1 مامىر - قازاقستان حالقىنىڭ بىرلىگى كۇنى ەلىمىزدە اتاۋلى مەرەكەلەردىڭ ءبىرى. وسى كۇنى قالامىز مادەني, ويىن-ساۋىق جانە سپورتتىق ءىس-شارالار ورتالىعىنا اينالادى, دەپ حابارلايدى استانا قالاسى اكىمدىگىنىڭ رەسمي سايتى.
مەرەكە كۇنى استانا قالاسى اكىمدىگىنىڭ «ناز» مەملەكەتتىك بي تەاترى قازاقستاندا تۇراتىن بارلىق ۇلت وكىلدەرىنىڭ بىرەگەي ۇلتتىق بيلەرىن ۇسىنادى. شارا «تاۋەلسىزدىك» الاڭىندا ساعات 11.00-دەباستالادى.
كونتسەرتتىك باعدارلامانى «قازاق ەلى» مونۋمەنتىنىڭ الدىنداعى الاڭدا ساعات 12:00-دە تۇركيالىق حورىنىڭ «مەرەكە ءانى» ءان كەشى جالعاستىرادى. ەرلەر ۇجىمىمەن بىرگە ساحنا تورىندە تۇركيالىق SOPRANO ايەلدەر توبى ونەر كورسەتپەك.
ودان باسقا «قازاق ەلى» مونۋمەنتىنىڭ الدىنداعى الاڭدا قازاق كۇرەسى, ارقان تارتىس, اسىق اتۋ, گىر تاسىن كوتەرۋ جانە قول كۇرەس سىندى ۇلتتىق سپورت تۇرلەرىنەن جارىستار وتكىزىلەدى.
وسى كۇنى ساعات 13:00-دە «بايتەرەك» مونۋمەنتىنىڭ الدىنداعى الاڭدا «دوستىق شەرۋى» اتتى ۆەلوشەرۋ باستالاد ى. شارا ەلوردادا ۆەلوسيپەد تەبۋ ماۋسىمىن رەسمي اشادى. سونىمەن قاتار, ساعات 15:00-دە دومبىراشىلاردىڭ ورىنداۋىندا « ۇلى دالا ءۇنى» اتتى فلەشموب ۇيىمداستىرىلادى. شارا بارىسىندا 500 ادام قۇرمانعازىنىڭ ايگىلى «سارىارقا» كۇيىن كوپشىلىك نازارىنا ۇسىنادى.
1 مامىر مەرەكەسىنە وراي بەيبىتشىلىك جانە كەلىسىم سارايىندا «التىن باتىر» ستەپ-توبى ءوز كورەرمەندەرىن قۋانتپاق. ال قۋىرشاق تەاترى ءوز كورەرمەندەرىنە «ۆمەستە مى ودنا سترانا» اتتى قۋىرشاقتار كونتسەرتىن ۇسىنادى. م.گوركي اتىنداعى مەملەكەتتىك اكادەميالىق ورىس دراما تەاترىندا «زولوتوي تسىپلەنوك» سپەكتاكلىنىڭ, ال ق.قۋانىشباەۆ اتىنداعى قازاق تەاترىندا «قىزىل الما» كومەدياسىنىڭ تۇساۋكەسەرى وتەدى.
سونىمەن قاتار, ەرتەڭ استانا تۇرعىندارى مەن قوناقتارى «Red Bus» اۆتوبۋستارىمەن استانانىڭ سول جاعالاۋىمەن تەگىن ەكسكۋرسياعا قاتىسۋ مۇمكىندىگىنە يە بولادى. ەكسكۋرسيا «AiLand» (وكەاناريۋم) كوڭىل-كوتەرۋ ورتالىعىنان جانە «MEGA Silkway» ساۋدا ويىن-ساۋىق ورتالىعىنان باستالادى.
بۇدان باسقا, قالانىڭ كىتاپحانالارىندا, مۋزەيلەرىندە, تەاترلارىندا جانە باسقا دا مادەنيەت مەكەمەلەرىندە بىرلىك پەن دوستىق مەرەكەسىنە ارنالعان تاقىرىپتىق كورمەلەر, سپەكتاكلدەر مەن كونتسەرتتەر وتكىزىلەدى.
2 مامىر كۇنى ساكەن سەيفۋللين مۋزەيىنىڭ ۇجىمى قالالىق مادەنيەت ورتالىقتارىنىڭ وكىلدەرىمەن «باقىت مەكەنى – استانا» تاقىرىبىندا كەزدەسۋ وتكىزەدى.
وسى كۇنى ساعات 19.00-دە ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى «ابىلاي حاننىڭ ارمانى» اتتى تاريحي دراماسىن كورەرمەن نازارىنا ۇسىنادى.
3 مامىر كۇنى استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ قازاق وركەسترى كورنەكتى قازاق كومپوزيتورى, كۇيشى تولەگەن مومبەكوۆتىڭ ءجۇز جىلدىعىنا وراي «سالتانات» اتتى كونتسەرت ۇسىنادى. كەش «استانا» كونتسەرت زالىندا ساعات 19:00-دە باستالادى.