«نۇرسۇلتان نازارباەۆتىڭ ءبىلىم قورى» قوعامدىق قورىنىڭ اياسىندا 2011 جىلى قۇرىلعان «ارىستان» مامانداندىرىلعان ليتسەيىندە ەلىمىزدىڭ بارلىق وڭىرلەرىنەن كەلگەن 9-11-سىنىپتا وقيتىن 240 ءجاسوسپىرىم تەگىن ءبىلىم الۋدا.
ليتسەي بۇگىندە زاماناۋي وقۋ-ماتەريالدىق بازاسىمەن جابدىقتالعان. مۇندا مۇعالىمدەرگە ارنالعان تۇرعىن ۇيلەر, سپورتتىق جاتتىعۋ كەشەندەرى, مۋلتيمەديا ورتالىعى مەن جيىرما مىڭنان استام كىتاپتان تۇراتىن كىتاپحانا قورى بار.
پرەزيدەنت ن.ءا.نازارباەۆ 2013 جىلى ءساۋىر ايىندا كەلگەن ساپارىندا «ارىستان» ليتسەيىنە جوعارى باعا بەرىپ, ءبىلىم الۋشىلار ەلىمىزدىڭ قورعانىس كۇشتەرىنىڭ قۇرىلىمدارىندا ابىرويمەن قىزمەت ەتەتىندەرىنە زور سەنىم بىلدىرگەن بولاتىن.
«ارىستان» ليتسەيىندەگى سالتاناتتى كۇندەردىڭ ءبىرى – ليتسەي كۇنى. 2011 جىلعى 24 ءساۋىر «نۇرسۇلتان نازارباەۆتىڭ ءبىلىم قورى» قوعامدىق قورىنىڭ ديرەكتورى د.ن.ق ۇلىباەۆا اتالعان وقۋ ورنىنىڭ باستىعى, زاپاستاعى گەنەرال-مايور س.س.تاۋلانوۆقا ليتسەي تۋىن تابىستاعان كۇن. مىنە, وسى ساتتەن باستاپ ليتسەي وقۋشىلارى بۇل كۇندى سالتاناتتى جاعدايدا اتاپ كەلەدى.
بيىل «ارىستان» ليتسەيىنىڭ قۇرىلعانىنا جەتى جىل تولىپ وتىر. وسى ۋاقىت ارالىعىندا ليتسەي بەس مارتە تۇلەكتەرىن ۇلكەن ومىرگە قانات قاقتىردى. ال جىلداعى ءداستۇر بويىنشا 9-سىنىپ وقۋشىلارىنىڭ انت قابىلداۋ سالتاناتىنا «نۇرسۇلتان نازارباەۆتىڭ ءبىلىم قورى» قوعامدىق قورىنىڭ باسشىلىعى, قازاقستان قارۋلى كۇشتەرىنىڭ باس شتابى باستىعىنىڭ ورىنباسارى م.ك.تالاسوۆ, تالعار اۋدانىنىڭ اكىمى ر.ا.ساتباەۆ, ت.ب. قاتىستى.
ەلۆيرا سەرىكقىزى, «ەگەمەن قازاقستان»
الماتى