وبلىستىق فەستيۆال بۇل جولى استانا قالاسىنىڭ 20 جىلدىعىنا ارنالدى. بۇل كونكۋرس تۇراقتى تۇردە سەمەيدە وتكىزىلىپ كەلەدى. ونىڭ ۇيىمداستىرۋشىلارى – شىعىس قازاقستان وبلىستىق بالەت مەكتەبى, سەمەي قالالىق اكىمشىلىگى مەن قالالىق دوستىق ءۇيى.
– وبلىستىڭ جاستارى مەن بالالارى اراسىنداعى حالىقتىق بيلەردى ناسيحاتتاۋ ءبىزدىڭ باستى ماقساتىمىز بولىپ تابىلادى, – دەدى بالەت مەكتەبىنىڭ ديرەكتورى كاميليا يسمايلوۆا. – بايقاۋدا 32 بي ءتۇرى ۇسىنىلدى. وعان 7-18 جاس ارالىعىنداعى 500 بالا قاتىستى. ۇيعىر, وزبەك, قازاق, يسپان بيلەرى جارقىراي كورىندى. №6 بالاباقشاداعى بالدىرعاندار توبىنىڭ «لەزگينكا» ءبيى ەلدى ەرىكسىز ەلىكتىردى. كۋرچاتوۆ قالاسىنىڭ №3 مەكتەپ ۇجىمى ورىنداعان «ورىس ءبيى» دە تارتىمدى شىقتى. باس بايگەنى وسى كۋرچاتوۆ قالاسىنان كەلگەن «فانتازيا» ۇجىمى جەڭىپ الدى. قازىلار القاسى زينايدا ماتۆيەنكونىڭ جەتەكشىلىگىمەن قويىلعان بيلەردى جوعارى باعالادى.
راۋشان نۇعمانبەك, جۋرناليست
سەمەي
سۋرەتتى تۇسىرگەن اۆتور