م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ ستۋدەنتتەرى اركتيكا ەكسپەديتسياسىنا شاقىرۋ الدى.
رەسەيدىڭ يامال-نەنەتس اۆتونوميالىق وكرۋگىنىڭ جوعارى وقۋ ورنىنان كەلگەن دەلەگاتسيا ەكولوگيالىق ەكسپەديتسيانىڭ ماقسات-شارتتارىمەن تانىستىردى. وسىدان 5 جىل بۇرىن باستالعان ەكولوگيالىق قوزعالىسقا رەسەي, اۆستريا, بولگاريا, ۋكراينا, قىتاي جانە كۋبا ەلدەرىنەن 160-تان استام وكىل قاتىسىپتى. ەرىكتىلەر اركتيكانىڭ سولتۇستىك بولىگىن اۋىر مەتالل قالدىقتارىنان تازارتىپتى.
سولتۇستىكقازاقستاندىق جاستار شاقىرۋدى قابىل الدى.
«سولتۇستىك قازاقستان مەن يامال-نەنەتس وڭىرلەرىنىڭ اراسىندا ۇقساستىق كوپ. سىزدەر سياقتى ءبىز دە سولتۇستىك ايماقتا تۇرامىز. ەكى تاراپ اراسىنداعى دوستىق قارىم-قاتىناس ودان ءارى بەكي تۇسەرىنە سەنىمدىمىن», دەيدى يامال-نەنەتس اۆتونوميالىق وكرۋگىنىڭ حالىقارالىق سىرتقى بايلانىس دەپارتامەنتى ديرەكتورىنىڭ ءبىرىنشى ورىنباسارى سەرگەي ۋراماەۆ.
ەكولوگيالىق ەكسپەديتسيا 15 كۇنگە جالعاسادى. ۇمىتكەرلەر ەكولوگيا جانە بيولوگيا ماماندىقتارى بويىنشا وقىپ جۇرگەن ستۋدەنتتەردەن ىرىكتەلىپ الىنادى. ولار ەكسپەديتسيانىڭ قۇرامىندا كارسك تەڭىزىنىڭ جاعالاۋىندا ورنالاسقان, بۇگىندە ادام تۇرمايتىن ۆيلكيتسك ارالىنىڭ تاڭعاجايىپ تىنىس-تىرشىلىگىمەن تانىساتىن بولادى. كەزىندە مۇندا ءىرى ءوندىرىس ورىندارى بولعان. وسىندا مەتالل قالدىقتارىن جيناپ, ەكولوگيالىق تازالىققا ۇلەس قوسۋ–ەكسپەديتسيانىڭ باستى ماقساتى.
«اركتيكا ەرىكتىلەرى» جوباسىنىڭ جەتەكشىسى ەۆگەني روجكوۆسكيدىڭ سوزىنە قاراعاندا 5 جىل بويى بەلوە ارالى قوقىستان تازارتىلىپتى. وسىلايشا ارالدىڭ ەكولوگيالىق پاسپورتى بارلىق تالاپتارعا سايكەستەندىرىلىپتى. ەندىگى كەزەك– ۆيلكيتسك ارالى. وندا تەك تىكۇشاق قانا قاتىنايتىن كورىنەدى. ۇيىمداستىرۋشىلار ەكسپەديتسيا مۇشەلەرىن جاتىن ورىنمەن, ازىق ت ۇلىكپەن قامتاماسىز ەتەدى. جىلدىڭ ورتاشا اۋا تەمپەراتۋراسى 10 گرادۋس سۋىقتىقتان اسپايدى.
ەكولوگيالىق ەكسپەديتسيا شىلدە ايىندا باستالادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.