ىشكى ىستەر مينيسترلىگىنىڭ ۆەدومستۆولىق پورتالىندا جەڭىس كۇنى قارساڭىندا « ۇلى وتان سوعىسىنىڭ اسكەري تۇتقىندارى» اتتى سەرۆيس اشىلدى. وعان ۇلى وتان سوعىسى كەزىندە تۇتقىنعا تۇسكەن بۇرىنعى اسكەري تۇتقىندار جانە گەرمانيادان قايتا ورالعان بۇرىنعى كسرو ازاماتتارى تۋرالى اقپارات ورنالاستىرىلعان.
سونىمەن قاتار « ۇلى وتان سوعىسىنىڭ اسكەري تۇتقىندارى» بازاسىنا سوعىس كەزىندە تۇتقىنعا تۇسكەن كەڭەس وداعى سولداتتارىنىڭ فيلتراتسيالىق ىستەرىنەن جانە تروفەيلىك كارتوچكالارىنان الىنعان مالىمەتتەر قوسىلعان. سونداي-اق اتالعان بازادا ەكىنشى دۇنيەجۇزىلىك سوعىستىڭ 60 مىڭنان اسا اسكەري تۇتقىنىنا قاتىستى اقپارات بار, ولاردىڭ باسىم بولىگى نەمىس تۇتقىنىندا قايتىس بولعان.
« ۇلى وتان سوعىسىنىڭ اسكەري تۇتقىندارى» سەرۆيسىنە اسكەري تۇتقىندار تۋرالى مىناداي دەرەكتەر قوسىلعان: ولاردىڭ تەگى, اتى, اكەسىنىڭ اتى, تۋعان جىلى, ۇلتى, تۋعان جەرى (رەسپۋبليكا, وبلىس, قالا, اۋىل), سوعىسقا دەيىن تۇرعان جەرى, جۇمىس ورنى جانە لاۋازىمى, اسكەري اتاعى, قاشان جانە قايدان شاقىرىلدى, اسكەري ءبولىمنىڭ اتاۋى جانە لاۋازىمى, تۇتقىنعا الۋ ۋاقىتى مەن جەرى, تۇتقىندا بولعان جەرى, مۇراعاتتىق ءىس ءنومىرى.
اسكەري تۇتقىندار تۋرالى مالىمەت الۋ تۇتقىندا قايتىس بولعانداردىڭ تۋىسقاندارى ءۇشىن ماڭىزدى اقپارات بولىپ تابىلادى. سونىمەن قاتار مۇنداي تاريحي دەرەكتەر ۇلى وتان سوعىسى تاريحىن تولىقتىرۋ ءۇشىن تاريحشىلارعا, ولكەتانۋشىلارعا, جۋرناليستەرگە قاجەت.
ءىىم پورتالىنداعى « ۇلى وتان سوعىسىنىڭ اسكەري تۇتقىندارى» سەرۆيسى ءبىزدىڭ رەسپۋبليكانىڭ عانا ەمەس, سونداي-اق تاياۋ جانە الىس شەتەلدىڭ ازاماتتارى ءۇشىن دە پايدالى بولماق.
اسكەري تۇتقىنداردىڭ تسيفرلانعان دەرەكتەر بازاسىن قۇرۋ, ونى جاريالاۋ تاريحي ادىلەتتىلىكتى قالپىنا كەلتىرۋدەگى يگى ءىس بولىپ تابىلادى.