وسىدان ەكى جىل ۋاقىت بۇرىن «اۋليەاتا» حالىقارالىق اۋەجايىنان S7 Airlines اۋەكومپانياسىنىڭ «ماسكەۋ – تاراز – ماسكەۋ» باعىتىنداعى العاشقى ۇشاعى ۇشقان بولاتىن. الايدا ءتۇرلى سەبەپتەرمەن كوپ ۋاقىت وتپەي جاتىپ قوس شاھار اراسىنداعى اۋە قاتىناسى توقتاتىلعان ەدى.
جۋىردا عانا «اۋليەاتا» حالىقارالىق اۋەجايىندا «ماسكەۋ – تاراز – ماسكەۋ» باعىتىنداعى حالىقارالىق رەيس قايتادان ىسكە قوسىلدى. ەندى بۇدان بىلاي جولاۋشىلار تاراز قالاسىنان ماسكەۋ قالاسىنا دۇيسەنبى سايىن جۇيەلى تۇردە ۇشا الاتىن بولادى. حالىقارالىق رەيستى قايتادان S7 Airlines اۋەكومپانياسى ىسكە قوسىپ وتىر. ال «اۋليەاتا» حالىقارالىق اۋەجايىنىڭ پيار-مەنەدجەرى يۋليا ەگوروۆانىڭ ايتۋىنشا, بولاشاقتا تاراز بەن ماسكەۋ اراسىنداعى اپتالىق رەيس سانى جيىلەۋى دە مۇمكىن. دەگەنمەن, بۇل ۇسىنىس ءالى دە تالقىلانۋ ۇستىندە ەكەن. سونىمەن قاتار, ماۋسىم بويىنشا جۇمىس ىستەيتىن تاراز بەن ماسكەۋ باعىتىنداعى اۋە بيلەتتەرىنىڭ باعاسى 40 مىڭ تەڭگەدەن باستالادى.
«ماسكەۋ – تاراز – ماسكەۋ» باعىتىنداعى حالىقارالىق رەيستىڭ ىسكە قوسىلۋ سالتاناتىنا وراي, تارازدىقتار «اۋليەاتا» اۋەجايىنان ماسكەۋدەن كەلگەن 160 جولاۋشىنى قارسى الدى. ەندى كەلەشەكتە تاراز قالاسىنان رەسەيدىڭ سانكت-پەتەربۋرگ, سونداي-اق ەلىمىزدىڭ اقتاۋ جانە اتىراۋ قالالارىنا تىكەلەي ۇشۋ باعىتتارىنىڭ مۇمكىندىكتەرى قاراستىرىلۋدا.
حاميت ەسامان,
«ەگەمەن قازاقستان»
جامبىل وبلىسى