەرى پارلامەنتارالىق ىنتىماقتاستىقتى دامىتۋعا تىڭ سەرپىن بەرەتىنىن ايتتى.
قازاقستان-رەسەي بايلانىسىن دامىتۋدىڭ وزەكتى ماسەلەلەرى ماسكەۋدە وتكەن ەكى ەل پارلامەنتتەرى پالاتالارىنىڭ باسشىلارى نۇرلان نىعماتۋلين مەن ۆياچەسلاۆ ۆولودين قاتىسقان مەملەكەتتىك دۋما مەن پارلامەنت ءماجىلىسى اراسىنداعى ىنتىماقتاستىق تۋرالى پالاتاارالىق پارلامەنتتىك كوميسسيانىڭ 10-وتىرىسىندا ودان ءارى جالعاستى.
كۇن تارتىبىندە شەكارالاس ىنتىماقتاستىقتىڭ پەرسپەكتيۆالارى, كولىك جانە لوگيستيكا, يننوۆاتسيانى جانە ەكونوميكانى تسيفرلاندىرۋ ماسەلەلەرى تالقىلاندى. وسىعان وراي ن.نىعماتۋلين يننوۆاتسيالىق تەحنولوگيالاردى ەنگىزۋ, ەكونوميكانى تسيفرلاندىرۋ قازاقستان پرەزيدەنتى نۇرسۇلتان نازارباەۆتىڭ حالىققا جولداۋىندا ايتىلعان ماڭىزدى مىندەتتەردىڭ ءبىرى ەكەنىن اتاپ ءوتتى. تسيفرلى ەكونوميكانى دامىتۋدى جانە ونىڭ باسەكەگە قابىلەتتىلىگىن ارتتىرۋدى زاڭدىق تۇرعىدان قولداۋ ەكىجاقتى ستراتەگيالىق ارىپتەستىكتى نىعايتۋعا جول اشادى.
ەكى ەلدىڭ تاتۋ كورشىلىك قارىم-قاتىناسىن ءماجىلىس توراعاسى ن.نىعماتۋلين جانە مەملەكەتتىك دۋما سپيكەرى ۆ.ۆولودين قاتىسقان «قازاقستان جانە رەسەي: عاسىرلارعا جالعاسقان دوستىق!» كورمەسىنە قويىلعان سۋرەتتەر ايشىقتاي ءتۇستى. ن.نىعماتۋلين كورمەنىڭ اشىلۋىندا سويلەگەن سوزىندە:
– كورمەنىڭ تاقىرىبى دا, وعان قويىلعان ەكسپوناتتار دا قازاقستان مەن رەسەيدىڭ 25 جىل ىشىندە ءجۇرىپ وتكەن تاريحي جولىنان سىر شەرتەدى. ءبىزدىڭ ەلدەرىمىزدىڭ باسشىلارى نۇرسۇلتان ءابىش ۇلى نازارباەۆ پەن ۆلاديمير ۆلاديميروۆيچ ءپۋتيننىڭ ساليقالى ساياساتىنىڭ ارقاسىندا قازاقستان مەن رەسەي ەڭ جاقىن, ەڭ باۋىرلاس ەلدەر رەتىندە بۇگىنگى كۇنى مەملەكەتارالىق ىنتىماقتاستىقتىڭ جارقىن ۇلگىسىن كورسەتىپ كەلەدى. بۇل ءبىزدىڭ بۇگىنگى جانە بولاشاق تابىستارىمىزدىڭ كەپىلى. وسى جولدا پارلامەنتارالىق بايلانىستىڭ دا ءرولى وتە زور, – دەدى.
ءوز كەزەگىندە مەملەكەتتىك دۋما توراعاسى كورمە ورتاق تاريحىمىزدى ەسكە الىپ, بولاشاققا بايلام جاساۋدىڭ تاماشا كورىنىسى ەكەنىن اتاپ ءوتتى.
– بۇل ساپار ءبىزدىڭ ارىپتەستىك مۇمكىندىگىمىزدىڭ زور ەكەنىن كورسەتەدى. مەملەكەتتىك دۋما مەن پارلامەنت ءماجىلىسى اراسىنداعى ىنتىماقتاستىق تۋرالى پالاتاارالىق پارلامەنتتىك كوميسسيانىڭ جۇمىسى وتە ماڭىزدى. اسىرەسە, ءبىزدىڭ ەلدەرىمىز باسشىلارىنىڭ كەلىسىمدەرىن زاڭنامالىق تۇرعىدان قامتاماسىز ەتۋ جولىندا وزەكتىلىگى جوعارى, – دەدى ۆ.ۆولودين.
كورمەدە مەملەكەتتىك دۋمانىڭ XX عاسىر باسىنداعى ءبىرىنشى جانە ەكىنشى شاقىرىلىم جۇمىستارىنىڭ مۇراعاتتىق سۋرەتتەرى قويىلعان, ول جۇمىستارعا قازاق دەپۋتاتتارى دا قاتىسقان بولاتىن.
ال ورتاق تاريح تۋرالى ۇلى وتان سوعىسى, تىڭ يگەرۋ كەزەڭىندەگى ەرلىكتەر, بايقوڭىردان عارىشقا العاشقى ساپار جايىنداعى ەستەلىك قويىلعان.
كورمەنىڭ اشىلۋىنا قاتىسقان العاشقى ايەل-عارىشكەر, قازىردە مەملەكەتتىك دۋما دەپۋتاتى ۆالەنتينا تەرەشكوۆا قازاقستان پرەزيدەنتىنە دەگەن ىستىق ىقىلاسىن جەتكىزدى. ول ءوز سوزىندە:
– ءبىزدىڭ ەلدەرىمىزدىڭ تۇرعىندارى ەڭ الدىمەن, نۇرسۇلتان ءابىش ۇلى نازارباەۆقا ايرىقشا ىلتيپاتپەن جانە قۇرمەتپەن قارايدى. مەن دە ءوز حالقىنىڭ يگىلىگى ءۇشىن قىزمەت ەتەتىن ايگىلى مەملەكەت قايراتكەرىن زور قۇرمەت تۇتامىن, – دەدى.
سونداي-اق كورمەدە ەكى مەملەكەت تاۋەلسىزدىگىنىڭ العاشقى جىلدارىنان ورناعان قارىم-قاتىناس جايىندا ماعلۇمات بەرەتىن ەستەلىكتەر بار. ول سۋرەتتەردەن ەلباسى نۇرسۇلتان نازارباەۆتىڭ رەسەي پرەزيدەنتتەرىمەن كەزدەسۋلەرى كەزىندە ماڭىزدى ستراتەگيالىق قۇجاتتارعا قول قويىپ جاتقان ساتتەرىن, ەۋرازيالىق ينتەگراتسيا تۋرالى العاش رەت جاريا ەتكەن م.ۆ.لومونوسوۆ اتىنداعى ممۋ-دە ءسوز سويلەگەن ساتتەرىن كورۋگە بولادى.
– پرەزيدەنت نۇرسۇلتان نازارباەۆ ايتقان ەۋرازيالىق يدەيا – ول تەك يدەيا عانا ەمەس, ول – جۇزەگە اسقان باعدارلاما. ءبىز ەۋرازيالىق وداقسىز سەنىمدى, تۇراقتى بولاشاقتى قامتاماسىز ەتە المايتىنىمىزدى ءتۇسىنۋىمىز كەرەك. سوندىقتان قازاقستان پارلامەنتى ءماجىلىسى مەن مەملەكەتتىك دۋمانىڭ وسى يدەيانى جۇزەگە اسىرۋ جولىندا بىرلەسە ءىس-قيمىل جاسايتىنى قۇپتارلىق, – دەدى «رەسەي فەدەراتسياسى كوممۋنيستىك پارتياسى» فراكتسياسىنىڭ جەتەكشىسى گەننادي زيۋگانوۆ.
كورمە بارىسىندا, سونداي-اق تاۋەلسىز قازاقستاننىڭ ايشىقتى بەلگىسى – استاناعا دا ايرىقشا نازار اۋدارىلعان. كورمەگە قويىلعان استانانىڭ دامۋ قارقىنى مەن كوز تارتار سۇلۋلىعىنان سىر شەرتەتىن سۋرەتتەر كوپشىلىكتىڭ قىزىعۋشىلىعىن تۋدىردى.
وسى ورايدا مەملەكەتتىك دۋما دەپۋتاتى يرەك زيننۋروۆ:
– نازارباەۆ – ناعىز كوشباسشى. سوندىقتان دا سىزدەردىڭ ەلدە بولىپ جاتقان بارلىق وزگەرىستەر تىكەلەي پرەزيدەنتتىڭ اتىمەن بايلانىستى. بۇل استاناعا دا قاتىستى دەۋگە بولادى. مەن ول جەردە بۇرىن دا بولعانمىن, كەيىن دە باردىم. بۇل – ەرتەگى قالا, – دەگەن پىكىرىن ءبىلدىردى.