قازاقستان سىرتقى ىستەر ءمينيسترى قايرات ءابدىراحمانوۆ قىزىل كرەست جانە قىزىل جارتى اي حالىقارالىق قوعام فەدەراتسياسىنىڭ پرەزيدەنتى فرانچەسكو روككامەن كەزدەستى.
تاراپتار حالىقارالىق فەدەراتسياسىنىڭ الەمدەگى توتەنشە جاعدايلار مەن قاقتىعىستار سالدارىنىڭ الدىن الۋ, سونداي-اق قالپىنا كەلتىرۋ جۇمىستارى بويىنشا جەرگىلىكتى تۇرعىندارعا قولداۋ كورسەتۋى جونىندەگى قىزمەتى تۋرالى تالقىلادى.
ق. ءابدىراحمانوۆ سەنىمدىلىك ءۇشىن العىسىن ايتا وتىرىپ, قىزىل كرەست جانە قىزىل جارتى اي حالىقارالىق قوعام فەدەراتسياسىنىڭ 10-شى ەۋروپالىق كونفەرەنتسياسىن 2018 جىلعى 2-3 مامىردا الماتىدا وتكىزگەنى ءۇشىن ءىلتيپات ءبىلدىردى. ءساتتى وتكىزىلگەن وسى ءىس-شارا ايماقتاعى الەۋمەتتىك سالا بويىنشا حالىقارالىق ىنتىماقتاستىققا جاڭا سەرپىن بەرەتىنىن دە اتاپ ءوتتى.
مينيستر, سونداي-اق قازاقستاننىڭ اتالعان فەدەراتسيامەن, ەكىجاقتى دەڭگەيدە دە, باسقا حالىقارالىق الاڭداردا دا, سونىڭ ىشىندە پرەزيدەنت ن.ءا.نازارباەۆتىڭ سىرتقى ساياسي باستامالارىن ىسكە اسىرۋ شەڭبەرىندە ىنتىماقتاستىقتى نىعايتۋعا ءازىر ەكەنىن جەتكىزدى.
ف.روككا ءوز كەزەگىندە ماڭىزدى كونفەرەنتسيانى الماتى قالاسىندا ۇيىمداستىرۋدا كورسەتىلگەن قولداۋ ءۇشىن قازاقستانعا ريزاشىلىعىن ءبىلدىردى. بۇدان بولەك, حالىقارالىق فەدەراتسياسىنىڭ پرەزيدەنتى سيرياداعى داعدارىستى شەشۋ ءۇشىن استانادا ۇيىمداستىرىلعان كەلىسسوزدەردى جوعارى باعالادى جانە جاقىن ارادا سيريا اراب رەسپۋبليكاسىنا جاساعان ءىسساپارى قورىتىندىلارى جونىندە ءسوز قوزعادى.
كەزدەسۋ ناتيجەسىندە تاراپتار ءبىر-بىرىمەن تۇراقتى تۇردە حابارلاسا وتىرىپ, كەڭ اۋقىمدى ماسەلەلەر بويىنشا ىنتىماقتاستىقتى نىعايتۋعا كەلىستى. ايتا كەتەيىك, قىزىل كرەست جانە قىزىل جارتى اي حالىقارالىق قوعام فەدەراتسياسى 189 ۇلتتىق قوعامدى قامتيدى. بۇل ۇيىم توتەنشە جاعدايلار مەن تەحنوگەندىك اپاتتار قۇرباندارىنا, بوسقىندارعا, توتەنشە جاعدايلاردا دەنساۋلىق ساقتاۋ ورگاندارىنا قىزىل كرەست جانە قىزىل جارتى اي حالىقارالىق قوعام فەدەراتسياسى تاراپىنان كورسەتىلەتىن حالىقارالىق كومەكتى باسقارادى جانە رەتتەيدى. قىزىل كرەست جانە قىزىل جارتى اي حالىقارالىق قوعام فەدەراتسياسىنىڭ ايماقتىق وكىلى قازاقستان رەسپۋبليكاسىندا 1992 جىلدان بەرى قىزمەتىن اتقارىپ كەلەدى.
قازاقستان بۇل فەدەراتسيامەن ءوزىنىڭ بۇۇ قاۋىپسىزدىك كەڭەسىندەگى 2017-2018 جىلدارى مۇشەلىگى شەڭبەرىندە دە ءوزارا بايلانىس ورناتۋدا.