پارلامەنت سەناتى قارجى جانە بيۋدجەت كوميتەتىنىڭ مۇشەلەرى اقمولا وبلىسىنداعى تسەلينوگراد اۋدانىندا بولىپ, اۋداندىق ماڭىزى بار قالا, اۋىل, كەنت, اۋىلدىق وكرۋگتەر بيۋدجەتىنىڭ ەنگىزىلۋى, سونداي-اق اگروونەركاسىپ كەشەنىن سۋبسيديالاۋ ماسەلەلەرىن تالقىلادى.
دەپۋتاتتار ماكسيموۆكا اۋىلىندا «Family Farm» جشس ءسۇت زاۋىتىنىڭ جۇمىسىمەن تانىستى. پارلامەنتشىلەر اكىمدىك عيماراتىندا جەرگىلىكتى جۇرتشىلىقپەن كەزدەستى. تسەلينوگراد اۋداندىق ەكونوميكا جانە قارجى ءبولىمىنىڭ مەڭگەرۋشىسى الميرا يبراەۆا سەناتورلارعا اۋدانداعى اۋىلدىق وكرۋگتەرگە مەملەكەتتىك بيۋدجەتتىڭ ءتورتىنشى دەڭگەيى قالاي ەنگىزىلىپ جاتقانى تۋرالى ايتىپ بەردى. اۋماقتاردىڭ دەربەستىگىن ارتتىرۋعا ارنالعان بۇل شارا مەملەكەت باسشىسىنىڭ بەس ينستيتۋتتىق رەفورماسىن ىسكە اسىرۋ جونىندەگى «100 ناقتى قادام» – ۇلت جوسپارىندا كوزدەلگەن بولاتىن.
ا. يبراەۆا ايتقانداي, تسەلينوگراد اۋدانىندا بيىلعى جىلى تۇرعىندار سانى 2 مىڭنان اساتىن ەلدى مەكەندەر بيۋدجەتتىڭ ءتورتىنشى دەڭگەيىنە ءوتتى. بۇل رەتتە اۋىلدىق وكرۋگتەر اكىمدەرىنىڭ اپپاراتىنىڭ جۇمىسى كوبەيە ءتۇستى, وسىعان بايلانىستى بايانداماشى جەرگىلىكتى ءوزىن-ءوزى باسقارۋ ورگاندارىنىڭ شتاتتىق سانىن ۇلعايتۋ تۋرالى ماسەلە قويدى. ودان باسقا, ونىڭ سوزىندە جولدارعا كۇردەلى جوندەۋ جۇرگىزۋ, ماكسيموۆكا اۋىلىنا سۋ قۇبىرىن, مادەنيەت ءۇيى مەن مونشا قۇرىلىسىن سالۋ قاجەتتىگى اتاپ ءوتىلدى.
سەناتورلار ساپارى رودينا اۋىلىندا ودان ءارى جالعاستى. وندا دەپۋتاتتار استىق تەرمينالىن, مال شارۋاشىلىعى كەشەنى مەن ءسۇت زاۋىتىنىڭ جۇمىسىمەن تانىستى. «رودينا» اگروفيرماسىنىڭ باس ديرەكتورى يۆان ساۋەر پارلامەنتشىلەرگە ءوندىرىستىڭ كورسەتكىشتەرى تۋرالى اڭگىمەلەدى. دەپۋتاتتار جەرگىلىكتى اتقارۋشى ورگاندار وكىلدەرىمەن, شارۋا قوجالىقتارى مەن اۋىل شارۋاشىلىعى مەكەمەلەرىنىڭ باسشىلارىمەن اگروونەركاسىپ كەشەنىن دامىتۋ ماسەلەلەرى تۋرالى كەڭەس وتكىزدى.