استانادا ەكىنشى دۇنيەجۇزىلىك سوعىس ارداگەرلەرىن جانە ولارعا تەڭەستىرىلگەن تۇلعالاردى الەۋمەتتىك قولداۋعا ارنالعان شارالار جونىندە بريفينگ ءوتتى.
جيىنعا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا, قارۋلى كۇشتەردىڭ باس شتابى تاربيە جانە يدەولوگيا دەپارتامەنتى باسشىسىنىڭ ورىنباسارى قاناتبەك بەلگىبەكوۆ جانە ارداگەر احات بەكمادي قاتىستى.
س.جاقىپوۆانىڭ دەرەكتەرىنە سۇيەنسەك, بيىل ەكىنشى دۇنيەجۇزىلىك سوعىستىڭ ارداگەرلەرىنە ءبىر رەتتىك كومەك رەتىندە 2,7 ميلليارد تەڭگە كولەمىندەگى ءبىر جولعى اقشالاي تولەم قاراستىرىلعان. سونداي-اق 2,6 ميلليارد تەڭگە سوماسىنداعى الەۋمەتتىك قولداۋدىڭ قوسىمشا شارالارى بار.
«بۇگىنگى كۇنى رەسپۋبليكادا 2067 ۇلى وتان سوعىسىنىڭ قاتىسۋشىلارى مەن مۇگەدەكتەرى, 39 723 ولارعا تەڭەستىرىلگەن ادامدار, 166 700 ۇلى وتان سوعىسى قاتىسۋشىلارىنا تەڭەستىرىلگەن باسقا ساناتتاعى تۇلعالار تۇرىپ جاتىر», دەدى س.جاقىپوۆا.
ەلىمىزدە ارداگەرلەرى ەڭ كوپ قالا – الماتى, مۇندا 268 سوعىس ارداگەرى تۇرادى. شىعىس قازاقستان وبلىسىندا – 176, وڭتۇستىك قازاقستان وبلىسىندا 124 ارداگەر بار. ماڭعىستاۋ وبلىسىندا 24 ارداگەر بار ەكەن.
ارداگەرلەرگە كورسەتىلەتىن ءبىر رەتتىك تولەم مولشەرى ايماقتاردىڭ ەكونوميكالىق جاعدايىنا بايلانىستى ءارتۇرلى. ماسەلەن, استانا قالاسى مەن شىعىس قازاقستان وبلىسىندا سوعىسقا قاتىسۋشىلار 500 مىڭ تەڭگە سوماسىنداعى ءبىر رەتتىك جاردەماقى الادى. باسقا وڭىرلەردە ورتاشا تولەم مولشەرى 150 مىڭ تەڭگەنىڭ اينالاسىندا. سونداي-اق ەلىمىزدەگى لەنينگراد تۇرعىندارى, كونتسلاگەردىڭ كامەلەتكە تولماعان تۇتقىنى اتانعاندار, سوعىستا قازا تاپقان جاۋىنگەرلەردىڭ جۇبايلارى, تىل ارداگەرلەرى مەن باسقا دا سوعىسقا قاتىسۋشىلارعا تەڭەستىرىلگەندەر دە ءتۇرلى مولشەردەگى ءبىر رەتتىك تولەم الادى.
بۇدان كەيىن سوعىس ارداگەرى ا.بەكمادي ءسوز سويلەپ, بەيبىت ءومىردىڭ ماڭىزىنا توقتالىپ, سوعىس بولماسىن دەگەن تىلەگىن جەتكىزدى.
«سوعىس ارداگەرى رەتىندە ماعان ءۇش بولمەلى پاتەر بەردى. جولدا تەگىن جۇرەمىن, ەندى نە كەرەك ماعان؟! وسىنداي قۇرمەت كورسەتكەنى ءۇشىن ەلىمە, ەلباسىنا العىس ايتامىن. ءبىزدىڭ ماقساتىمىز – بەيبىت ءومىر ءسۇرۋ», دەدى قاريا.
جيىن سوڭىندا ا.بەكماديگە باعالى سىيلىقتار بەرىلدى.
اباي اسانكەلدى ۇلى,
«ەگەمەن قازاقستان»