قاراعاندى وبلىستىق اكىمدىگىندە وتكەن جيىندا «سارىارقا» ماگيسترالدى گاز قۇبىرىنىڭ قۇرىلىسى» جوباسىن ازىرلەۋشىلەر ۇسىنعان نەگىزگى تەحنيكالىق شەشىمدەر تالقىلاندى. گاز ماگيسترالىنىڭ باسىم بولىگى قاراعاندى وبلىسى ارقىلى وتەتىندىكتەن, بۇگىندە ايماقتاعى بىرقاتار ماسەلەلەر شەشىمىن تاۋىپ جاتىر.
– قازىرگى تاڭدا «سارىارقا» ماگيسترالدى گاز قۇبىرىنىڭ قۇرىلىسى» جوباسىن جۇزەگە اسىرۋ بويىنشا بەلسەندى جۇمىس جۇرگىزىلۋدە. بۇگىنگى كۇنگە دەيىن تەحنيكالىق-ەكونوميكالىق نەگىزدەمە ازىرلەندى, مەملەكەتتىك ساراپتامانىڭ وڭ قورىتىندىسى الىندى. سونداي-اق جوبالاۋ-سمەتالىق قۇجاتتامالاردى ازىرلەۋ اياقتالۋ كەزەڭىنە جاقىندادى, – دەپ مالىمدەدى «قازترانسگاز» اق باس ديرەكتورىنىڭ ورىنباسارى سەرىكقالي برەكەشەۆ.
«قازترانسگاز» اق جوبانىڭ تاپسىرىس بەرۋشىسى بولىپ تابىلادى, تەحنيكالىق-ەكونوميكالىق نەگىزدەمە ازىرلەۋشى رەتىندە «كاتەك» جشس كونسورتسيۋمى تاڭدالعان. نەگىزگى تەحنيكالىق شەشىمدەردى جينالىس بارىسىندا جوبالاۋ ۇيىمىنىڭ باس ديرەكتورى قۇندىز نۇپوۆ تانىستىردى.
ناقتىلانعان مالىمەتتەر بويىنشا, ماگيسترالدى گاز قۇبىرىنىڭ استاناعا دەيىنگى ۇزىندىعى 1063 شاقىرىمدى قۇرايدى, ونىڭ 764-ءى قاراعاندى وبلىسىنا تيەسىلى.
– جەر ماسەلەلەرىنە, ينفراقۇرىلىمعا قاتىستى نەگىزگى جۇمىس قاراعاندى وبلىسىمەن بايلانىستى بولادى, – دەپ اتاپ ءوتتى بايانداماشى. – قۇرىلىس ەكى كەزەك بويىنشا جۇرگىزىلەدى. ءبىرىنشىسى استاناعا گاز بەرۋمەن اياقتالادى. ول جۇمىستاردىڭ ىشىنە قۇبىرلاردى توسەۋ جانە گازبەن قامتۋ جۇيەسىن سالۋ كىرەدى. ءبىرىنشى كەزەك 2018-2019 جىلداردى قامتىسا, قۇرىلىستىڭ ەكىنشى كەزەگى 2019-2020 جىلدارعا دەپ جوسپارلانعان.
ءبىرىنشى كەزەكتىڭ قۇنى 264,4 ملرد تەڭگەنى قۇرايدى. گاز قۇبىرىنىڭ بىرەگەيلىگى – ونىڭ 100 اتموسفەرا قىسىمعا شىداي الاتىندىعىندا.
– اۆتوماتتاندىرىلعان گاز تاراتۋ ستانسالارى قاراعاندى وبلىسىنىڭ ءۇش قالاسىندا – جەزقازعان, قاراعاندى جانە تەمىرتاۋدا ورنالاساتىن بولادى. سونىمەن قاتار اۋداندارعا ارنالعان الەۋەتتى اگتس-كە قاجەتتى 5 بۇرما بولادى, ولاردى دايىن بولۋىنا قاراي ىسكە قوسىپ وتىرادى, – دەدى قۇندىز نۇپوۆ. – گازبەن قاراعاندى وبلىسىنىڭ 119 ەلدى مەكەنى قامتىلاتىن بولادى.
ايماق ەكونوميكالىق, ەكولوگيالىق جانە الەۋمەتتىك تيىمدىلىككە يە بولادى, دەپ اتاپ ءوتتى ول. ەسەپتەۋلەر بويىنشا, جىل سايىنعى ينۆەستيتسيالار 10-15 ملرد تەڭگەگە دەيىن جەتەدى. گاز قۇبىرىن سالۋدا پايدالانىلاتىن قۇرىلىس ماتەريالدارىن شىعاراتىن قاراعاندىلىق كاسىپورىندار تاڭدالىپ جاتىر. جوبانى جۇزەگە اسىرۋ قوسىمشا جۇمىس ورىندارىن قامتاماسىز ەتەدى: 2000-عا دەيىن ادام قۇرىلىس كەزىندە جۇمىسقا تارتىلادى. سونىمەن قاتار 1000-عا جۋىق جۇمىسكەر گاز قۇبىرىنىڭ قىزمەت ەتۋىن قامتاماسىز ەتۋ ءۇشىن قاجەت بولادى.
وبلىس اكىمى ەرلان قوشانوۆ قاراماعىنداعى قىزمەتكەرلەرگە جەدەل تۇردە جانە بارىنشا جاۋاپكەرشىلىكپەن جوبالاۋشىلارمەن بىرلەسىپ, تۋىنداعان ماسەلەلەردى دەر ۋاعىندا شەشىپ وتىرۋدى تاپسىردى.
– گاز قۇبىرىنىڭ قۇرىلىسى – ەلباسىنىڭ بەس الەۋمەتتىك باستامالارىنىڭ ءبىرى. بۇل اۋقىمدى جۇمىس. بۇل جوبانى ءبىزدىڭ تۇرعىندار, كاسىپكەرلەرىمىز تاعاتسىزدانا كۇتتى. گاز – ول ءبىزدىڭ ايماعىمىزدىڭ الەۋمەتتىك-ەكونوميكالىق دامۋىنداعى جاڭا قۇرال. بۇل جوبانى جۇزەگە اسىرۋ تۇرعىنداردىڭ ءومىر ساپاسىن جوعارىلاتۋعا جول اشادى, – دەپ اتاپ ءوتتى ەرلان قوشانوۆ.
ءوڭىر باسشىسى سونىمەن قاتار جوبانىڭ جۇزەگە اسىرىلۋىنا قاتىستى ماسەلەلەردى ۇدايى باقىلاۋدا ۇستايتىنىن جەتكىزدى.
قايرات ءابىلدا, «ەگەمەن قازاقستان»