«ارسەنال» فۋتبول كلۋبىنىڭ فرانتسيالىق باس جاتتىقتىرۋشىسى ارسەن ۆەنگەر ماۋسىم سوڭىندا كلۋبتان كەتەتىنىن مالىمدەدى. ول لوندون كومانداسىن 1996 جىلدان بەرى 22 جىل باسقارعان بولاتىن.
«كلۋب باسشىلىعىمەن اقىلداسا كەلە بيىلعى ماۋسىمنان سوڭ كلۋبتان كەتۋگە شەشىم قابىلدادىم. بىرنەشە جىل بويى الەمنىڭ ەڭ ۇزىك كومانداسىن جاتتىقتىرعانىما قۋانىشتىمىن. كلۋبقا بار كۇش-جىگەرىمدى سالدىم جانە ادال جۇمىس ىستەدىم دەپ ايتا الامىن. بارشا جانكۇيەرلەرگە, فۋتبولشىلارعا ءوز العىسىمدى ايتامىن», دەيدى ارسەن ۆەنگەر.
فرانتسيالىق مامان 22 جىلدىڭ ىشىندە «ارسەنالمەن» بىرگە 17 كۋبوك جەڭىپ العان. ءۇش رەت انگليا چەمپيونى اتانىپ, جەتى رەت انگليا كۋبوگى جانە انگليا سۋپەركۋبوگىن جەڭىپ العان. ۆەنگەر اعىلشىن پرەمەر-ليگاسىندا جاتتىقتىرۋشى رەتىندە 823 ماتچ وتكىزىپ, اپل تاريحىندا رەكورد ورناتقان. ەكىنشى ورىندا «مانچەستەر يۋنايتەد» كلۋبىنىڭ بۇرىنعى جاتتىقتىرۋشىسى الەكس فەرگيۋسون (810) تۇر.
نۋرماگومەدوۆ پەن ماكگرەگور جۇدىرىقتاسۋى مۇمكىنارالاس جەكپە-جەك وكىلى حابيب نۋرماگومەدوۆ UFC سپورتىنىڭ ەكى سالماق بويىنشا الەمنىڭ ەكس-چەمپيونى كونور ماكگرەگورمەن جىل سوڭىنا دەيىن جەكپە-جەك وتكىزۋى ءۇشىن كەلىسسوز باستالعان.
«قازىرگى تاڭدا كونوردىڭ كومانداسىمەن كەزدەسۋ وتكىزۋ تۋرالى كەلىسسوز ءجۇرىپ جاتىر. ول ءبىزدىڭ ۇسىنىستى قاراماي سوزىپ ءجۇرىپ الماسا, وسى جىلى جەكپە-جەك وتكىزگىم كەلەدى. ەگەر ول مەنىمەن جۇدىرىقتاسقىسى كەلمەسە, وندا داستين پورەنى سەگىز بۇرىشقا شاقىرىپ كورەمىز», دەيدى نۋرماگومەدوۆ.
ايتا كەتەيىك, رەسەيلىك سپورتشى سوڭعى جەكپە-جەگىن توني فەرگيۋسونعا قارسى وتكىزۋى كەرەك بولعان. الايدا امەريكالىق سپورتشى جاراقات الىپ قالۋىنا بايلانىستى ايقاس كەيىنگە شەگەرىلگەن. كەيىننەن حابيب نۋرماگومەدوۆ ەل ياكۆينتپەن جۇدىرىقتاسىپ, چەمپيوندىق بەلبەۋىن قورعاپ قالعان ەدى.
«توتتەنحەم» ترانسفەردە 120 ملن فۋنت جۇمساماقلوندوننىڭ «توتتەنحەم» كلۋبى جازعى ترانسفەر ماۋسىمىندا بىرقاتار فۋتبولشىلاردى ساتىپ الماق. The Independent باسىلىمىنىڭ مالىمەتى بويىنشا, باس جاتتىقتىرۋشى ماۋريسيو پوچەتتينو كلۋب باسشىلىعىنا ترانسفەر ءۇشىن 120 ملن فۋنت قارجى ءبولۋىن سۇراعان.
ارگەنتينالىق مامان بۇل قارجىعا دجاماال لاسسەللس («نيۋكاسل») جانە ماتەيس دە ليگت («اياكس») سياقتى فۋتبولشىلاردى ساتىپ الماق. سونداي-اق «كريستال پەلاس» كلۋبىنان ۋيلفريد زاحا مەن «ۆەست برومۆيچتان» دجەي رودريگەستى دە ساتىپ الۋدى كوزدەپ وتىر. بۇعان دەيىن شەتەلدىك باسىلىمدار «رەال مادريد» كومانداسىنداعى جارتىلاي قورعاۋشى گارەت بەيل جاز ايىندا «توتتەنحەم» كلۋبىنا قايتا كەلەدى دەپ جازعان بولاتىن.
دايىنداعان ءالي بيتورە,
«ەگەمەن قازاقستان»