اتىراۋدا بەرەكە ىقشام اۋدانىنداعى 300 پاتەرلى 6 تۇرعىن ءۇي پايدالانۋعا بەرىلدى.
اتىراۋ وبلىستىق وڭىرلىك كوممۋنيكاتسيالار قىزمەتىنىڭ حابارلاۋىنشا, كەزەكتە تۇرعاندار ءۇشىن 105 پاتەرلى 2 تۇرعىن ءۇي پايدالانۋعا بەرىلدى. تاعى 195 پاتەرلى 4 تۇرعىن ءۇي «جيلسترويسبەربانك» اق ارقىلى بەرىلدى.
-جاقىن ارادا «نۇرلى جەر» باعدارلاماسى بويىنشا تاعى 195 وتباسىعا جاڭا پاتەر بەرۋ جوسپارلانىپ وتىر. قازىرگى تاڭدا ااماتتاردىڭ تولەم قابىلەتتىلىگى بويىنشا ءتىزىم جاساقتالۋدا. بيىلعى جىلدىڭ سوڭىنا دەيىن وسى ىقشام اۋداندا تاعى 9 ءۇيدى پايدالانۋعا بەرۋ جوسپاردا بار, دەيدى تۇرعىن ءۇي – كوممۋنالدىق شارۋاشىلىعى,جولاۋشىلار تاسىمالى جانە اۆتوكولىك جولدارى ءبولىمىنىڭ باسشىسى رافحات جولديەۆ.
-مەن «از قامتىلعان وتباسى» بويىنشا كەزەكتە تۇرمىن. ءبىراز ۋاقىت وتباسىممەن ەسكى پاتەردە تۇردىق, كەيىن بىرنەشە جىل پاتەر جالداۋعا تۋرا كەلدى, بۇگىن بىزگە ءوز ءۇيىمىزدىڭ كىلتىن تابىستادى,-دەيدى اتىراۋ قالاسىنىڭ تۇرعىنى سالاۋات مۇتاليەۆ.
ايتا كەتەيىك, جاقىن ارادا بەرەكە ىقشام اۋدانى كەڭەيتىلەدى. بولاشاقتا بۇل جەردە 40 كوپ قاباتتى تۇرعىن ءۇي بولادى دەپ جوسپارلانعان. بيىلعى جىلى بەرەكەدە 1200 ورىندىق مەكتەپ پەن 290 ورىندىق 2 بالاباقشانىڭ قۇرىلىسى باستالادى.
-قازىرگى ۋاقىتتا «نۇرسايا» ىقشام اۋدانىندا 105 پاتەرلى 2 كوپقاباتتى تۇرعىن ءۇي پايدالانۋعا بەرۋگە دايىن. بۇل كوپقاباتتى تۇرعىن ۇيلەر تقجب سالىمشىلارىنا بەرىلەدى,-دەيدى تۇرعىن ءۇي – كوممۋنالدىق شارۋاشىلىعى,جولاۋشىلار تاسىمالى جانە اۆتوكولىك جولدارى ءبولىمىنىڭ باسشىسى رافحات جولديەۆ.
اتىراۋ قالالىق اكىمدىگى بەرگەن اقپارات بويىنشا, قازىرگى تاڭدا 20 مىڭعا جۋىق اسا ادام ءۇي كەزەگىندە تۇر, تۇرعىن ءۇي ماسەلەسى كەزەڭ-كەزەڭىمەن شەشىمىن تاباتىن بولادى.