وبلىستىق ءماسليحات جانىنداعىتۇراقتى كومميسسيانىڭ كوشپەلى وتىرىسىندا وبلىستىق مەملەكەتتىك ءارحيۆتىڭ بۇگىنگى جايى كەڭىنەن تالقىلاندى.
قازىرگى كۇنى جەرگىلىكتى مۇراعات قورىندا 600 مىڭعا جۋىق قۇجات ساقتالسا, ونىڭ 2 مىڭى عانا ەلەكتروندى جۇيەگە كوشىرىلگەن. سەبەبى, جوعارى جىلدامدىقتاعى سكانەرلەر مەن قۇرىلعىلار تاپشى بولعاندىقتان, مادەني مۇرالاردى ساندىق جۇيەگە كوشىرۋدىڭ مۇلدەم قاناعاتتانعىسىز كۇيدە. ابدەن توزىعى جەتكەن عيماراتتار مەن ارحيۆ قويمالارىنىڭ جاعدايى دا سىن كوتەرمەيدى.
«رۋحاني جاڭعىرۋ» باعدارلاماسى اياسىندا بىرقىدىرۋ شارالار اتقارىلعانمەن, ماتەريالدىق-تەحنيكالىق بازانى جاقسارتۋ كۇردەلى كۇيىندە قالىپ وتىر. حالىق قالاۋلىلارى ارنايى ارحيۆ عيماراتىنىڭ قاجەتتىلىگىن دە اتاپ ءوتتى.
«وبلىستىق ءارحيۆتىڭ قازىرگى عيماراتى 1973-1974 جىلدارى سالىنعان. بۇگىنگى ۋاقىت تالابىنا سايكەس كەلمەيدى. سونىڭ سالدارىنان ارحيۆ قۇجاتتارىن ەلەكتروندى فورماتقا كوشىرۋگە بىلەك سىبانىپ كىرىسە الماي وتىرمىز. ارحيۆ عيماراتتتارى جوق اۋداندار دا بار», دەيدى سولتۇستىك قازاقستان مەملەكەتتىك ءارحيۆىنىڭ ديرەكتورى ساۋلە مالىكوۆا.
جىلدامدىقتاعى سكانەرلەر مەن قۇرىلعىلار الۋ جونىندە ءتيىستى ورىندارعا ءوتىنىش جىبەرىلگەنىمەن, 50 ميلليون تەڭگەنىڭ قاشان بولىنەتىنى بەلگىسىز. بار-جوعى 2 سكانەر عانا جۇمىس ىستەيدى. ولار كۇنىنە 1000 دانا عانا بەتتى كوشىرۋگە قاۋقارلى. بارلىق قۇجاتتاردى تسيفرلاندىرۋ ءۇشىن ا2, ا3 فورماتتاعى قۇجاتتاردى وڭدەيتىن ەلەكتروندى مەحانيكالىق قۇرىلعى قاجەت. ونىڭ ءبىر جيىنتىعى شامامەن 15 ميلليونن تەڭگەنى تۇرادى.
ءومىر ەسقالي.
«ەگەمەن قازاقستان».
سولتۇستىك قازاقستان وبلىسى.