وڭىردە جاپ-جاقسى مادەني شارالار باستاۋ العانىمەن, ءتۇرلى سەبەپتەرمەن جالعاسىن تاپپاي قالاتىن ساتتەر كەزدەسەدى. 2014 جىلى العاش رەت شىمىلدىعى تۇرىلگەن «گاۋhار تاس» فەستيۆالىنىڭ عۇمىرى كەلتە بولعان ەدى.
ەندى, مىنە, اراعا ءتورت جىل سالىپ ەكىنشى رەسپۋبليكالىق حالىق اسپاپتار وركەسترلەرى مەن انسامبلدەرىنىڭ «گاۋhار تاس» بايقاۋى «رۋحاني جاڭعىرۋ» باعدارلاماسى اياسىندا قايتا جاڭعىرىپ, ەلىمىزدىڭ ءار قيىرىنان كەلگەن 300-گە جۋىق ونەرپازدىڭ باسىن بىرىكتىردى.
بيىل 200 جىلدىعى كەڭ كولەمدە اتاپ وتىلەتىن ءارى باتىر, ءارى اقىن, ءارى جىرشى, ءارى سازگەر سەگىز سەرىنىڭ ولمەس مۇراسىن ۇلىقتاۋعا باعىتتالعان مادەني شارا شىعارماشىلىق ۇجىمداردىڭ بايلانىسىن ارتتىرىپ, تالانتتىلاردى قولدادى. ءتورت وركەستردىڭ, بەس فولكلورلىق ءانسامبلدىڭ سۇيەمەلدەۋىمەن حالىق اندەرى دە, سەگىز سەرىنىڭ شىعارمالارى دا اسقان شابىتپەن ورىندالدى. مادەنيەت قايراتكەرى قايىرلى عافۋروۆ كوركەمدىك جەتەكشىلىك ءارى ديريجەرلىك ەتەتىن وبلىستىق فيلارمونيا جانىنداعى سەگىز سەرى اتىنداعى قازاق حالىق اسپاپتار وركەسترىنە ءبىرىنشى كۇنگى باعدارلامانى اشۋ قۇرمەتى بۇيىردى. جەزتاڭداي ءانشى ۆاسيليا گابيدۋللينا «القوڭىر» ءانىن ناقىشىنا كەلتىرە شىرقاپ بەردى. يسا بايزاقوۆتىڭ «جەلدىرمەسى», «جولامان تۇرسىنباەۆتىڭ «قىز قاراعايى» تارتۋ ەتىلدى.
فەستيۆالدىڭ ەكىنشى كۇنى گالا-كونتسەرتكە جالعاسىپ, ونىڭ شىمىلدىعىن اقمولا مەملەكەتتىك اكادەميالىق فيلارمونياسى جانىنداعى «سارىارقا» حالىق اسپاپتار ءانسامبلى اشىپ, «سىر تولعاۋى», «قارقارا» تۋىندىلارىن ۇسىنسا, قاسيەتتى سەمەي جەرىنەن كەلگەن «قالامقاس», «كەربەز» فولكلورلىق انسامبلدەرى ساحنا ءتورىن قالى كىلەمدەي جايناتىپ جىبەردى. «احاۋ, سەمەي», «شاڭدى جورىق», «ابايدىڭ ەلى» شىعارمالارىنان شاشۋ شاشتى. ماڭعىستاۋ وبلىسى اباي اتىنداعى مادەني-دەمالىس كەشەنىنىڭ حالىق اسپاپتار وركەسترى تاڭداي قاقتىرىپ, كوز جۇمدىردى. بارلىق وركەسترلەر قاتىسا وتىرىپ قازاقستاننىڭ ەڭبەك سىڭىرگەن ءارتىسى جالعاسبەك بەگەندىكوۆتىڭ ديريجەرلىك ەتۋىمەن قۇرمانعازىنىڭ «سەرپەرى» وينالعاندا قازاقتىڭ سالقار دالاسىن مىڭ سان تۇلپاردىڭ تۇياق دۇبىرىنە بولەپ جىبەرگەندەي بولدى. جاستار سارايىندا ينە شانشار ورىننىڭ بولماۋىنا قاراعاندا اۋەزدى اندەر, كۇمبىرلەگەن كۇيلەر كورەرمەندەرگە تاماشا كەش سىيلاعان ءتارىزدى.
بەلگىلى سازگەر ج.تۇرسىنباەۆتىڭ «قۇرمانعازى كۇي كەمەڭگەرى بولسا, سەگىز سەرى – ءان جامپوزى. بۇل ەكى الىپ تۇلعا – قازاق حالقىنىڭ ماقتانىشتارى. ۇلتتىق قۇندىلىقتارىمىزدى كەڭىنەن ناسيحاتتاپ, جۇرتشىلىققا ءمان-ماڭىزىن جەتە ۇقتىراتىن مۇنداي شارالاردى جۇيەلى تۇردە ۇيىمداستىرعان ءجون. سوڭعى كەزدەرى جۇرتشىلىقتىڭ ءداستۇرلى انگە دەگەن قۇرمەت-قوشەمەتى ارتىپ كەلەدى. جاس بۋىن دا سەگىز سەرىنىڭ شىعارمالارىن ءبىلىپ وسسە دەگەن تىلەگىم بار» دەگەن سوزىنە الىپ-قوسارىمىز جوق.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى