وتكەن جەكسەنبى كۇنى قازاقستان مەن الەم بوكس جانكۇيەرلەرى وسى كوكتەمنىڭ نەگىزگى جەكپە-جەگى سانالعان گەننادي گولوۆكين مەن ساۋل «كانەلو» الۆارەس اراسىنداعى ايقاستى كورۋى ءتيىس بولاتىن. الايدا بەلگىلى سەبەپتەرگە بايلانىستى گولوۆكين مەكسيكالىق بوكسشىنىڭ ورنىنا ارعى تەگى ارميان, اقش ازاماتى ۆانەس مارتيروسيانمەن جۇدىرىقتاستى.
اقش-تىڭ كارسون قالاسىنداعى StubHub Center ارەناسىندا وتكەن كەزدەسۋ نەبارى ەكى راۋندقا عانا سوزىلدى. جەكپە-جەكتىڭ ەكىنشى راۋندىندا وتانداسىمىز قارسىلاسىن نوكاۋتپەن جەڭىپ, كاسىپقوي بوكستاعى 38-ءشى جەڭىسىنە قول جەتكىزدى. ال مارتيروسيان كارەراسىنداعى ءتورتىنشى جەڭىلىسىنە ۇشىرادى.
جەكپە-جەك باسىندا ۆانەس وزىنە تىم سەنىمدى قيمىلداپ, اشىق ايقاس كورسەتە باستادى. ءتىپتى ونىڭ ەكى دجەب سوققىسى وتانداسىمىزدىڭ قورعانىسىن بۇزىپ-جارىپ, دىتتەگەن جەرىنە دە جەتتى. وتانداسىمىز ۆانەستىڭ ەركىن كوسىلۋىنە مۇمكىندىك بەردى. ءتىپتى العاشقى راۋندتىڭ سوڭعى سەكۋندتارىندا ارميان بوكسشىسىنىڭ كەنەتتەن ۇيىمداستىرعان سەريالىق سوققىلارى گولوۆكيندى كۇتپەگەن جاعدايعا قالدىردى. وسىلايشا, ۆانەس العاشقى راۋندتا جەكپە-جەكتى ءوز پايداسىنا شەشتى. تورەشىلەردىڭ شەشىمى بويىنشا دا, ول ءبىرىنشى راۋندتا 9:10 ۇپايمەن باسىم ءتۇستى.
ال ەكىنشى راۋندا جانكۇيەرلەر شارشى الاڭدا مۇلدە باسقا گولوۆكيندى كوردى. راۋند باستالا سالا جەكپە-جەككە شىنداپ كىرىسكەن وتانداسىمىز قارسىلاسىن سوققىنىڭ استىنا الدى. سونداي ساتتەردىڭ بىرىندە گەنناديدىڭ بىرنەشە سوققىسى قارسىلاسىنا ءدوپ ءتيىپ, امەريكالىق بوكسشى تىزەرلەپ وتىرىپ قالدى. الايدا تورەشى بۇل ءساتتى نوكداۋن دەپ ەسەپتەگەن جوق.
گولوۆكين جانكۇيەرلەرگە نوكاۋتتى كوپ كۇتتىرگەن جوق. ەكىنشى راۋندتىڭ ورتا تۇسىنا كەلگەندە ول كوپ سوققىلى كومبيناتسيا ۇيىمداستىردى: سول قولىمەن ەكى دجەب, تىكەلەي ەكى ءتۇزۋ سوققى, سول, وڭ جانە سول قولىمەن كەزەكتى سوققى جاساپ, قارسىلاسىن نوكاۋتقا ءتۇسىردى. تورەشى مارتيروسيان وزىنە كەلىپ الۋ ءۇشىن 10 سەكۋند ساناعانىمەن, ول ورنىنان تۇرا المادى. ءسويتىپ كوپتەن كۇتكەن جەكپە-جەك ءتورت جارىم مينۋتقا عانا سوزىلدى.
بۇل كەزدەسۋدە گەننادي گولوۆكين ءوزىنىڭ WBA تيتۋلىن 19-شى, WBC بەلدىگىن ءتورتىنشى جانە IBO تيتۋلىن 17-ءشى رەت قورعادى. تاعى ءبىر ايتا كەتەتىن جايت, گولوۆكين وسىدان ءدال 12 جىل بۇرىن, ياعني 6 مامىر كۇنى گەرمانيادا ءوزىنىڭ كاسىپقوي بوكستاعى العاشقى كەزدەسۋىن ۆەنگريالىق بوكسشى گابور بالوگقا قارسى وتكىزىپ, ءبىرىنشى راۋندتا نوكاۋتپەن جەڭگەن-ءدى.
كەزدەسۋدەن سوڭ ۆانەس مارتيروسيان جۋرناليستەرگە جەكپە-جەك تۋرالى پىكىرىن ايتىپ بەردى. «قۇددى پويىزدىڭ استىندا قالىپ قويعانداي بولدىم. ونىڭ ءبىر عانا ەمەس, بارلىق سوققىسى ماعان وتە اۋىر ءتيدى. بۇعان دەيىن مەنى ەشكىم بۇلاي قاتتى سوققىنىڭ استىنا الماعان ەدى. گولوۆكين – سۇمدىق پانچەر. ءاربىر سوققىسى مىعىم ءارى جويقىن «كانەلونىڭ» الگى ەتتى نە ءۇشىن جەگەنىن ەندى ءتۇسىندىم», دەدى مارتيروسيان.
ال گولوۆكين كەزدەسۋدەن كەيىن ءوزىن جاقسى سەزىنگەنىن ايتادى. «مەنى قولداعان بارشا قازاقستاندىقتارعا, دوستارىما العىسىمدى ايتامىن. ۆانەس – مىقتى بوكسشى. ءبىرىنشى راۋندا جاساعان بىرنەشە سوققىسى ءدال تيگەندە جەكپە-جەك قيىنعا سوعادى دەپ ويلادىم. بىراق ەكىنشى راۋندتا ءبارى ءساتتى اياقتالدى. جانكۇيەرلەرىم ءۇشىن سينكو دە مايو مەرەكەسىنە كەرەمەت سىي جاسادىم», دەدى گولوۆكين.
سونىمەن قاتار گولوۆكين الداعى ايقاسىنا جاقسى قارسىلاس ىزدەيتىنىن مالىمدەدى. «قىركۇيەكتە «كانەلومەن» قارىمتا كەزدەسۋ دەيسىز بە؟ ول دايىن بولسا, مەن دايىنمىن. كىممەن بولسا دا جۇدىرىقتاسۋعا كۇشىم جەتەدى. توعىز جىل بويى چەمپيونمىن. جىگىتتەر, قولدارىڭنان كەلسە, بەلدىگىمدى الۋعا تىرىسىپ كورىڭدەر», دەپ مالىمدەدى ول.
ءدال قازىر جانكۇيەرلەر گولوۆكينمەن جەكپە-جەككە شىعۋى مۇمكىن بولعان ناقتى ءۇش بوكسشىنىڭ ەسىمىن اتايدى. ولار: ساۋل الۆاەرس (مەكسيكا), بيللي دجو سوندەرس (بريتانيا) جانە سەرگەي دەرەۆيانچەنكو (ۋكراينا).
گولوۆكين-مارتيروسيان جەكپە-جەگىنە تىكەلەي ەفيردە كوممەنتاتورلىق جاساعان بوكستان افينا وليمپياداسىنىڭ چەمپيونى باقتيار ارتاەۆتىڭ پايىمداۋىنشا, گەننادي گولوۆكيننىڭ كەلەسى قارسىلاسى بريتانيالىق بيللي دجو سوندەرس بولۋى مۇمكىن. «قازىر سوندەرستە گولوۆكينگە جەتپەي تۇرعان WBO بەلدىگى بار. سوندىقتان گولوۆكينگە الداعى ۋاقىتتا بريتانيالىق بوكسشى قارسىلاس اتانۋى مۇمكىن. سەبەبى, سوندەرس گولوۆكينمەن كەزدەسەتىن بولسا, ۇلكەن قارجىعا كەنەلەتىنى انىق. بيللي گولوۆكينمەن كەزدەسكەن جاعدايدا, ول وتانداسىمىزعا اسا قيىندىق تۋعىزا قويمايدى. ويتكەنى سوندەرستىڭ سوققىسى ايتارلىقتاي جويقىن ەمەس», دەيدى وليمپيادا چەمپيونى.
ال وتانداسىمىزدىڭ جاتتىقتىرۋشىسى مۇلدە باسقا پىكىردە. ونىڭ ايتۋىنشا, گولوۆكين-سوندەرس جەكپە-جەگى وتپەۋى دە مۇمكىن. سەبەبى بريتانيالىق بوكسشى وتانداسىمىزبەن جۇدىرىقتاسۋى ءۇشىن وتە ءىرى كولەمدەگى گونورار تالاپ ەتۋدە.
«سوندەرس گولوۆكينمەن ەشقاشان جەكپە-جەك وتكىزبەيدى. ويتكەنى ول وتە كوپ سومادا قارجى تالاپ ەتۋدە. مىسالى, سوندەرس دەنيەل دجەيكوبسپەن رينگتە كەزدەسۋى ءۇشىن جەتى ميلليون دوللار سۇراعان. وسىدان-اق ويلاي بەرىڭىز, ول گولوۆكينمەن شىعۋ ءۇشىن قانشا قاراجات سۇراعانىن. سوندىقتان, ءبىز WBO بەلدىگىن الا المايمىز. گولوۆكيننىڭ وزىنە دە ءدال قازىر بۇل بەلدىك اسا قاجەت تە ەمەس. گولوۆكيننىڭ كەلەسى قارسىلاسى كىم بولۋى مۇمكىن دەگەن سۇراققا كەلسەك, بىزدە بىرنەشە نۇسقا بار. ولار: مۋراتا, دجەيكوبس, چارلو جانە دەرەۆيانچەنكو. سونداي-اق «كانەلومەن» قارىمتا كەزدەسۋ وتكىزگىمىز كەلەدى. بۇل ايقاس ءبىز ءۇشىن قارجىلىق جاعىنان ەمەس, كىم مىقتى انىقتاۋ ءۇشىن ءتيىمدى», دەيدى سانچەس.
IBF تالابى بويىنشا, گولوۆكين الداعى 90 كۇننىڭ ىشىندە ۋكراينالىق سەرگەي دەرەۆيانچەنكومەن جەكپە-جەككە شىعۋى ءتيىس. ەگەر دەرەۆيانچەنكومەن جەكپە-جەككە شىقپاسا, IBF گولوۆكيننەن چەمپيوندىق بەلبەۋدى قايتارىپ الاتىنىن مالىمدەگەن. مارتيروسيانعا قارسى جەكپە-جەكتەن سوڭ گولوۆكيننىڭ كومانداسى IBF ۇيىمىنان بەلدىكتى قورعاۋ مەرزىمىن تاعى دا شەگەرۋىن سۇراعان. بىراق IBF الەم چەمپيونى اتاعىن قورعاۋ ءۇشىن ەكىنشى رەت جەكپە-جەكتى كەيىنگە شەگەرمەيتىنى انىق.
گولوۆكيننىڭ كومانداسىن الدا وتە ماڭىزدى تاڭداۋ كۇتىپ تۇر. الۆارەس, سوندەرس نەمەسە دەرەۆيانچەنكو. وتانداسىمىزدىڭ پروموۋتەرى توم لەففلەردىڭ ايتۋىنشا, گولوۆكين ەندى كۇز مەزگىلىندە جۇدىرىقتاسادى جانە ول ءۇشىن وگىزدى دە ولتىرمەيتىن, اربانى دا سىندىرمايتىن ءتيىمدى جول تاۋىپ بەرەتىنىن ايتتى.
ءالي بيتورە,
«ەگەمەن قازاقستان»