بۇل وقيعا 20 ءساۋىر كۇنى بولعان ەكەن. ءبىر جارىم جاستاعى جاڭگىر ەسىمدى ۇلىن قولىنا كوتەرگەن پەريزات ەرتىس جاعاسىندا ءۇش جاستاعى ۇلى ارلانعا جالعا العان ۆەلوسيپەدتى تەپكىزىپ جۇرەدى.
كۇن شايداي اشىق, ويىندا ەشتەڭە جوق. ءبىر ۋاقىتتا ارلان وزەننىڭ جاعاسىنداعى پاراپەتتىڭ ار جاعىنداعى الاڭقايدا جۇرگەن بالالاردى بايقاپ قالادى دا, اناسىنان سول جەرگە بارۋدى وتىنەدى. ء«بىر قاراسام, ارلان «مەن سپايدەرمەن, مەن سپايدەرمەن» (ورمەكشى ادام) دەپ قورشاۋعا ورمەلەپ بارادى. قولىمداعى جاڭگىردى جەرگە قويا سالدىم دا, ۇلكەن ۇلىمدى ءتۇسىرىپ الايىن دەپ ءبىر ساتكە عانا تەرىس اينالدىم. قىرسىق شالعاندا, ونىڭ اياعى ءبىر جەرگە تىرەلىپ, بوساتقانشا ءبىر-ەكى سەكۋندتاي اينالدىم. ەندى جاڭگىر جاققا قاراسام, بالام جوق. ءدال سول مەزەتتە سۋعا «كۇمپ» ەتكەن دىبىستى ەستىدىم», - دەپ داۋىسى دىرىلدەي ەسكە الادى سول وقيعانى جاڭگىردىڭ اناسى پەريزات.
بالاسى سۋعا كەتىپ بارا جاتسا, قاي انا قاراپ تۇرسىن؟! جالما-جان ۇلىنىڭ ارتىنان سۋعا سەكىرەدى. سەكىرۋىن سەكىرگەنىمەن مۇزداي سۋىق سۋ دەنەسىن قارىپ, ءجۇرىسىن وندىرمەيدى. ءسابيى بولسا, سۋعا ءبىر باتىپ, ءبىر شىعىپ, كوز الدىندا اعىسپەن العا قاراي ۇزاي بەرەدى. دۇنيە كوز الدىندا شىر اينالعان ءبىر مەزەتتە سۋعا ءبىر ادامنىڭ سەكىرگەنىن, بالاسىن ۇستاپ العانىن كورەدى. پەريزاتتىڭ وزىنە دە ءبىر ادام كومەككە كەلىپ, سۋدان الىپ شىعادى. قازىر پەريزات ەرتىسكە قۇلاپ امان قالعان ۇلى جاڭگىرمەن بىرگە قالاداعى انا مەن بالا ورتالىعىندا ەم-دوم قابىلداپ جاتىر. ۇيالى تەلەفون ارقىلى سويلەسكەنىمىزدە ۇلىن قۇتقارۋعا شاھارداعى «ساراپتاما جانە تالداۋ» جشس-ءنىڭ ەلەكترمونتەرلەرى ەرنار قادىلبەكوۆ پەن ايدىن ءتورتباي دەگەن جىگىتتەردىڭ جاردەمدەسكەنىن ايتتى. «مەن ءبىزدى قۇتقارۋعا اتسالىسقان بارلىق ادامدارعا وتباسىمىزدىڭ اتىنان العىسىمدى بىلدىرەمىن. جاعاعا شىققاندا جەدەل جاردەم دە, پوليتسيا قىزمەتى دە, قۇتقارۋشىلار دا جينالىپ قالعانىن كوردىم. بىزگە بىردەن كومەك كورسەتە باستادى. قول-اياعى تارتىلماسىن دەپ بىردەن ۋكول سالدى ۇلىما. جەدەل جاردەمنىڭ دارىگەرىنىڭ ەسىمىن بىلمەيمىن, ول كىسىگە دە راحمەت. مەنى بارىنشا قولداپ, قوبالجىماۋعا شاقىردى. جاڭگىردىڭ جاعدايىنىڭ اۋىر ەكەنىن بىردەن ەسكەرتتى. بىراق قازىر وڭالىپ كەلەمىز. اۋرۋحانادان شىققاسىن ءبارىنىڭ باسىن قوسىپ, قۇران وقىتىپ, ساداقا بەرسەك دەگەن ويىمىز بار, - دەيدى پەريزات.
جاڭگىردى سۋدان الىپ شىققان قايسار جىگىت ەرنار قادىلبەكوۆكە دە تەلەفون شالىپ, وقيعانىڭ قالاي بولعانىن سۇرادىق. «ەرتىس جاعالاۋىنداعى شامداردىڭ جارىعىن اۋىستىرىپ, ۇيگە قايتۋعا جينالىپ جاتقان ەدىك. وسى كەزدە بالانىڭ سۋعا كەتكەنى تۋرالى ايعاي-شۋدى ەستىدىك. بالانى وزەننىڭ اعىسى تومەن قاراي اكەتىپ بارا جاتقانىن بايقاپ, ارىپتەسىم ايدىن ەكەۋمىز سول جاققا قاراي جۇگىردىك. ويلاناتىن ۋاقىت جوق. ۇستاپ السام با دەپ قولىمدى سوزىپ ەدىم, جەتپەيدى. سۋعا سەكىرۋگە تۋرا كەلدى. ءسابيدى ۇستاپ الىپ, جاعادا تۇرعان ايدىنعا بەردىم. كوزىمنىڭ قيىعىمەن بالانىڭ اناسىن دا بىرەۋدىڭ قۇتقارعانىن كورىپ قالدىم. ول جۇرگىزۋشى ۆيتالي باقتىباەۆ ەكەنىن ارتىنان بىلدىك. جاعاعا شىققاسىن بالاعا جۇگىرىپ بارىپ, قاراسام, ءوڭى كوكپەڭبەك ەكەن. سۋ جۇتىپ قويعان بالانى اۆتوماتتى تۇردە قۇتقارا باستادىم. مۇرنىن باستىم دا, دەم جىبەرىپ, كەۋدەسىنەن بىرنەشە رەت باستىم. كينودان جاساندى دەم جىبەرۋدى كورگەم, سول بويىنشا شۇعىل قيمىلداۋ كەرەك بولدى», - دەيدى ول.
ازامات قاسىم, «ەگەمەن قازاقستان» وسكەمەن