بيىل ۇلى جەڭىسكە 73 جىل. مىڭداعان بوزداقتىڭ ءومىرىن قيىپ, جات جەردەن توپىراق بۇيىرتقان قاساپ قىرعىننىڭ قاسىرەتى ءالى كۇنگە دەيىن مايدانگەرلەردىڭ جۇرەگىندە. وتان ءۇشىن وت كەشىپ, ەل ءۇشىن ەسىل جانىن اياماعان ارداگەرلەردىڭ ەرلىگى ۇرپاق ءۇشىن ءاردايىم ۇلاعات. جىل سايىن ەلىمىزدە جەڭىس ساعاتىن جاقىنداتقان ارداگەرلەرگە قۇرمەت كورسەتىلىپ, مايدان دالاسىندا قازا تاپقان ەرلەردىڭ رۋحىنا حالىق تاعزىم ەتەدى.
جامبىل وبلىسىندا دا جەڭىس كۇنىن مەرەكەلەۋگە ارنالعان دايىندىق جۇمىستارى قىزۋ جۇرگىزىلۋدە. بيىلعى جىلى تاراز قالاسىنداعى باۋىرجان مومىش ۇلى اتىنداعى «جەڭىس» ساياباعىندا جاڭعىرتۋ جۇمىستارى قولعا الىنىپ, ناتيجەسىندە اتالعان ساياباق ەل رۋحىن كوتەرەتىن, جاستارعا پاتريوتتىق تاربيە بەرەتىن ورتالىققا اينالدى. ناۋرىز ايىنىڭ بەل ورتاسىندا باستالعان كۇردەلى جوندەۋ جۇمىستارىنىڭ ناتيجەسىندە ساياباق ءبىر جارىم ايدىڭ ىشىندە ادام تانىماستاي وزگەردى. ەندىگى جەردە بۇل ساياباق جامبىلدىقتار ءۇشىن شەجىرەلى, كيەلى ورتالىققا اينالىپ وتىر.
ۇلى جەڭىس كۇنى مەرەكەسىنە وراي, اۋەلى ساياباقتىڭ بۇرىنعى تەمىردەن سالىنعان اركاسى اۋىستىرىلىپ, ونىڭ ورنىنا تراۆەرتين تاسىنان ورىلگەن قابىرعالار بوي كوتەردى. سونىمەن قاتار, ساياباققا كىرەبەرىستەگى سۋبۇرقاق بۇزىلىپ, تەگىستەلىپ, ونىڭ ورىنى دا ۇلكەن الاڭعا اينالدى. جامبىل وبلىستىق قازاق دراما تەاترىنىڭ الدىندا تۇرعان باۋىرجان مومىش ۇلىنىڭ ەسكەرتكىشى وسىندا اكەلىنىپ, تاس تۇعىرعا ورنالاستىرىلعان. ال بۇرىن تولە بي داڭعىلىنىڭ بويىندا تۇرعان «ماڭگىلىك الاۋ» «جەڭىس» ساياباعىنا كوشىرىلدى. سونىمەن قاتار, باتىر ەسكەرتكىشىنىڭ قوس قاپتالىندا ورنالاسقان «باتىرلار اللەياسى» ساياباقتىڭ ءسانىن ارتتىرىپ, رۋحىن بيىكتەتىپ تۇر. ەلدىڭ ەسىندە, ۇرپاقتىڭ جادىندا ءجۇرسىن دەگەن نيەتپەن اۋليەاتا وڭىرىنەن شىققان 48 كەڭەس وداعى باتىرىنىڭ ەسىمدەرى جازىلعان ارنايى تاقتايشالار دا وسى جەردەن ورىن العان. ءارى ولار جەكە-جەكە تۇعىرعا ورناتىلىپ, تۇعىردىڭ ورتا تۇسىنا مايداندا كوزسىز ەرلىك كورسەتكەن جاۋىنگەرلەردىڭ كەۋدەسىنە تاعىلعان «التىن جۇلدىز» مەدالدارىنىڭ ۇلكەيتىلگەن كوشىرمەلەرى ىلىنگەن.
ال كىرپىشتەن ءورىلىپ, گرانيتپەن قاپتالىپ بوي كوتەرگەن 6 قابىرعالى «داڭق اللەياسى» مونۋمەنتالدى كەشەنى ءور رۋحتى بابالاردىڭ ەرلىگىن ەسكە سالاتىن دۇنيە. بۇل جەردە جامبىل وڭىرىنەن مايدانعا اتتانعان 105 مىڭ جاۋىنگەردىڭ ەسىمدەرى تاسقا قاشالىپ جازىلعان. وتان قورعاۋعا اتتانعان باتىرلاردىڭ ەسىمدەرى ولاردىڭ سوعىسقا جىبەرىلگەن اۋداندارى بويىنشا رەتتەلگەن ەكەن. بۇدان بىلاي, وڭىرىمىزدەن وتان قورعاۋعا اتتانعان باتىرلاردىڭ ارنايى تاقتاعا جازىلعان ەسىمدەرى ەلگە ۇلاعات, ۇرپاققا ونەگە سىيلاپ تۇرادى. سونىمەن قاتار, بولاشاقتا ساياباق اۋماعىنان سوعىس جانە تىل ارداگەرلەرىنە ارنالىپ مۋزەي بوي كوتەرەتىن بولادى.
وق پەن وتتىڭ ورتاسىندا بولىپ, وتان قورعاعان ەرلەردىڭ ەرلىگىن قالاي ايتساق تا جاراسادى. ارداگەرلەردى ارداقتاپ, ولارعا قۇرمەت كورسەتۋ دە ۇرپاقتىڭ پارىزى. سوندىقتان دا بيىل جامبىلدىقتار ءۇشىن ۇلى جەڭىس كۇنىن جاڭعىرعان, جاڭارعان ساياباقتا اتاپ وتۋگە مۇمكىندىك تۋدى. بۇل ۇلى جەڭىس مەرەكەسىنە كورسەتىلگەن ۇلكەن قۇرمەت ەكەنى انىق.
حاميت ەسامان, «ەگەمەن قازاقستان»
جامبىل وبلىسى