«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ پارتيا قىزمەتىن جاڭعىرتۋ جۇمىستارىنا بايلانىستى كەڭەيتىلگەن وتىرىس وتكىزدى. پارتيانىڭ ورتالىق اپپاراتىندا ۇيىمداستىرىلعان جيىنعا ۇيىمنىڭ وبلىستىق فيليال توراعالارىنىڭ ءبىرىنشى ورىنباسارلارى, وبلىس اكىمدەرىنىڭ ورىنباسارلارى, «اتامەكەن» ۇلتتىق كاسىپكەرلەر پالاتاسىنىڭ باسشىلىعى جانە ۇكىمەتتىك ەمەس ۇيىم مەن بيزنەس قاۋىمداستىق وكىلدەرى قاتىستى.
وتىرىستا م.اشىمباەۆ ەلباسىنىڭ پارتيا قىزمەتىن جاڭعىرتۋ جونىندەگى تاپسىرماسى بويىنشا قولعا الىنعان پارتيالىق جوبالارعا كەڭىنەن توقتالدى.
ايتا كەتەيىك, پارتيا جۇمىسىن تىڭعىلىقتى ساراپتاۋدىڭ جانە حالىق تاراپىنان كەلىپ تۇسكەن ۇسىنىستاردىڭ ناتيجەسىندە 20-دان استام پارتيالىق جوبا دايىندالدى. ولاردىڭ قاتارىندا جۇمىسى قايتا جانداندىرىلعان «ارداگەرلەردى ارداقتايىق» جانە «كەدەرگىسىز كەلەشەك» اتتى ەكى جوبا دا بار.
جيىندى اشقان «نۇر وتان» پارتياسى توراعاسىنىڭ ءبىرىنشى ورىنباسارى اتالعان تىڭ باستامالاردىڭ باسىم باعىتتارىن ءسوز ەتتى. ونىڭ ايتۋىنشا, جاڭا پارتيالىق جوبالار ۇيىمعا دەگەن سەنىمدى كۇشەيتۋگە, ەلىمىزدەگى ستراتەگيالىق باعدارلامالىق قۇجاتتاردى جۇزەگە اسىرۋعا جۇيەلى تۇردە قاتىسۋعا, بىلىكتى كادرلار توبىن قالىپتاستىرۋعا جانە پارتيا قىزمەتىن جاڭعىرتىپ, ونىڭ جۇمىسىنا زاماناۋي تەحنولوگيالاردى قولدانۋعا باعىتتالعان.
پارتيا توراعاسىنىڭ ءبىرىنشى ورىنباسارى جاڭا جوبالاردىڭ بارلىعى ەلباسىنىڭ پارتيا قىزمەتىن جاڭعىرتۋ جونىندەگى ناقتى تاپسىرماسى بويىنشا دايىندالعانىن اتاپ ءوتتى. سونىڭ ناتيجەسىندە الداعى ۋاقىتتا «نۇر وتان» پارتياسىندا العاش رەت جوبالىق مەنەدجمەنت تاجىريبەسى قولدانىلماق. بۇل تاجىريبەنىڭ الەمدىك دەڭگەيدە اياسى كەڭ. سول ارقىلى پارتيانىڭ ورتالىق اپپاراتى مەن بارلىق فيليالدارىنىڭ جۇمىسى جۇيەلەنەتىن بولادى. ءوز سوزىندە م.اشىمباەۆ نۇروتاندىقتار اتالعان باستامالاردى دەرەۋ جۇزەگە اسىرىپ قانا قويماي, كوپ ۇزاماي ولاردىڭ ناتيجەسىن دە كورسەتۋى كەرەكتىگىن ايتتى. سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى «تسيفرلى قازاقستان» باعدارلاماسى اياسىندا قولعا الىنعان جوبالارعا دا ەرەكشە نازار اۋداردى.
جيىندا شاعىن جانە ورتا بيزنەستى قولداۋعا باعىتتالعان باستامالاردى جۇزەگە اسىرۋدىڭ ءتيىمدى تەتىكتەرى دە ءسوز بولدى. اتاپ ايتقاندا, «نۇر وتان» بىرىڭعاي گەواقپاراتتىق ونلاين-قىزمەت كورسەتەتىن پورتال قۇرۋدى جوسپارلاپ وتىر. سول ارقىلى قازاقستاندىق كاسىپكەرلەر ساتىلاتىن نەمەسە جالعا بەرىلەتىن كوممەرتسيالىق ماقساتتاعى جەر تەلىمدەرى تۋرالى جان-جاقتى مالىمەتتەرگە قول جەتكىزبەك.
مەكتەپ اسحانالارى مەن سپورت الاڭدارىنىڭ جۇمىسى دا پارتيا نازارىنان تىس قالعان جوق. سوندىقتان جاڭا پارتيالىق جوبالار ارقىلى بۇل الەۋمەتتىك نىسانداردىڭ دا جۇمىسى جاندانىپ, زامان تالابىنا ساي قىزمەت كورسەتپەك. پارتيانىڭ باستاماسىمەن «رۋحاني جاڭعىرۋ» باعدارلاماسى اياسىندا ەلىمىزدەگى كىتاپحانالار زاماناۋي ءبىلىم ورتالىعى رەتىندە قايتا قۇرىلىپ, كىتاپ قورىنىڭ ەلەكتروندى نۇسقالارى دايىندالاتىنىن دا اتاپ وتكەن ءجون.
وتىرىستا پارتيا حاتشىسى تامارا دۇيسەنوۆا اتالعان جوبالاردى جۇزەگە اسىرۋدىڭ بىرىڭعاي الگوريتمى تۋرالى ايتتى. پارتيالىق جوبالار «تسيفرلى قازاقستان», «رۋحاني جاڭعىرۋ» سياقتى ماڭىزدى باعدارلامالاردى جۇزەگە اسىرۋعا جانە شاعىن جانە ورتا بيزنەستى قولداۋعا باعىتتالعان. سوعان وراي پارتيا مەملەكەتتىك جانە جەرگىلىكتى اتقارۋشى ورگاندارمەن, «اتامەكەن» ۇكپ جانە ۇكىمەتتىك ەمەس ۇيىمدارمەن بىرلەسىپ جۇمىس ىستەمەك.
جيىن بارىسىندا «تەگىن 1000 ءىت-سىنىپ» پارتيالىق جوباسىن جۇزەگە اسىرۋدىڭ ءتيىمدى تەتىكتەرى, وسى جوبا اياسىندا جىلىنا 150 مىڭ قازاقستاندىق مەكتەپ وقۋشىسى ەۋروپالىق ءبىلىم بەرۋ تاسىلىمەن باعدارلامالاۋ مەن روبوت تەحنيكاسىنىڭ نەگىزدەرىن ۇيرەنەتىنى, سونداي-اق ءىت-ورتالىقتار بازاسىندا جىلىنا 35 مىڭ قازاقستاندىق اقپاراتتىق تەحنولوگيا سالاسىندا ءبىلىم الىپ, الەمدىك نارىقتا جۇمىس ىستەۋگە مۇمكىندىك الاتىنى ايتىلدى.
جيىندا وڭىرلەردەن كەلگەن وكىلدەر دە ءسوز الىپ, جاڭا باستامالاردىڭ شىن مانىندە اياسى كەڭ ەكەنىن, سوندىقتان كۇش بىرىكتىرىپ جۇمىس ىستەۋ كەرەكتىگىن ءسوز ەتتى.
شارا سوڭىندا م.اشىمباەۆ بارشا مەملەكەتتىك جانە جەرگىلىكتى اتقارۋشى ورگان وكىلدەرىنىڭ نازارىن جاڭا جوبالاردى جۇزەگە اسىرۋدىڭ باسىم باعىتتارىنا اۋداردى. سونداي-اق ول بارشا نۇروتاندىقتارعا ەلباسى ايقىنداپ بەرگەن مىندەتتەردى ابىرويمەن ورىنداپ, كوزدەگەن ماقساتتارعا قول جەتكىزۋ ءۇشىن تىنباي ەڭبەك ەتۋ كەرەكتىگىن ايتىپ, ناقتى تاپسىرمالار بەردى.
جولدىباي بازار,
«ەگەمەن قازاقستان»