اياگوزدە قونىس تويى جالعاسۋدا. بۇگىن قارعىن سۋدان ۇيلەرى زارداپ شەككەن تاعى 13 وتباسىنا سالتاناتتى تۇردە پاتەر كىلتتەرى تابىس ەتىلدى. دەپ حابارلادى شقو اكىمىنىڭ ءباسپاسوز قىزمەتى.
قازىر شىعىس قازاقستاندا كوكتەمگى اپاتتىڭ سالدارىن جويۋ جۇمىستارى قارقىندى جۇرگىزىلۋدە. ماسەلەن, اياگوزدە سەمەي قالاسى مەن تارعاباتاي اۋدانىنىڭ 5 قۇرىلىس كومپانياسى جۇمىس ىستەپ جاتىر. بۇعان دەيىن 118 ميلليوننان استام تەڭگەگە 28 وتباسىنا تۇرعىن ءۇي ساتىلىپ الىنعانى حابارلانعان ەدى. بۇگىن ولاردىڭ قاتارى 13-كە تولىقتى. بۇدان بولەك قازاقستان مۇسىلماندارى ءدىني باسقارماسى جانە «NFS Kazakhstan» جشس قولداۋىمەن 2 جانۇيا باسپانالى بولدى. «بيىلعى كوكتەم ءبىزدىڭ ءوڭىر ءۇشىن وڭاي بولعان جوق. تاسقىننان 2 قالا, 5 اۋدان, 33 ەلدى مەكەن زارداپ شەكتى. قازىرگى تاڭدا ارنايى كوميسسيا جۇمىس ىستەپ جاتىر, قاراجات ءبولىندى. وبلىس بويىنشا 23 قۇرىلىس ۇيىمى جوندەۋ-قالپىنۋ كەلتىرۋ جۇمىستارىن جۇرگىزۋدە», - دەدى سالتاناتتى جيىندا ءسوز العان وبلىس اكىمىنىڭ ورىنباسارى اسەم ءنۇسىپوۆا.
اۋدان اكىمى باقىتجان باياحمەتوۆتىڭ ايتۋىنشا, قازىرگى ۋاقىتتا جوندەۋ جۇمىستارى جۇرگىزىلۋى ءتيىس 92 ءۇيدىڭ 65-ىندە جوندەۋ جۇرگىزىلىپ جاتىر. «12 ءۇي باقىلاۋدا, قالعان 15-ءىنىڭ جوندەۋ مەرزىمى يەلەرىنىڭ قالاۋىمەن كەيىنگى شەگەرىلدى», - دەيدى ول.
اياگوز اۋدانىنا جۇمىس ساپارىمەن بارعان وبلىس اكىمىنىڭ ورىنباسارى ءا.ءنۇسىپوۆا الداعى ۋاقىتتا اياگوز جانە زىريان اۋداندارىندا زاماناۋي قۇرىلعىلارمەن جابدىقتالعان ينسۋلت ورتالىقتارى اشىلاتىنىن جەتكىزدى. سوندا اياگوزدە ءۇرجار, تارباعاتاي, جارما, زىريان اۋدانىندا كۇرشىم مەن كاتونقاراعاي اۋداندارىنىڭ تۇرعىندارى ەم قابىلدايتىن بولادى.