بەيبىتشىلىك جانە كەلىسىم سارايىندا ءداستۇرلى «جاستار جالىنى – 2018» شىعارماشىلىق جاستار فەستيۆالىنىڭ جابىلۋ سالتاناتىنا ارنالعان گالا-كونتسەرتى ءوتتى, دەپ حابارلايدى استانا قالاسى اكىمدىگىنىڭ رەسمي سايتى.
فەستيۆال استانا قالاسى اكىمدىگىنىڭ باستاماسىمەن جىل سايىن ءداستۇرلى تۇردە وتكىزىلىپ كەلەدى. اتالمىش شارا بيىلعى جىلى استانا قالاسىنىڭ قوعامدى دامۋ ىستەرى باسقارماسىنىڭ ۇيىمداستىرۋىمەن ەلىمىزدىڭ ەلورداسى – استانا قالاسىنىڭ 20 جىلدىق مەرەيتويى اياسىندا وتكىزىلىپ وتىر.
جىل سايىن شىعارماشىل جاستار اراسىندا جاڭا ەسىمدەر مەن تالانتتاردىڭ جۇلدىزىن جاعاتىن «جاستار جالىنى» فەستيۆالى وسى جىلدىڭ 23-29 ءساۋىر ارالىعىندا وتكىزىلدى. ەلوردانىڭ جوعارى وقۋ ورىندارىنىڭ ەڭ تالانتتى ستۋدەنتتەرى «ۆوكال», «تەاتر», «پوەزيا», «حالىق ءبيى», «زاماناۋي بي», «جاستار قۋاتى», «جۇزدەن جۇيرىك», «ۇلتتىق اسپاپتار», «مەديا», «فوتو» اتالىمدار بويىنشا ءوزارا باق سىناستى.
«فەستيۆال جىل سايىن جاستارعا ۇلكەن ساحناعا جول اشۋدا. وسى شاراعا استانانمىزداعى 14 جوعارى وقۋ ورنىنىڭ ستۋدەنتتەرى قاتىسقان فەستيۆالدىڭ بيىلعى گران-ءپريى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنە بۇيىردى», - دەدى قوعامدىق دامۋ ىستەرى باسقارماسىنىڭ جاستارمەن جۇمىس ءبولىمىنىڭ باسشىسى باقىتجان جۇنىسبەكوۆ.
قازىلار القاسى قۇرامىندا حالىقارالىق كونكۋرستاردىڭ لاۋرەاتى انەل ماراباەۆا, سپورتتىق بيدەن وليمپيادا چەمپيونى ايدانا بەگلەنوۆا, قر-نىڭ مادەنيەت قايراتكەرى نۇرلان بەكەنوۆ جانە ت. ب. بولدى.
ەۋرازيا ۇلتتىق ۋنيۆەرسيتەتىنىڭ ستۋدەنتتەرى بىرنەشە «ۆوكال», «تەاتر», «حالىق ءبيى», «ۇلتتىق اسپاپتار» اتالىمدارى بويىنشا ۇزدىك دەپ تانىلدى.
«جاستار قۋاتى» اتالىمى بويىنشا س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتتەرى جەڭىسكە جەتسە, «استانا» مەديتسينا ۋنيۆەرسيتەتىنىڭ كومانداسى «مەديا» اتالىمى بويىنشا ۇزدىك دەپ تانىلدى. ال ەۋرازيا گۋمانيتارلىق ينستيتۋتىنىڭ قۇراما كومانداسى «فوتو» اتالىمى بويىنشا ۇزدىك شىقتى.
فەستيۆالدىڭ جابىلۋ سالتاناتىنا استانا قالاسىنىڭ باسشىلىعى, پارلامەنت جانە قالالالىق ءماسليحات دەپۋتاتتارى, ونەر جانە مادەنيەت قايراتكەرلەرى, جاستار ۇيىمدارىنىڭ كوشباسشىلارى, جوعارى وقۋ ورىندارىنىڭ وقىتۋشىلارى قاتىستى.
جەڭىمپاز كوماندالار جانە جۇمىستارى ەڭ ۇزدىك تانىلعان جاستار باعالى سىيلىقتارمەن جانە العىس حاتتارمەن ماراپاتتالدى.