«مەن بالا كەزىمنەن ءوزىمنىڭ جەكە كورمەمدى وتكىزۋدى ارماندادىم. مىنە, ەندى سول ارمانىما جەتتىم. مەنى ءاردايىم قولداپ جۇرەتىن اناما العىسىمدى بىلدىرگىم كەلەدى. مۇراجاي اكىمشىلىگىنە جانە كەلگەن قوناقتاردىڭ بارلىعىنا راقمەت ايتامىن», دەدى سۋرەتشى ەركەبۇلان مولدابەكوۆ.
تاياۋدا قاراعاندى وبلىستىق بەينەلەۋ ونەرى مۇراجايىندا جاس سۋرەتشىنىڭ جەكە كورمەسى وتكەن بولاتىن. كورمەدە ءتۇرلى جانرلاردا ورىندالعان 30 تۋىندى كورەرمەن نازارىنا ۇسىنىلدى. كەلۋشىلەر مۇندا ديزاينەرلىك پاننو, اكۆارەلدى پورترەتتەر, تابيعات تاقىرىبىندا سالىنعان كوركەم تۋىندىلار سەرياسىن, سونداي-اق اۆتورلىق كاريكاتۋرالاردى تاماشالاي الدى.
– «ويانۋ» دەگەن ليريكالىق اتاۋى بار كورمە – ءبىزدىڭ «جاڭا ەسىمدەر» جوبامىزداعى ءتورتىنشى كورمە, – دەيدى شارا جەتەكشىسى, وبلىستىق بەينەلەۋ ونەرى مۇراجايىنىڭ عىلىمي قىزمەتكەرى ۆيكتوريا حراپكو. – اۆتور سۋرەتتەرىن الدىن الا قارىنداشپەن سىزىپ الماستان, بىردەن سالادى. ول دەگەنىمىز, سۋرەتشىنىڭ كورۋ قابىلەتى تاماشا جانە گرافيك رەتىندە مىقتى مامان ەكەنىن كورسەتەدى.
ەركەبۇلان – «ارت حەلپ» جاستار شىعارماشىلىق بىرلەستىگىنىڭ مۇشەسى. بۇل قايىرىمدىلىق ۇيىمىنىڭ قۇرامىندا قازاقستاننىڭ 16 قالاسىنىڭ 30-دان استام جاس سۋرەتشىسى بار. بىرلەستىك مۇشەلەرى ءوز كارتينالارىن ساتىپ, تاپقان قاراجاتتى اۋىر دەرتكە شالدىققان بالالار قورىنا اۋدارادى.
ەركەبۇلان مولدابەكوۆتىڭ بۇل العاشقى جەكە كورمەسىن قايىرىمدىلىق ساۋدا-كورمەسى دەپ تە اتاۋعا بولادى. سۋرەتشىنىڭ كارتينالارى 1500 تەڭگەدەن 50 000 تەڭگە ارالىعىندا باعالاندى. ەڭ قىمبات تۋىندى – بوكسشى گەننادي گولوۆكيننىڭ قولى قويىلعان پورترەت بولدى. سۋرەتتەردى ساتۋدان تۇسكەن قاراجاتتى اۆتور ارۋجان سايننىڭ قايىرىمدىلىق قورىنا اۋدارۋدى جوسپارلاپ وتىر.
قايرات ءابىلدا,
«ەگەمەن قازاقستان»
قاراعاندى