قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ حالىق ءارتىسى يۋري پومەرانتسەۆتى قابىلدادى, دەپ حابارلايدى اقوردانىڭ ءباسپاسوز قىزمەتى.
مەملەكەت باسشىسى الماتىداعى رەزيدەنتسياسىندا وتكەن كەزدەسۋ بارىسىندا يۋري پومەرانتسەۆتىڭ قازاقستاننىڭ الەۋمەتتىك-گۋمانيتارلىق دامۋىنا زور ۇلەس قوسقانىن اتاپ ءوتىپ, ونى 95 جاسقا تولعان مەرەيتويىمەن قۇتتىقتادى.
ء«سىزدىڭ ءومىر جولىڭىزدىڭ ءوزى - ۇلكەن ەرلىك. ءسىز ءۇش جۇزدەن اسا درامالىق رولدەردى سومداپ, ون ەكى فيلمگە تۇسكەنىڭىزدەن بولەك, سوعىسقا قاتىستىڭىز. وتاندىق دراماتۋرگيا مەن كينونىڭ بارشا مويىنداعان شەبەرى ءارى ونەرىمىزدىڭ مايتالمانى بولۋمەن قاتار, ءسىز تاماشا ارتىستەردىڭ ۇلكەن شوعىرىن تاربيەلەدىڭىز جانە پەداگوگيكالىق قىزمەتىڭىزدى ءالى دە جالعاستىرىپ كەلەسىز. ءسىزدىڭ ۇزاق ءومىر ءسۇرۋىڭىزدىڭ سىرى - تىنىمسىز ەڭبەك ەتۋىڭىزدە», - دەدى قازاقستان پرەزيدەنتى.
نۇرسۇلتان نازارباەۆ يۋ.پومەرانتسەۆكە «قازاقستاننىڭ ەڭبەك ەرى» جوعارى دارەجەلى ەرەكشەلىك بەلگىسىن بەرە وتىرىپ, ونىڭ قازاقستاننىڭ حالىق ءارتىسى, مەملەكەتتىك سىيلىقتىڭ جانە «تارلان» تاۋەلسىز سىيلىعىنىڭ لاۋرەاتى, ءىى دارەجەلى وتان سوعىسى جانە ەڭبەك قىزىل تۋ وردەندەرىنىڭ كاۆالەرى, «قۇرمەت بەلگىسى», «وتان» جانە باسقا دا كوپتەگەن مەدالداردىڭ يەگەرى ەكەنىن اتاپ ءوتتى.
ء«سىزدىڭ ونەگەلى ءومىرىڭىز بەن بەلسەندى قوعامدىق قىزمەتىڭىزدى, قازاقستاننىڭ مادەنيەتىن دامىتۋعا قوسقان زور ۇلەسىڭىزدى كورەرمەندەرىڭىز بەن ونەرىڭىزگە باس يەتىن بىرنەشە ۇرپاق بىلەدى. سونى ەسكەرە وتىرىپ, سىزگە «قازاقستاننىڭ ەڭبەك ەرى» اتاعىن بەرۋ جونىندەگى جارلىققا قول قويدىم», - دەدى مەملەكەت باسشىسى.
يۋ.پومەرانتسەۆ نۇرسۇلتان نازارباەۆقا العىس بىلدىرە وتىرىپ, مۇنداي جەتىستىكتەرگە كوپ جىلعى ءارى قاجىرلى ەڭبەكتىڭ ارقاسىندا جەتكەنىن اتاپ ءوتتى.
«ەڭ جوعارى ماراپاتتى الا وتىرىپ, ونى قالاي اقتايمىن دەپ ويلاپ وتىرمىن. جۇمىس - مەنىڭ بۇكىل عۇمىرىم, مەنىڭ ءومىرىمنىڭ ءمانى. تۋعان قازاقستانىما قىزمەت ەتە بەرەمىن», - دەدى حالىق ءارتىسى.