وسى جىلدىڭ 29 ناۋرىزى مەن 6 ءساۋىرى ارالىعىندا ءماجىلىس دەپۋتاتتارىنىڭ وڭىرلەرگە ساپارى اياسىندا مەن الماتى قالاسى مەن الماتى وبلىسىنىڭ تۇرعىندارىمەن بىرقاتار كەزدەسۋلەر وتكىزدىم.
ەلباسى نۇرسۇلتان نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى قازاقستان حالقىنا ۇندەۋىن ەل تۇرعىندارىمەن بىرلەسىپ تالقىلادىم, حالىق بارىنشا قولداۋ بىلدىرۋدە. سونىمەن قاتار تۇرعىندار تاراپىنان كوتەرىلگەن تالاپ-تىلەكتەرىن تىڭداپ, وتىنىشتەرىن قابىلدادىم.
سونداي كەزدەسۋلەردىڭ بارىسىندا كوتەرىلگەن ماسەلەلەردىڭ ءبىرى – الماتى وبلىسى ۇيعىر اۋدانى دوبىن اۋىلىنداعى كولدىڭ جاعدايى. اۋىل تۇرعىندارى جاعدايدى بايانداعان سوڭ ءوزىم بارىپ, كولدىڭ جاي-كۇيىمەن تانىستىم. مامانداردىڭ ايتۋىنشا, 800 مىڭ تەكشە مەتردەي سۋ سياتىن كول دوبىن اۋىلىنىڭ جوعارى جاعىندا, اۋىلدان 100 مەتردەي جەردە جانە اۋىل دەڭگەيىنەن بيىك جەردە ورنالاسقان. ال وندا جينالعان سۋ مولشەردەن الدەقايدا اسىپ كەتكەن ەكەن. ناتيجەسىندە كولدىڭ توپىراقتان جاسالعان جاعالاۋى, توسپاسىنىڭ سىرت جاعى بىرتىندەپ سازدانىپ بۇزىلا باستاپتى. ءتىپتى توسپانىڭ تومەن جاعىنان سىزاتتاپ سۋ اعا باستاعان. كولدىڭ بىرنەشە جىلدان بەرى جوندەۋ كورمەگەن بۇل توسپاسى بۇزىلىپ, سۋ كەتكەن جاعدايدا دوبىن اۋىلىنىڭ مىڭنان استام تۇرعىنى مەن ءۇي-جايلارى توپان سۋ استىندا قالىپ, ادامداردىڭ ومىرىنە ۇلكەن قاۋىپ تونگەلى تۇر.
وسىعان وراي, مەن پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداپ, اتالعان كولدىڭ توسپاسىن كۇردەلى جوندەۋ ماسەلەسىن تەز ارادا قاراستىرۋدى ءوتىنىپ, دوبىن اۋىلىنىڭ تۇرعىندارىن اپاتتان ساقتاپ قالۋ شاراسىن قولدانۋدى سۇرادىم.
ماسەلە دەرەۋ شەشىلمەسە جاعداي قيىندىققا سوقتىرارى ءسوزسىز, مەن جانە دوبىن اۋىلىنىڭ مىڭداعان تۇرعىنى ۇكىمەت باسشىسىنىڭ ماسەلەگە باسا نازار اۋدارۋىنان ءۇمىتتىمىز.
شايماردان نۋرۋموۆ,
ءماجىلىس دەپۋتاتى