اسكەري شەرۋگە دايىندىق دەڭگەيى جوعارى

عاسىرلار بويى قالىپتاسقان جاۋىنگەرلىك رۋح, ءورشىل ماقسات تاۋەلسىزدىك بەدەرىندە سالتانات قۇردى. ال تاۋەلسىز ەل تاريحىنداعى 7 مامىر – وتان قورعاۋشىلار كۇنى قازاق ۇلتى ءۇشىن قاشاندا ەرەكشە ماڭىزعا يە.

اسىرەسە جاستارعا پاتريوتتىق رۋح بەرۋدە ءباسى جوعارى. بۇل كۇنى ايرىقشا سالتاناتپەن وتەتىن رەسپۋبليكالىق اسكەري پارادتىڭ قازاقستان رەسپۋبليكاسىنىڭ قارۋلى كۇشتەرىنىڭ الەۋەتىن كورسەتەدى.

بيىل قۇرىلعانىنا 26 جىل تولىپ وتىرعان قارۋلى كۇشتەرىمىزدىڭ ايبىنى اسقاقتاپ, مەرەيى ارتۋدا. جىل سايىن ەلىمىزدە ءوتىپ كەلە جاتقان اسكەري شەرۋ حالقىمىزدىڭ جاۋىنگەرلىگىن, باتىرلىعىن ايعاقتاي تۇسەتىن ايرىقشا سالتانات. استانا قالاسىندا وتكەن اي­رىق­شا سالتاناتتىڭ لەبى ەگەمەندىكتىڭ رۋ­حىن, تاۋەلسىزدىكتىڭ تاريحىن ءاردايىم تا­نىتىپ كەلەدى. وسى ورايدا ايتۋلى شارانى بيىل جامبىل جەرىندە وت­كىزۋ جوسپارلانعان. بۇگىنگى تاڭدا «ماتى­بۇلاق» پوليگونىندا وتەتىن اسكەري پا­راد­قا دايىندىق دەڭگەيى جوعارى. سال­تاناتتى شارانىڭ تالاپقا ساي وتۋىنە ەلىمىز بويىنشا بارشا اسكەري قۇرى­لىم­دار جۇمىلىپ, ەل ايبىنىن اسىرۋ ماق­ساتىندا بىرلەسە جۇمىس اتقارۋدا. قا­­زاق ەلىنىڭ بىرلىگى مەن ىنتىماعىن تا­نى­­تاتىن, قايسارلىعى مەن ەرلىگىن ايگى­لەي­­­تىن شارانىڭ ەل تاريحىنداعى ورىنى ەرەك­­شە.

جالپى, تاۋەلسىز ەلىمىزدىڭ تاريحىندا ءوتىپ كەلگەن اسكەري شەرۋلەردىڭ وزىن­دىك ەرەكشەلىكتەرى قالىپتاسقان. ال جام­بىل وبلىسىنىڭ قورداي اۋدانىندا وتكەلى وتىرعان اسكەري شەرۋگە تارتىلعان جەكە قۇرام مەن اسكەري تەحنيكانىڭ سانى جونىنەن دە بيىل وزگەشە سيپات الۋ­دا. ماسەلەن, «ماتىبۇلاق» پوليگونىندا جاياۋ اسكەر مەن پارادتىق ەسەپتوپ قۇرامىندا شامامەن 3000-نان اسا جاۋ­ىنگەر سالتاناتتى مارشپەن ادىمداپ وتە­تىن بولادى.

بۇدان وزگە, شەرۋگە ەلىمىزدىڭ قورعانىس ونەركاسىبىنىڭ قۋاتىن ءدۇيىم جۇرتقا ايگىلەيتىن 300 تەحنيكا مەن اۋە قورعانىس كۇشتەرىنىڭ 30 بىرلىك اۆياتسيالىق ۇشاق­تارى قاتىسقالى وتىر. جامبىل وڭى­رىندە وتەتىن اسكەري شەرۋ كەزىندە قازاق­ستان­دىقتار العاش رەت بيىلعى جانە وتكەن جىلدارى قورعانىسىمىزدىڭ ارسەنالىن تولىقتىرعان جاڭا اسكەري تەحنيكالار مەن زاماناۋي قارۋ-جاراق ۇلگىلەرىن دە تاماشالاي الادى.

– بيىلعى جىلى قورداي اۋدانىنىڭ گۆاردەيسك اسكەري گارنيزونىندا جاۋ­ىن­گەرلىك پاراد وتكىزۋ جوسپار­لا­نىپ وتىر. اسىرەسە جاستارعا پات­ري­وتتىق تاربيە بەرۋدە بۇل سالتانات­تى شارانىڭ ماڭىزى ەرەكشە. ءارى شە­رۋ بارىسىندا ەلىمىزدىڭ قورعانىس سالا­سى­نىڭ مۇمكىندىگىنىڭ جوعارى ەكەنىن دە تا­ما­شالاۋعا بولادى. ماسەلەن «وڭ­تۇستىك» وڭىرلىك قولباسشىلىعىنا قا­راستى قورداي اۋدانىنداعى 40 وتار اس­كەري بازاسىندا تانك, ارتيللەريا بريگادالارى جۇمىس ىستەيدى. مۇندا جاۋىنگەرلىك دايىندىق تا ايرىقشا ادىسپەن جوعارى دەڭگەيدە وتەدى. ال بيىل وتان قورعاۋشىلار كۇنىنە جوسپارلانىپ وتىرعان اسكەري شەرۋگە قولباسشىلىقتان 800-گە جۋىق اسكەري ازامات پەن 150-گە تارتا تەحنيكا قاتىستىرىلادى دەپ جوسپارلانۋدا, – دەيدى «وڭتۇستىك» وڭىرلىك قولباسشىلىعى شتاب باستىعىنىڭ ورىنباسارى, پودپولكوۆنيك امان تاجيەۆ.

بۇگىندە «ماتىبۇلاق» پوليگونىندا وتان قورعاۋشىلار كۇنىنە وراي وتەتىن اس­كەري شەرۋگە دايىندىق جۇمىستارى قى­زۋ جۇرگىزىلۋدە. ەلىمىزدىڭ قورعانىس سا­لاسىنىڭ قايراتىن تانىتىپ, قۋاتىن كور­سەتەتىن سالتاناتتى شارانىڭ وبلىس ءۇشىن عانا ەمەس, ەلىمىز ءۇشىن دە ماڭىزى زور.

حاميت ەسامان,

«ەگەمەن قازاقستان»

جامبىل وبلىسى