بۇگىن استانادا 1941-1945 جىلدارداعى ەكىنشى دۇنيەجۇزىلىك سوعىستا جاراقات الىپ, قايتىس بولعان اقمولالىق جاۋىنگەرلەردىڭ قورىمىندا ءداستۇرلى تۇردە گۇل سەبەتتەرىن جانە «داڭق گۇل شوقتارىن» قويۋ ءراسىمى ءوتتى.
جاس ۇلان مەكتەبىنىڭ وقۋشىلارى جانە ارداگەرلەر سالتاناتپەن ساپ تۇزەپ ءوتىپ, ەسكەرتكىش تاقتاعا گۇل شوقتارىن قويدى. مارقۇمداردى ەسكە الۋ ءىس-شاراسىندا سوعىس ارداگەرلەرى, تىل ەڭبەككەرلەرى, قازا بولعان مارقۇمداردىڭ تۋىستارى, استانا قالاسى اكىمدىگىنىڭ باسشىلارى, قوعامدىق جانە جاستار ۇيىمدارىنىڭ وكىلدەرى قاتىستى. استانا قالاسى اكىمدىگى اتىنان اكىم ورىنباسارى ەرمەك امانشاەۆ ءسوز سويلەدى.
«كەلەر ۇرپاقتىڭ بەيبىت ءومىر سۇرۋىنە, وتانىن قورعاۋعا جانە ودان كەيىنگى ومىردە سالتاناتتى ءومىر ءسۇرۋ ءۇشىن شىبىن جاندارىن قيعان ارداگەرلەردى ەسكە الىپ تۇرمىز. وسى اقمولا وڭىرىنەن سۇراپىل سوعىسقا اتتانعانداردىڭ ىشىنەن وتىز جاۋىنگەر كەڭەس وداعىنىڭ باتىرى اتاعىن العان. سىزدەردىڭ ەرلىكتەرىڭىز ءبىزدىڭ جۇرەگىمىزدە ماڭگى ساقتالادى. سىزدەرگە استانا قالاسى اكىمدىگىنىڭ جانە قالا تۇرعىندارىنىڭ اتىنان باسىمىزدى ءيىپ العىس ايتامىز. دەنساۋلىقتارىڭىز زور بولىپ, بىزگە ۇلگى كورسەتىپ ارامىزدا جۇرە بەرىڭىزدەر. مەيرامدارىڭىز قۇتتى بولسىن!», - دەدى استانا قالاسى اكىمىنىڭ ورىنباسارى ەرمەك امانشاەۆ.
قازىرگى تاڭدا ەلوردامىزدا توقساننان اسا ارداگەر جانە ءۇش مىڭعا جۋىق تىل ەڭبەككەرى تۇرىپ جاتىر.
استانا قالالىق ارداگەرلەر كەڭەسىنىڭ توراعاسى سانسىزباي ەسىلوۆتىڭ سوزىنشە وتكەن جىلى جەڭىس مەرەكەسىن ءجۇز وتىزعا جۋىق ارداگەر قارسى السا بيىلعى مەرەكەنى توقساننان اسا ارداگەر قارسى الايىن دەپ وتىر.
ەلوردادا تۇرىپ جاتقان بارلىق ارداگەرلەر ساناتوري-كۋرورتتىق ەمدەۋمەن جانە كوممۋنالدى-تۇرمىستىق قىزمەتتەردى وتەۋگە اي سايىن اقشالاي وتەماقىمەن قامتاماسىز ەتىلگەن, سونداي-اق ارداگەرلەرگە الەۋمەتتىك كومەك كورسەتىلەدى.
ايتا كەتەيىك, وسى جىلى استانا قالاسى ءماسليحاتىنىڭ شەشىمىمەن بارلىق ەكىنشى دۇنيەجۇزىلىك سوعىسىنىڭ ارداگەرلەرىنە 500 مىڭ تەنگە كولەمىندە بىرجولعى ماتەريالدىق كومەك تولەنگەن.