كەڭەستىك زاماننان قالعان سەنبىلىكتىڭ عۇمىر جاسى ۇزاق بولاتىن سياقتى. مۇنى قالايتىندار ەڭ الدىمەن اكىمدىكتەر ارينە. تەگىن جۇمىس كۇشىن پايدالانىپ, قىرۋار شارۋانىڭ باسىن قايىرىپ العاندى كىم جەك كورسىن؟!
ءتىپتى شوتقا قاعىپ, ەسەپكە الار بولسا, مۇنداي شارانىڭ ءوزى بيۋدجەت قاراجاتىنىڭ ۇنەمدەلۋىنە از شاراپاتىن تيگىزبەيتىن بولسا كەرەك. شەنەۋنىكتەرگە سالساڭىز, تۇرعىندار مۇنداي يگى شاراعا قارسى بولماۋى كەرەك: نەسى بار, تازالاسا – وزدەرى تۇراتىن قالا, اۋلا, ورتاق شارۋانىڭ قامى. ءپاتريوتيزمنىڭ ءوزى وسىنداي ۇساق-تۇيەك شارۋالاردان باستاۋ الماي ما؟
كەنشىلەر استاناسىندا 9 ساۋىردەن باستاپ 1 ماۋسىمعا دەيىن كەزەڭ-كەزەڭىمەن سەنبىلىك اكتسيالارى وتپەكشى. «بارشا قاراعاندىلىقتاردى سەنبىلىككە قاتىسۋعا شاقىرامىن. ءوز اۋلالارىڭىزداعى ساكىلەردى سىرلاپ, اعاش وتىرعىزىڭىزدار. بۇل – ءبىزدىڭ ءداستۇرىمىز, ورتاق جۇمىسىمىز. سەنبىلىك – جازدى تازا اۋلامەن قارسى الۋ ءۇشىن كەرەك», دەدى قاراعاندىداعى قازىبەك بي اۋدانىنىڭ اكىمى تاتيانا شاتوحينا.
قاراعاندىنىڭ اتقامىنەرلەرى ەكى الاقاندى ىسقىلاپ, سەنبىلىككە مۇقيات دايىندالعان ەكەن. مۇنداي مۇمكىندىكتى قالايشا ءمۇلت جىبەرۋگە بولادى؟ سونىمەن قازىبەك بي اۋدانى بويىنشا 15 000 گەكتار اۋماق كۇل-قوقىستان تازارۋى كەرەك ەكەن. سەنبىلىككە قاتىسۋى ءتيىس ادامدار سانى دا ەسەپكە الىنىپ, تىزىمگە تىركەلىپ قويعانعا ۇقسايدى. ياعني بۇل كۇندەرى كوشەگە 87 مىڭنان استام ادام قولدارىنا قاراعان سىپىرعىش پەن كۇرەك الىپ, قىستان قالعان قوقىسقا قارسى مايدان اشاتىن كورىنەدى.
ەرىكتى تۇردە سەنبىلىككە شىعاتىن بەلسەندى ازاماتتاردى ەكپىندى ەڭبەككە ىنتالاندىرىپ قويۋ جاعى دا ۇمىتىلماعان. «ەڭ ۇزدىك اۋلا», «بۇكىل وتباسىمەن اعاش ەك» دەگەن جىل سايىنعى اكتسيالار بيىل دا جالعاسىن تاپپاق.
البەتتە, ءومىر سۇرەتىن قالاڭنىڭ, تۇرىپ جاتقان اۋلاڭنىڭ مۇنتازداي تازا بولعانىن كىم جەك كورسىن. قاراعاندىلىقتاردىڭ قالا باسشىلارىنىڭ ۇندەۋىنە تۇسىنىستىكپەن قارايتىنىنا كۇمان جوق. جۇرتتىڭ ءبارى تىزىمنەن قورقىپ قولىنا كۇرەك, سىپىرعىش الادى دەپ مۇقاتۋدىڭ ءجونى جوق شىعار. ولاردىڭ ىشىندە دە سانالى تۇردە كوشە سىپىرۋعا شىعىپ, تۋعان قالاسىنداعى تازالىقتىڭ تىلمەن جالاعانداي بولۋىن قالايتىندار بولۋى ابدەن مۇمكىن عوي.
تاياۋدا ءوڭىر باسشىسى ەرلان قوشانوۆ قاراعاندىداعى ساتباەۆ كوشەسىن جاياۋ ارالاعان ەكەن. سويتسە, وسىدان ەكى جىل بۇرىن جوندەۋدەن وتكەن كوشەنىڭ ساۋ-تامتىعى قالماپتى. اپپارات جيىنىندا وسى جايتتى ايتا كەلىپ, ءوڭىر باسشىسى قالا اكىمى نۇرلان اۋباكىروۆتى سىننىڭ استىنا الدى. «قالانى قوقىستان جاقسىراق تازارتۋ قاجەت. كەشە تاڭەرتەڭ مەن قاراعاندىنى ارالاپ شىقتىم. تۇسىنىكتى, ارينە قار ەندى عانا ەرىدى, بىراق ءبىز قوقىسقا كومىلىپ جاتىرمىز. ءبىر اپتادان سوڭ مەن ۇنەمى قالانى ارالاۋعا شىعاتىن بولامىن. نۇرلان ەرىكباي ۇلى, ءسىز قالانىڭ باسشىسى رەتىندە ەرتەرەك ويانىڭىز. مەن ەمەس, ءسىز قالانى ۇنەمى ارالاپ وتىرۋىڭىز كەرەك», دەدى ەرلان قوشانوۆ.
قالا اكىمى بار كىنانى قار سۋىنا ارتتى. بارىنە كىنالى – قىستا جاۋىپ, كوكتەمدە ەريتىن قار ەكەن. مەردىگەرلەر سولاي دەپ ءتۇسىندىرىپتى قالا اكىمىنە. ارينە شاھار باسشىسىنىڭ مۇنداي ءۋاجى وبلىس اكىمىن قاناعاتتاندىرمادى. ءوڭىر باسشىسى باس مەردىگەردەن تىندىرعان جۇمىستارىنىڭ ساپاسىنا جاۋاپ بەرۋىن تالاپ ەتۋ كەرەكتىگىن ايتتى.
قازاقتا «ەرتە تۇرعان ەركەكتىڭ ىرىسى ارتىق» دەگەن بار. ەندى قالا اكىمى وبلىس باسشىسىنىڭ ەسكەرتپەسىنەن كەيىن بۇرىنعىدان دا ەرتەرەك تۇراتىن بولار. تەك, ماسەلە مۇنىمەن بىتە قويسا جاقسى عوي. گاپ ءىستىڭ قيۋىن تابۋدا, شارۋانى ۇيىمداستىرا بىلۋدە. ايتپەسە قاراعاندى سياقتى قازىنالى شاھاردىڭ كوممۋنالدىق سالادا ءتارتىپ ورناتۋعا قاجەتتى قارجىلىق ءھام تەحنيكالىق مۇمكىندىگى جوق دەگەنگە كىم سەنسىن؟
قايرات ءابىلدا,
«ەگەمەن قازاقستان»
قاراعاندى
سۋرەتتى تۇسىرگەن ەرلان ومار,
«ەگەمەن قازاقستان»