ورال قالاسىنداعى «سيتي تسەنتر» ويىن-ساۋىق جانە ساۋدا ورتالىعىنىڭ يەسى ورال قالالىق مامانداندىرىلعان اكىمشىلىك سوتىنىڭ شەشىمىمەن ءورت قاۋىپسىزدىگىنە قاتىستى كەمشىلىكتەردى جويماعانى ءۇشىن اكىمشىلىك جاۋاپكەرشىلىككە تارتىلدى.
ساۋدا ورتالىعىنا بۇدان بۇرىن دا بىرنەشە مارتە تەكسەرىس جۇرگىزىلىپ, 2017 جىلعى 27 جەلتوقساندا كەمشىلىكتەردى جويۋ جونىندە نۇسقاما بەرىلگەن ەكەن. «الايدا انىقتالعان 97 كەمشىلىكتىڭ 36-سى ءالى كۇنگە جويىلماعان» دەيدى سۋديا بوتاگوز نۇرماعامبەتوۆا.
ساۋدا ورتالىعى – كوپشىلىك جينالاتىن ورىن. مۇنداي نىساندا توتەنشە جاعداي, ءورت پايدا بولعان جاعدايدا جويىلماعان كەمشىلىكتەر سالدارىنان كوپ ادام زارداپ شەگۋى مۇمكىن. اسىرەسە كورشىلەس رەسەي فەدەراتسياسىنىڭ كەمەروۆ وبلىسىندا بولعان وقيعادان ساباق الۋىمىز كەرەك.
ءىس ماتەريالدارىن زەردەلەگەن سوت كەشەن يەسى «پسپ سەرىك» جشس 200 اەك كولەمىندەگى, ياعني 481 000 تەڭگەنى قۇرايتىن ايىپپۇل تارتۋعا, كەشەن جۇمىسىن 1 اي مەرزىمگە توقتاتۋعا شەشىم شىعاردى. سوت قاۋلىسى 10 كۇننەن كەيىن زاڭدى كۇشىنە ەنۋى ءتيىس.
باتىس قازاقستان وبلىستىق سوتىنىڭ اقپاراتتىق قامتاماسىز ەتۋ ءبولىمىنىڭ اقپاراتىنا قاراعاندا, جىل باسىنان بەرى باتىس قازاقستان وبلىسىندا ءۇش كاسىپكەر ءورت قاۋىپسىزدىگى تالاپتارىن ساقتاماعانى ءۇشىن جاۋاپكەرشىلىككە تارتىلعان. كاسىپكەرلىك نىساندارىنا جالپى سوماسى 649 350 تەڭگەنى قۇرايتىن ايىپپۇل سالىنعان.
قازبەك قۇتتىمۇرات ۇلى
«ەگەمەن قازاقستان»
ورال قالاسى