ءدال وسى كۇندەرى وڭدەۋ ونەركاسىبى كاسىپورىندارىن ىرىلەندىرۋ قولعا الىنا باستادى. وتاندىق ىسكەرلەر جۇمىلىپ ماسەلە شەشۋ, وتكىزۋ نارىقتارىن كەڭەيتۋ مەن ءوندىرىستى جاڭعىرتۋ ماقساتىندا «وڭدەۋ ونەركاسىبى كاسىپورىندارى وداعىنا» بىرىگىپ وتىر.
جاڭا بىرلەستىكتى قۇرۋ تۋرالى باستاما ورتالىق كوممۋنيكاتسيالار قىزمەتىندە وتكەن بريفينگ بارىسىندا حابارلاندى. وداققا ماشينا جاساۋ كاسىپورىندارى مەن «اتامەكەن» قر ۇلتتىق كاسىپكەرلەر پالاتاسىندا تىركەلگەن التى سالالىق قاۋىمداستىق كىردى. بۇل قاۋىمداستىقتاردىڭ قۇرامىندا ءتۇرلى جوعارى تەحنولوگيالىق ءونىم شىعاراتىن 243 كومپانيا بار.
«اتامەكەن» قر ۇكپ باسقارما توراعاسىنىڭ ورىنباسارى قۋانىش ءبيشىموۆ پالاتانىڭ جاڭا بىرلەستىك اياسىندا بيزنەسمەندەر بىرلەسكەن جۇمىسقا دايىن ەكەنىن حابارلادى. بۇگىندە ۇلتتىق پالاتادا 140-تان استام ءتۇرلى قاۋىمداستىق اككرەديتتەلگەن. بيزنەستىڭ سالالىق قاعيدات بويىنشا شوعىرلانۋى دامۋدىڭ وزەكتى ماسەلەلەرىن شەشۋدە بىرىككەن مىقتى شەشىمدەر جاساۋعا جول اشادى.
ء«بىز قاشاندا قاۋىمداستىقتاردىڭ ىرىلەنۋىن قولداپ كەلدىك. بيزنەس ءوزىنىڭ ىشكى ماسەلەلەرىن جاقسى بىلەدى ءارى ولاردى شەشۋ ءۇشىن ءتيىمدى ۇسىنىستاردى دايىنداي الادى. «اتامەكەن» ىسكەرلىك سالاعا ءوز ماسەلەلەرىن شەشۋ ءۇشىن اقىلداسىپ, تالقىلاۋ جۇمىستارىنا ءوز الاڭدارىن بەرۋگە ارقاشان دايىن. «اتامەكەن» زاڭنامالار مەن ءنورماتيۆتى-قۇقىقتىق اكتىلەرىنە بيزنەس پەن سالالىق قاۋىمداستىقتاردىڭ ۇسىنىستارى مەن ەسكەرتپەلەرىن ەنگىزدى. ولاردىڭ 70 پايىزدان استامى مەملەكەتتىك ورگاندار تاراپىنان ەسكەرىلگەن», – دەدى قۋانىش ءبيشىموۆ.
ۇكپ باسقارما توراعاسىنىڭ ورىنباسارى قازىرگى تاڭدا «اتامەكەن» مەملەكەتتىك ساتىپ الۋلار جۇيەسىن جەتىلدىرۋ جولىندا جۇمىس اتقارىپ جاتقانىن مالىمدەدى. باستى مىندەت – ۇدەرىستىڭ ترانسپارەنتتىلىگىن قامتاماسىز ەتۋ, وتاندىق تاۋار وندىرۋشىلەر قاتىسۋىنىڭ باسىمدىعى جانە قازاقستاندىق بيزنەستىڭ باسەكەگە قابىلەتتىلىگىن ارتتىرۋ. ۇزاقمەرزىمدى مەملەكەتتىك تاپسىرىستار – دامۋدىڭ جاقسى مۇمكىندىگى.
«بىرىگۋ ۇدەرىسىن تاماشا جۇزەگە اسىرىپ وتىرعان «جاسامپاز» كونتسورتسيۋمى جۇمىسىن ەرەكشە اتاپ ايتۋعا بولادى. اتالاعان بىرلەستىك قر قورعانىس مينيسترلىگىمەن كيىم م ۇلىگىن جەتكىزۋ بويىنشا 5 جىلعا شارت جاساسقان. كاسىپكەرلەر تەحنولوگيالىق شەڭبەردى بەكىتە الدى. ياعني ماقتا وسىرۋدەن باستاپ, وندىرىستىك ماتەريالدار مەن دايىن ءونىم شىعارۋعا دەيىن ۇدەرىستى جۇزەگە اسىرىپ وتىر. بيزنەس ۇزاقمەرزىمدى شارتتار, ءوسۋ, كەلەشەكتىك, ينۆەستيتسيالار تارتۋ مەن ءوندىرىستى جاڭعىرتۋدا باتىل قادام جاساي الادى. كونتسورتسيۋم 5 جىل ىشىندە وندىرىسىتك تىزبەكتى تەرەڭدەتىپ, جوعارى قوسىلعان قۇنى بار ءونىم جاساۋعا 6 ملرد تەڭگە سالۋدى ءوز مىندەتىنە الدى. جاڭا وداق پەن «اتامەكەننىڭ» وسى ماسەلەدە ويى ءبىر جەردەن شىعۋ كەرەك دەپ سانايمىن. شيكىزاتتان باستاپ دايىن ونىمگە دەيىن ءوندىرىستى قولعا الۋىمىز كەرەك», – دەدى قۋانىش ءبيشىموۆ.
كاسىپكەرلەردىڭ ايتۋىنشا «وڭدەۋ ونەركاسىبى كاسىپورىندارى وداعى» ۇلتتىق پالاتا الاڭىن قوسا العاندا مەملەكەتتىك ورگاندارمەن بولاتىن تالقىلاۋلاردا سالا دامۋىن العا تارتۋ ءۇشىن سالانى دامىتۋدىڭ نەگىزگى ستراتەگيالىق باعىتتارى بويىنشا قاتىسۋشىلاردىڭ بىرىڭعاي ۇستانىمىن دامىتۋعا نيەتتى.
«مەملەكەتتىڭ ەكونوميكالىق دامۋىنىڭ جاڭا مودەلىندە وڭدەۋ ونەركاسىبى سەكتورىن جاڭعىرتپاي بولمايدى. ول ءۇشىن مودەرنيزاتسيانىڭ وزەكتى فاكتورلارىنا – تەحنولوگيالار مەن قارجى كوزدەرىنە قولجەتىمدىلىك بويىنشا ماسەلەنى شەشۋ كەرەك. سونىمەن قاتار دايىن ءونىمدى وتكىزۋ ءۇشىن ىشكى جانە ەكسپورتتىق نارىقتارعا شىعۋدا بارلىق كەدەرگىلەردى ازايتۋ قاجەت», – دەيدى «وڭدەۋ ونەركاسىبى كاسىپورىندارى وداعىنىڭ» باسقارما توراعاسى مارات باققۇلوۆ.
ايناش ەسالي,
«ەگەمەن قازاقستان»