«استانا» پرەزيدەنتتىك كلۋبىنىڭ قۇرامىنا ەنەتىن «استانا» ۆەلوكومانداسىنىڭ باس مەنەدجەرى الەكساندر ۆينوكۋروۆ 4-مامىر كۇنى باستالاتىن «دجيرو د'يتاليا» جارىسىنا كوماندا قانداي دايىندىقپەن كەلگەنى جايلى اڭگىمەلەدى.
- بىرنەشە كۇن بۇرىن «دجيرو د'يتاليا» ۆەلودوداسىنىڭ الدىنداعى نەگىزگى دايىندىق بولىپ سانالاتىن ء«الپى تۋرى» اياقتالدى. ءبىزدىڭ باستى قارسىلاستارىمىزدىڭ بارلىعى سول جارىستا بولدى. بەس كەزەڭنىڭ ۇشەۋىندە جەڭىسكە جەتكەن كوماندا ءوز-ءوزىن تاماشا كورسەتتى. پەلو بيلباو مەن لۋيس لەون سانچەسكە وزدەرىن كورسەتۋگە مۇمكىندىك بەردىك. ول كوماندا ىشىندەگى كليماتتى نىعايتىپ جانە شاباندوزداردى جىگەرلەندىرۋ ءۇشىن اسا ماڭىزدى قادام ەدى. ءبىزدىڭ كوشباسشىمىز ميگەل انحەل لوپەس كورولدىك كەزەڭدە جەڭىسكە جەتتى. ءجيى شابۋىلداپ, قورىتىندى كلاسسيفيكاتسيا ناتيجەسى بويىنشا 3-ورىندى يەمدەندى. جالپى, كوماندا بۇل جارىستى وتە بەلسەندى وتكىزدى. ناتيجەسىندە باستى ەسەپتە 10 مىقتىنىڭ قاتارىنا بىردەن «استانانىڭ» 3 شاباندوزى - لوپەس, لۋيس لەون سانچەس جانە يان حيرت ەندى. قازاقستاندىق شاباندوز اندرەي زەيتس ۇزدىكتەر قاتارىنان الىس بولمادى. ول 11-ورىندى يەمدەندى. سايكەسىنشە, قورىتىندى ەسەپ بويىنشا «استانا» «ۇزدىك كوماندا» اتاندى. بۇل كوماندانىڭ جاقسى دارەجەدەگى دايىندىعىنىڭ كورسەتكىشى. وقۋ-جاتتىعۋ جيىندارىن جاقسى وتكىزىپ, دۇرىس باعىتتا كەلەمىز. بىراق, جىگىتتەر ءوز قالىپتارىنىڭ شىرقاۋ شىڭىنا ءالى جەتە قويمادى. ولار «دجيرو» بارىسىندا الەۋەتتەرىن ودان ءارى جاقسارتادى. سوندىقتان تارتىس وتە قىزىقتى بولماق. «استانا» ءوز جانكۇيەرلەرىن توسىنسىيمەن قۋانتادى دەگەن سەنىمدەمىن. وعان قوسا ول قۇرامعا قازىر ەكستريمالدى تاۋلى ايماقتا بەلسەندى دايىندىق جۇمىستارىن جۇرگىزىپ جاتقان ءبىزدىڭ الەكسەي لۋتسەنكو دا ەنەدى.
سونىمەن قاتار, وليمپيادا چەمپيونى سپرينتەر ريككاردو ميناليدەن باسقا تولىقتاي قازاقستاندىق جىگىتتەر قاتىسقان «حورۆاتيا تۋرىنداعى» كوماندانىڭ ناتيجەسى جايلى ايتىپ بەردى.
- «حورۆاتيا تۋرىندا» كوماندا ءوز-ءوزىن تاماشا كورسەتتى. جىگىتتەر تەك الدىڭعى شەپتە بولىپ, لايىقتى جۇمىس اتقاردى. ءبىزدىڭ قازاقستاندىق جاس شاباندوز ەۆگەني گيديچ «حورۆاتيا تۋرىنىڭ» كورولدىك تاۋلى كەزەڭىن قالاي ءجۇرىپ وتكەنىن بارلىعى كورگەن شىعار. ول تاجىريبەلى, ءارى مىقتى كاسىبي تاۋ ۆەلەسەبەدشىلەرمەن بىرگە فينيشكە ۇزدىك ۇشتىك قاتارىندا كەلدى. ونىڭ باسەكەلەستەرى 35-37 جاستاعى شاباندوزدار. ولار الەمدىك تۋر ساناتىنا جاتاتىن كوماندالار ساپىندا وراسان زور تاجىريبە جيناعاندار. سونىمەن قاتار, تاۋ جولى قيىن ءارى تىك بولىپ كەلدى. شىنىمدى ايتسام, جەنيا ءبىزدى قاتتى تاڭقالدىردى. ول كۇش-قۋاتى زور تالانتتى شاباندوز. وتە جىلدام دامىپ كەلە جاتقانىن بايقادىق. سونداي-اق, مارەدە جاقسى ارەكەت ەتىپ, سپرينتەر رەتىندە دە جۇمىس جاساي الادى. «حورۆاتيا تۋرىنىڭ» باس كلاسسيفيكاتسياسىنىڭ ناتيجەسى بويىنشا ۇزدىك ۇشتىك قاتارىندا بولعان ەۆگەني «ۇزدىك جاس شاباندوز» رەتىندە اق جەيدە يەگەرى اتاندى. بۇل جارىس الدىندا باقتيار قوجاتاەۆتىڭ سىرقاتتانىپ, ناشار قالىپتا بولعانى وكىنىشتى. باقتيار باس كلاسسيفيكاتسيادا جوعارعى ورىندارعا تالاسا الار ەدى. ايتپاقشى, جارىسقا العاشقى رەت سپورتتىق ديرەكتور رەتىندە ءبىزدىڭ قازاقستاندىق, اسان بازاەۆ قاتىستى. ول ءۇشىن دە جارىس جاقسى اياقتالدى.