– قازاقستان فۋتبول فەدەراتسياسى ماۋسىم ايىندا ەلوردادا ازەربايجان قۇراماسىمەن جولداستىق ماتچ وتكىزەتىنىن جاريالادى. ازەربايجان قۇراماسى نە سەبەپتەن تاڭدالدى؟ قارسىلاس تۋرالى ايتىپ وتسەڭىز؟
– ەڭ الدىمەن قازاقستانعا كەلۋ ءۇشىن كەلىسىم بەرگەن ازەربايجان قۇراماسىنا العىس ايتقىم كەلەدى. ەكىنشىدەن, كەلىسسوزدى جۇرگىزگەن قازاقستان فۋتبول فەدەراتسياسى ۇلكەن جۇمىس اتقاردى. ۋەفا-نىڭ ۇلتتار ليگاسىنىڭ العاشقى ويىنى ەلوردادا وتەتىن بولعاندىقتان, جولداستىق كەزدەسۋدى ءوز الاڭىمىزدا قابىلداۋعا شەشىم قابىلدادىق. ىرىكتەۋ توبىنداعى قارسىلاسىمىز گرۋزيامەن ويىنى ۇقساس ازەربايجاندى تاڭدادىق. سوڭعى جىلدارى ازەربايجان قۇراماسى جاقسى ويىن كورسەتىپ ءجۇر. كوماندانى جاتتىقتىراتىن گۋربان گۋربانوۆتىڭ دا بىلىكتى باپكەر ەكەنىن اتاپ وتكىم كەلەدى. ازەربايجاندا كلۋبتىق دەڭگەيدەگى فۋتبول كوتەرىلىپ كەلە جاتقانىن بىلەمىز. ءبىزدىڭ كوماندانىڭ دايىندىعىن تەكسەرۋگە جاقسى مۇمكىندىك بولماق.
– ماۋسىم ايىنداعى قارسىلاس بەلگىلى. ۇلتتىق قۇرامانىڭ وقۋ-جاتتىعۋ جيىنىنداعى جوسپارىمەن بولىسسەڭىز؟
– 1-5 ماۋسىم ارالىعىندا استانا قالاسىندا وقۋ-جاتتىعۋ جيىنىنا جينالامىز. ءبىزدىڭ مىندەتىمىز – كوماندانىڭ ويىن ۇلگىسىن قالىپتاستىرۋ. ۆەنگريا جانە بولگاريامەن وتكەن ماتچتارداعى ويىن ۇلگىسىن ءارى قاراي دامىتا ءتۇسۋ ماقساتىن العا قويامىز. العاشقى وقۋ-جاتتىعۋ جيىنىن جاقسى وتكىزدىك. ءار جيىن سايىن كومانداعا جاڭا لەپ قوسىپ وتىرۋ قاجەت. ارينە ازىرگە ۇلكەن قادامدار جاساي المايمىز. بىرتىندەپ العا جىلجىپ وتىرۋ كەرەك. ماۋسىم-شىلدە ايلارىندا فۋتبولشىلارعا تۇسەتىن اۋىرتپاشىلىقتى بىلەمىز. فۋتبولشىلار ىشكى بىرىنشىلىك پەن ەۋروكۋبوك تۋرنيرلەرىندە وينايدى. ۇلتتىق قۇراما ويىنشىلارىنا 4-5 كۇن دەمالۋعا رۇقسات بەرەمىن. ويتكەنى 2-2,5 اي بويى ولارعا تۇسەتىن سالماق كوپ بولماق. ەۋروكۋبوكتا وينايتىن كوماندالاردىڭ جاقسى ناتيجە كورسەتۋى ءبىز ءۇشىن دە ماڭىزدى. توپتىق كەزەڭگە بىرنەشە كوماندا جولداما السا, ۇلكەن جەتىستىك بولماق.
– پرەمەر-ليگانىڭ التى تۋرى اياقتالدى. بەسىنشى تۋردا «استانا» مەن «قايرات» جولىقتى. ۇلتتىق قۇراما فۋتبولشىلارىنىڭ ويىنى قالاي؟ ماۋسىمداعى جيىنعا شاقىرتۋ الۋعا ءۇمىتتى جاڭا ەسىمدەر بار ما؟
– ۇلتتىق قۇرامانىڭ ماتچتارىنان كەيىن كوماندالار دەڭگەيلەرىن كوتەرىپ, بابىنا كەلە باستادى. «استانا» مەن «قايرات» اراسىنداعى كەزدەسۋ وتە تارتىستى ءوتتى. ۇلتتىق قۇرامانىڭ ويىنشىلارى وسى ماتچتا جاقسى ويىن كورسەتتى. ماۋسىم ايىنا دەيىن بىرنەشە ويىندى قاراپ, ورتاق تۇجىرىمعا كەلەمىز. جاڭا ەسىمدەر شىعىپ جاتسا, ۇلتتىق قۇراماعا شاقىرتۋ الادى.
– اڭگىمەڭىزگە راحمەت.
اڭگىمەلەسكەن ەرمۇحامەد ماۋلەن,
«ەگەمەن قازاقستان»