قوستاناي پەداگوگيكالىق ينستيتۋتى ۋنيۆەرسيتەت مارتەبەسىن الدى

پەداگوگيكا ينستيتۋتىن بىتىرگەن قوستانايلىق جاستار ءارى قاراي جوعارى ءبىلىمىن ماگيستراتۋرا, دوكتورانتۋرا دارەجەسىندە جالعاستىرۋ ءۇشىن ولار الماتىداعى ەكى جوعارى وقۋ ورنىنا نەمەسە ىرگەدەگى رەسەيدىڭ پەداگوگيكا ۋنيۆەرسيتەتتەرىنە بارۋى كەرەك بولاتىن. ينستيتۋتتان كەيىن وتباسىن قۇرىپ, مەكتەپتەردە قىزمەت ىستەيتىن مۇعالىمدەرگە ماگيستراتۋرادا وقۋ قيىندىق تۋعىزاتىن. 

جوعارى وقۋ ورنىنىڭ جاڭا مارتەبەسى بىزگە ماگيستراتۋرا مەن دوكتورانتۋرالىق وقۋ باعدارلامالارىن اشۋعا زاڭدى مۇمكىندىك بەردى. ءبىز پسيحولوگيا جانە پەداگوگيكا ماماندىعى بويىنشا ماگيستراتۋرا ليتسەنزياسىن الىپ تا ۇلگەردىك. الداعى جىلدارى تۇلەكتەر 12-13 ماماندىق بو­يىنشا ماگيستراتۋرا وقۋ باعدارلاماسىن سىرتتان ىزدەمەي, وزىمىزدە وقيتىن بولادى, دەيدى ۋنيۆەرسيتەت رەكتورى ەركىن ءابىل. سونىمەن قاتار ءبىلىم ورداسىندا ءبىر-ەكى ماماندىق بويىنشا دوكتورانتۋرا وقۋ باعدارلاماسىن اشۋعا دايىندىق جۇمىستارى جۇرگىزىلۋدە. 

جاڭا پەداگوگيكالىق ۋنيۆەرسيتەتتە ستۋدەنتتەردىڭ الاڭسىز ءبىلىم الۋى ءۇشىن الەۋمەتتىك قولايلى جاعداي دا جاسالادى. ەلباسىنىڭ «پرەزيدەنتتىڭ بەس الەۋمەتتىك باستاماسى» ۇندەۋىنەن باستاۋ الاتىن جۇمىستار قازىردىڭ وزىندە قولعا الىندى. بيىل 86 ورىندىق ءبىر جاتاقحانانىڭ قۇرىلىسى باس ­تالادى. ءتورت جىلدا ۋنيۆەرسيتەتتە بارلىعى 444 ورىندىق جاتاق­حانا كەشەنى بوي تۇزەيتىن بولادى. ۋنيۆەرسيتەت رەك­تورىنىڭ ايتۋىنشا, الداعى جىلدارى ءبىلىم ورداسى ستۋدەنت­تەردى جاتاقحانامەن تولىق قامتيدى. 

قوستاناي مەملەكەتتىك پەداگوگيكالىق ۋنيۆەرسيتەتى ينستيتۋت بولىپ تۇرعاندا دا وعان جاستار تەك قوستاناي توڭىرەگىنەن عانا ەمەس, قازاقستاننىڭ سولتۇستىك وبلىستارىنان دا كەلىپ وقيتىن. قازىر «سەرپىن» باعدارلاماسى بويىنشا قازاقستاننىڭ وڭتۇستىك وبلىستارىنان, ءبىر سەمەسترگە قىتايدان كەلىپ وقىپ جاتقان جاستار بار. جاتاقحانا ماسەلەسى شەشىمىن تاپقان ۋاقىتتا ۋنيۆەرسيتەت ۇجىمى قىرعىزستاننان, وزبەكستاننان, تۇرىكمەنستاننان, كورشى رەسەيدەن دە تالاپكەرلەر تارتۋدى, ولارعا ارناپ قوسىمشا باعدارلاما جاساۋدى دا ويلاستىرىپ وتىر. 

ءنازيرا جارىمبەت, «ەگەمەن قازاقستان»

قوستاناي