ورال قالاسىندا حاديشا بوكەەۆا اتىنداعى وبلىستىق قازاق دراما تەاترى عيماراتىندا تۇرعىندارعا ارنالعان ءداستۇرلى «اشىق اكىمدىك» كۇنى ۇيىمداستىرىلدى. بۇل جىل باسىنان بەرى وتكەن وسىنداي ءتورتىنشى شارا.
اشىق ەسىك كۇنى باتىس قازاقستان وبلىسىنىڭ كەز كەلگەن تۇرعىنى ءوزىن تولعاندىرعان ماسەلەنى, ءوتىنىشى مەن ۇسىنىسىن قۇقىق قورعاۋ ورگاندارى, مەملەكەتتىك جانە كوممۋنالدىق مەكەمەلەر باسشىلارىنىڭ الدىنا قويا الادى. سول ارقىلى ءتيىستى جاۋاپ پەن قۇقىقتىق كەڭەس بەرىلىپ, شەشۋ جولدارى قاراستىرىلادى.
«اشىق اكىمدىكتى» وتكىزۋ – تۇرعىندار اراسىنداعى تۋىنداعان كوكەيكەستى ماسەلەنىڭ شەشىمىن جەدەل ءارى ءتيىمدى جولمەن شەشۋگە باعىتتالعان. قابىلداۋ تۇرعىندار ءۇشىن قولايلى دەمالىس كۇندەرىنە بەلگىلەنەدى.
بۇل جولى دا «اشىق اكىمدىك» شاراسىنا ءوڭىر باسشىسى التاي كولگىنوۆ, ورال قالاسىنىڭ اكىمى مۇرات مۇقاەۆ, وبلىس اكىمىنىڭ ورىنباسارلارى, سالالىق باسقارما باسشىلارى قاتىسىپ, تۇرعىنداردىڭ تالاپ-تىلەكتەرىن تىكەلەي تىڭدادى.
بۇل كۇنى تۇرعىندار تاراپىنان 223 ادام وزدەرىنىڭ ءتۇرلى ماسەلەلەرىمەن ءتيىستى باسشىلارعا جولىقتى. ادەتتەگىدەي ءوتىنىش-شاعىمنىڭ دەنى تۇرعىن ءۇي كوممۋنالدىق شارۋاشىلىق سالاسىنا قاتىستى بولعان. مىسالى, مۇرات موڭكە ۇلى كوشەسىندە جاڭادان پايدالانۋعا بەرىلگەن ءۇي تۇرعىندارى 4 ايدان بەرى تابيعي گازسىز وتىرعانىن جەتكىزگەن. مۇنداي ماسەلەلەر ءتيىستى مەكەمە-قىزمەتتەردىڭ قاتىسۋىمەن تەز تەكسەرىلىپ, ءتيىستى شەشىم شىعارىلادى.
بۇل كۇنى وبلىس اكىمى التاي كولگىنوۆتىڭ ءوزى 37 اداممەن تىكەلەي كەزدەسىپ, مۇڭ-مۇقتاجىن تىڭدادى.
ايتا كەتۋ كەرەك, وسىنداي ءار شارا وتكەن سايىن «اشىق اكىمدىككە» شاعىممەن كەلۋشى تۇرعىندار سانى ازايىپ كەلەدى.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان وبلىسى
سۋرەتتى تۇسىرگەن ايباتىر نۇراش