پرەمەر-ءمينيستردىڭ ورىنباسارى اسقار جۇماعاليەۆ جۇمىس ساپارىمەن الماتىدا بولدى

ۇكىمەت باسشىسىنىڭ ورىنباسارى الدىمەن قازپوشتا قىزمەتىنىڭ الماتىدا جاڭادان اشىلعان تسيفرلى كەڭسەسىن ارالادى. مۇنداعى زاماناۋي تالاپقا ساي قۇرىلعىلار مەن كەلۋشىلەردى بارلىق اقپاراتپەن قامتاماسىز ەتە الاتىن اقىلدى روبوتتاردىڭ قىزمەتىمەن تانىستى. جاڭا كەڭسەدە سالەمدەمە جىبەرۋ, قابىلداپ الۋ, حالىققا ونلاين قىزمەت كورسەتۋ, اقشا اۋدارىمدارى مەن كولل ورتالىعىمەن بايلانىس ءتارىزدى بىرنەشە قىزمەت تۇرلەرى كورسەتىلەدى. سوڭعى ۋاقىتتارى قازپوشتاداعى تسيفرلى جۇيەلەر ادام كۇشىمەن قاتار جۇمىس ونىمدىلىگىنىڭ ارتۋىنا دا سەپتىگىن تيگىزگەن. بۇعان مىسال, جۇك تاسىمالداۋ كولەمى بۇرىنعىعا قاراعاندا 33 پايىزعا ارتقان. وعان قوسا پوشتا سالەمدەمەلەرىن اۋە تاسىمالى ارقىلى جەتكىزەتىن زاماناۋي دروندار دا جۇمىستى ءبىرشاما جەڭىلدەتىپ وتىر.

درونداردى تەستىلەۋ شاراسىنا قاتىسقان اسقار جۇماعاليەۆ: «بۇل تەحنولوگيالار «تسيفرلى قازاقستان» باعدارلاماسى اياسىندا وتە ماڭىزدى. سەبەبى, شالعايداعى تۇرعىندارعا جاڭا مەرزىمدى باسىلىمداردىڭ كۇنبە-كۇن جەتىپ تۇرعانى وتە قاجەت. اتالعان جوبانىڭ ارقاسىندا جەتكىزۋ ۋاقىتىن, جول شىعىندارىن ۇنەمدەۋگە بولادى» دەپ تىڭ جوباعا وڭ باعاسىن بەردى.

– بىلتىر الىس اۋداندارعا سالەمدەمە جەتكىزۋگە مۇمكىندىك بەرەتىن ارنايى درونداردى ىسكە قوسقان بولاتىنبىز. وسى تەحنولوگيالاردىڭ ارقاسىندا الىس اۋىلدارعا گازەت-جۋرنالدار كۇنبە-كۇن جەتكىزىلىپ تۇردى. بۇل دروندار 20 مىڭ شاقىرىمعا جۋىق قاشىقتىققا ۇشىپ ۇلگەردى. بيىلدان باستاپ بىردەن 4 كيلوعا دەيىن جۇك كوتەرە الاتىن درونداردى تەستىلەپ جاتىرمىز. ازىرگە جاڭا دروندار ءبىر باعىتتا 70 شاقىرىمعا دەيىن ۇشا الادى. قازىرگى تاڭدا الماتى, قاراعاندى, اقمالا, وقو اۋماعىنداعى 30 اۋىل سالەمدەمەلەردى درون ارقىلى الىپ وتىر. جىل سوڭىنا دەيىن 159 ەلدى مەكەندى قامتۋ جوسپاردا بار, – دەيدى «قازپوشتا» اق باسقارما توراعاسى ساكەن سارسەنوۆ.

سونداي-اق, ا. جۇماعاليەۆتىڭ باسشىلىعىمەن ە-كوممەرتسيا جانە بلوكچەين ماسەلەلەرى بويىنشا قازاقستان رەسپۋبليكاسىنىڭ ۇلتتىق بانكى, مەملەكەتتىك ورگاندار, ەكىنشى دەڭگەيدەگى بانكتەر, ۇيالى بايلانىس وپەراتورلارى وكىلدەرىنىڭ جانە ءىت قوعامداستىعى وكىلدەرىنىڭ قاتىسۋىمەن ارنايى كەڭەس ءوتتى.

وندا ۆيتسە-پرەمەر مينيسترگە «Invest Online» اتتى ەلەكتروندى ينۆەستيتسيالىق جوبا تانىستىرىلدى. جۇيەنى تانىستىرۋ كەزىندە ۇلتتىق بانك توراعاسىنىڭ ورىنباسارى جانات قۇرمانوۆ «Invest Online» ينۆەستيتسيالاۋعا ارنالعان جاڭا تەحنولوگيالىق ءونىمدى بىلدىرەتىندىگىن, ونى قۇرۋ كەزىندە «بلوكچەين» تەحنولوگياسى قولدانىلعاندىعىن اتاپ ءوتتى.

«حالىق ءۇشىن ۇلتتىق بانكتىڭ قىسقا مەرزىمدى نوتتارى شىعارىلدى جانە جۇيە ىسكە قوسىلعان ساتتەن باستاپ 59 ملن. تەڭگە سوماعا 641 مىڭ نوت ساتىپ الىندى», - دەيدى ج. قۇرمانوۆ. بۇل ءونىمدى قازاقستان رەسپۋبليكاسىنىڭ كەز كەلگەن ازاماتى پايدالانا وتىرىپ, ۇيدەن شىقپاي-اق قاشىقتان الۋ تاسىلىمەن باعالى قاعازداردى ساتىپ الا الادى. باسقوسۋ بارىسىندا مەملەكەتتىك ورگاندار دەنساۋلىق ساقتاۋ سالاسىندا ققس باسقارۋ كەزىندە ەلەكتروندىق استىق قولحاتتارى جۇيەسىندە «بلوكچەين» تەحنولوگياسىن قولدانۋ بويىنشا جوبالىق شەشىمدەردى ۇسىندى.

«بۇگىن بلوكچەين تەحنولوگياسى جانە جاساندى زەردە نەگىزىندە ازىرلەنگەن شەشىمدەر مەن جوبالار ۇسىنىلدى. بۇل امبەباپ, قولايلى تەتىكتەر, ولاردى بۇكىل قازاقستاندىقتار پايدالانا الادى. وسىنداي جوبالاردى ىسكە اسىرۋ بيزنەستى, ونلاين-ساۋدانى ىنتالاندىرادى. قازاقستاندىقتارعا كورسەتىلەتىن قىزمەتتەردىڭ مول اۋقىمى قولجەتىمدى بولادى.» - دەدى قر پرەمەر-ءمينيسترىنىڭ ورىنباسارى ا. جۇماعاليەۆ.

ارمان وكتيابر,

«ەگەمەن قازاقستان»

الماتى