«Astana Hub» حالىقارالىق IT-ستارتاپتار تەحنوپاركىندە #Garage اكسەلەراتسيالىق باعدارلاماسىنىڭ العاشقى ناتيجەسى قورىتىندىلاندى. شارا بارىسىندا ستارتاپ-كوماندالاردىڭ ءوز جوبالارى مەن ونىڭ ناتيجەسىن تانىستىرۋ ماقساتىندا «Demo Day» ءوتتى. سونىمەن بىرگە جوبالارمەن تولىعىراق تانىسۋ ءۇشىن كورەرمەندەرگە ارناپ ستارتاپ-اللەيا قويىلدى.
ء«بىزدىڭ تۇلەكتەرىمىز ءۇش اي بويى باعدارلامامەن ارنايى وقىتىلىپ, ءبىز ولارعا كەڭسەمەن قامتاماسىز ەتىپ, مەنتورلار تاۋىپ, ىسكەرلىك بايلانىس ورناتۋعا مۇمكىندىك بەردىك. بىرەۋلەرى وزدەرىنە ينۆەستيتسيا تارتقان بولسا, كەيبىرەۋەرى ساتىلىمدارىن ارتتىردى. ءۇش ايلىق باعدارلاماعا 13 جوبا تاڭداپ الىنعان بولاتىن, بىراق ونىڭ ءبارى بىردەي سوڭىنا دەيىن جەتكەن جوق. جاقسى جوبالار بار, باسقا ستارتاپتارعا ارنالعان باعدارلامالارعا اۋىسقاندارى دا بار. ال جابىلعان جوبالارعا كەلەر بولساق, بۇل ¬- قالىپتى جاعداي, سەبەبى پراكتيكادا 10 ستارتاپتىڭ بىرەۋى عانا تابىسقا جەتىپ, ءارى قاراي جۇمىس ىستەپ كەتەدى», دەدى «Astana Hub» حالىقارالىق IT-ستارتاپتار تەحنوپاركىنىڭ باسشىسى م.ماديەۆ. ونىڭ اتاپ وتۋىنشە, ىرىكتەۋ بارىسىندا ەكى جوبا جابىلعان. ستاتيستيكا بويىنشا ستارتاپتىڭ تىم بولماعاندا بىرەۋى تابىستى بولسا وتە جاقسى ەكەن. «ازىرشە, بىزدە ەكى جوبا جابىلۋ تۋرالى شەشىم قابىلدادى. ويتكەنى, ولار ءبىزدىڭ ساراپشىلارمەن جۇمىس ىستەگەن كەزدە وزدەرىنىڭ بيزنەس-مودەلدەرىنىڭ كەلەشەگى جوق ەكەنىن ءتۇسىندى», دەدى ول.
م.ماديەۆتىڭ ايتۋىنشا ەكىنشى اكسەلەراتسيالىق باعدارلاما 5 ماۋسىمدا باستالادى. مامىر ايىنىڭ سوڭىنا دەيىن وتىنىمدەر قابىلدانىپ, سولاردىڭ اراسىننان مىقتى جوبالار تاڭداپ الىنادى. ال «Astana Hub»-تىڭ العاشقى تۇلەكتەرىن ءارى قاراي قولداۋ ءۇشىن تاعى باسقا باعدارلامالار ىسكە قوسىلماق.
#Garage – بۇل ستارتاپتاردى دامىتۋعا ارنالعان 3 ايلىق باعدارلاما. مۇندا باعدارلاما قاتىسۋشىلارىنا ەكسپو اۋماعىنان كەڭسە, مەنتورلار, قاجەتتى ينفراقۇرىلىم مەن قۇراستىرۋشىلارعا پارت-تايم قاراستىرىلادى. ايتقانداي, «Astana Hub» حالىقارالىق IT-ستارتاپتار تەحنوپاركى "Garage" اتتى ستارتاپ-جوبالاردى ينكۋباتسيالاۋعا ارنالعان تەگىن باعدارلاماسىن بيىلعى جىلدىڭ اقپانىندا ىسكە قوسقان بولاتىن.
دينارا بىتىك,
«ەگەمەن قازاقستان»