ەلباسىنىڭ تاپسىرماسى بويىنشا «نۇر وتان» پارتياسىنىڭ مۇرىندىق بولۋىمەن پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن باقىلاۋ جونىندەگى قوعامدىق كەڭەس قۇرىلدى. ونىڭ قۇرامىنا ەلىمىزدەگى جەتەكشى ساياسي پارتيالاردىڭ باسشىلارى, ۇكىمەتتىك ەمەس ۇيىمدار مەن قازاقستان حالقى اسسامبلەياسىنىڭ وكىلدەرى, بەلگىلى قوعام قايراتكەرلەرى, بەلسەندى ازاماتتار جانە ساراپشى ماماندار مۇشە بولدى. وسىعان وراي كەڭەستىڭ العاشقى وتىرىسى ءوتتى. جيىنعا ۇكىمەت باسشىسىنىڭ ورىنباسارى ە.دوساەۆ قاتىستى.
جيىندى اشقان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەلباسىنىڭ پارتياعا قازاقستان حالقى اسسامبلەياسىمەن جانە ازاماتتىق قوعام وكىلدەرىمەن بىرلەسىپ بەس الەۋمەتتىك باستامانىڭ جۇزەگە اسىرىلۋىن قوعامدىق باقىلاۋعا الۋدى تاپسىرعانىن ايتتى. سوعان بايلانىستى جاڭادان قۇرىلعان قوعامدىق كەڭەس ەلباسى باستامالارىنىڭ ۋاقتىلى ءارى ساپالى ورىندالۋىنا جالپىحالىقتىق باقىلاۋدى قامتاماسىز ەتپەك.
– قوعامدىق باقىلاۋدى جۇزەگە اسىرۋ ءۇشىن «نۇر وتان» پارتياسى ورتالىق اپپاراتتان باستاپ, ءماجىلىس پەن بارلىق دەڭگەيدەگى ماسليحاتتارداعى دەپۋتاتتىق فراكتسيالارىن, پارتيانىڭ فيليالدارى مەن باستاۋىش پارتيا ۇيىمدارىن جانە قوعامدىق قابىلداۋ بولمەلەرىن جۇمىلدىرادى. سونىمەن بىرگە ءبىز پرەزيدەنتتىڭ بەس الەۋمەتتىك باستاماسىن ۋاقتىلى ءارى ساپالى جۇزەگە اسىرۋدىڭ قازاقستاندىقتار ءۇشىن قانشالىقتى ماڭىزدى ەكەنىن ەسكەرىپ, ازاماتتىق قوعام وكىلدەرىمەن كۇش بىرىكتىرىپ جۇمىس ىستەۋىمىز كەرەك, – دەدى ماۋلەن اشىمباەۆ.
سونىمەن قاتار پارتيا توراعاسىنىڭ ءبىرىنشى ورىنباسارى «نۇر وتان» پارتياسى پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن ايرىقشا باقىلاۋعا الاتىنىن ايتىپ, ءتىپتى وسى ىستە ولقىلىق جىبەرگەن شەنەۋنىكتەر دەر كەزىندە انىقتالاتىنىن دا تىلگە تيەك ەتتى.
– ءبىز پرەزيدەنتتىڭ بەس الەۋمەتتىك باستاماسىن جۇزەگە اسىرۋدا نەمقۇرايدىلىق تانىتقان كەز كەلگەن شەنەۋنىكتى دەر كەزىندە انىقتايمىز. قاجەت بولسا «نۇر وتان» پارتياسى ونداي شەنەۋنىكتەردى جاۋاپقا تارتۋ ماسەلەسىن دە كوتەرەتىن بولادى. ءبىز ەشكىمگە ەلباسى باستامالارىن سوزبۇيدالىققا سالىپ, كەشەۋىلدەتۋگە جول بەرمەيمىز. سوندىقتان وسىعان قاتىستى مالىمەتتەردى كەڭەس مەملەكەتتىك ورگاندار, قوعامدىق بىرلەستىكتەر, ۇكىمەتتىك ەمەس ۇيىمدار, ساراپشىلار جانە قاراپايىم حالىقپەن تىعىز جۇمىس ىستەۋ ارقىلى ءتۇرلى دەرەككوزدەردەن الىپ وتىرادى. حالىق قاجەتتى اقپاراتتاردى قوعامدىق قابىلداۋ بولمەسى, پارتيانىڭ ۆەب-سايتىنداعى ارنايى «5bastama» ايدارى نەمەسە جەدەل جەلى ارقىلى حابارلاسىپ بەرە الادى. مۇنداي قادام بەس الەۋمەتتىك باستامانى جۇزەگە اسىرۋ كەزىندەگى ولقى تۇستاردى ۋاقتىلى انىقتاپ, ونى ءتيىمدى شەشۋ جولدارىن قاراستىرۋعا مۇمكىندىك بەرەدى, – دەدى ماۋلەن اشىمباەۆ.
وتىرىستا بەس الەۋمەتتىك باستامانىڭ جۇزەگە اسىرىلۋىن باقىلاۋدىڭ ءتيىمدى تەتىكتەرى مەن وسى باعىتتاعى ءوزارا ءىس-قيمىل بارىسى تالقىلاندى. كەڭەس توراعاسى بولىپ سەنات دەپۋتاتى باقىتجان جۇماعۇلوۆ تاعايىندالسا, ونىڭ جۇمىسىن ۇيىمداستىرۋدى «نۇر وتان» پارتياسى قامتاماسىز ەتەدى. ياعني, باستامالاردىڭ ءار باعىتى بويىنشا قۇرىلعان جۇمىس توبىنىڭ قىزمەتىن پارتيا حاتشىلارى ۇيلەستىرەتىن بولادى.
كەڭەستىڭ باستى مىندەتى – الەۋمەتتىك باستامالاردىڭ جۇزەگە اسىرىلۋىنا قوعامدىق مونيتورينگ جۇرگىزىپ, تۇراقتى باقىلاۋدا ۇستاۋ, باعدارلامانىڭ ورىندالۋ بارىسى تۋرالى حالىققا اقپارات بەرىپ, قاجەتتى ءتۇسىندىرۋ جۇمىستارىن ۇيىمداستىرۋ, سونداي-اق ەلباسى باستامالارىن جۇزەگە اسىرۋ كەزىندەگى ماسەلەلەردى انىقتاپ, ءتيىستى مەملەكەتتىك ورگاندارعا ولاردى شەشۋ جولدارىن ۇسىنۋ.
جيىن بارىسىندا ورتالىق جانە جەرگىلىكتى مەملەكەتتىك ورگانداردىڭ جەتەكشىلەرى ءسوز الىپ, بەس الەۋمەتتىك باستامانى جۇزەگە اسىرۋداعى بۇگىنگى احۋال جايىندا جانە باعدارلامانىڭ ورىندالۋىن باقىلاۋ جونىندەگى ارنايى مونيتورينگتىك توپ قۇرۋ بارىسىن ايتىپ بەردى. اتاپ ايتقاندا, وسى باعىتتاعى ۇكىمەت جۇمىسى تۋرالى ۇلتتىق ەكونوميكا ءمينيسترى تيمۋر سۇلەيمەنوۆ بايانداما جاسادى. ال ۇلتتىق بانك توراعاسىنىڭ ورىنباسارى ولەگ سمولياكوۆ «7 – 20 – 25» جاڭا تۇرعىن ءۇي باعدارلاماسىنىڭ تەتىكتەرى مەن شاعىن نەسيە بەرۋ ماسەلەسىنە توقتالىپ ءوتتى. ءوز كەزەگىندە قازاقستان جوعارى وقۋ ورىندارى قاۋىمداستىعىنىڭ پرەزيدەنتى, «تۇران» ۋنيۆەرسيتەتىنىڭ رەكتورى راحمان الشانوۆ ستۋدەنت جاتاقحانالارىنىڭ قۇرىلىسى مەن قوسىمشا بولىنگەن 20 مىڭ ءبىلىم گرانتى جايىندا ءسوز قوزعادى. وتىرىستا ساياسي پارتيا مەن قوعامدىق بىرلەستىك وكىلدەرى دە ءسوز الىپ, ءوز ويلارىمەن ءبولىستى.
سەرىك ابدىبەك, «ەگەمەن قازاقستان»