پارلامەنت سەناتى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى, دەپ حابارلادى سەناتتىڭ ءباسپاسوز قىزمەتى.
زاڭ جوباسىنىڭ ماقساتى بيزنەس-ورتانى جاقسارتۋ مەن كەڭەيتۋ, كاسىپكەرلەرگە اكىمشىلىك كەدەرگىلەردى قىسقارتۋ جانە اۋىرتپالىقتى ازايتۋ اياسىندا زاڭنامالىق بازانى جەتىلدىرۋ بولىپ تابىلادى.
زاڭ جوباسى مەملەكەتتىك باقىلاۋ-قاداعالاۋ قىزمەتىن رەفورمالاۋعا, اقپاراتتىق قۇرالداردى رەتتەۋدى جانە رەتتەۋشى اسەردى تالداۋ تەتىگىن جەتىلدىرۋگە, تابيعي مونوپوليا سۋبەكتىلەرى مەن كۆازيمەملەكەتتىك سەكتور كورسەتەتىن مىندەتتى قىزمەتتەردى رەفورمالاۋعا, سونداي-اق باسەكەگە كەدەرگى جاسايتىن نورمالاردى الىپ تاستاۋعا باعىتتالعان.
ودان باسقا, زاڭ جوباسىمەن بيزنەس شىعىندارىن جاپپاي تومەندەتۋ جانە «Doing Business» رەيتينگىندە قازاقستان جاعدايىن جاقسارتۋ جونىندەگى شارالار كوزدەلىپ وتىر.
زاڭ جوباسىمەن بىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزىلەدى.
سونداي-اق پروفيلاكتيكالىق باقىلاۋدى قامتيتىن مەملەكەتتىك باقىلاۋ مەن قاداعالاۋدىڭ جاڭا جۇيەسى ۇسىنىلادى. ماسەلەن, ىرىكتەۋ تارتىبىمەن جۇزەگە اسىرىلاتىن تەكسەرۋلەردىڭ ورنىنا نەگىزگى ايىرماشىلىعى اكىمشىلىك ءىس جۇرگىزۋدى قوزعاماستان قۇقىق بۇزۋشىلىقتاردىڭ پروفيلاكتيكاسى مەن الدىن الۋ بولىپ تابىلاتىن پروفيلاكتيكالىق باقىلاۋدىڭ جاڭا ينستيتۋتى ەنگىزىلەدى. وسىعان بايلانىستى, اكىمشىلىك قۇقىق بۇزۋشىلىق تۋرالى كودەكسكە كورسەتىلگەن فۋنكتسيالارمەن جانە اكىمشىلىك ءىس قوزعاۋ جونىندەگى ۋاكىلەتتى ورگانداردىڭ قۇزىرەتىمەن ۇشتاستىرىلعان ءتيىستى وزگەرىستەر ەنگىزىلەدى. بۇل رەتتە, سۋبەكتىگە (وبەكتىگە) بارۋ ارقىلى پروفيلاكتيكالىق باقىلاۋ مەن قاداعالاۋ تاۋەكەلدەردى باعالاۋ نەگىزىندە جۇزەگە اسىرىلاتىن بولادى.
زاڭ جوباسى اياسىندا باقىلاۋدىڭ جيىرما سالاسى مەن بىرقاتار باقىلاۋ فۋنكتسيالارى قايتالانۋشى جانە ءتيىمسىز رەتىندە الىنىپ تاستالادى.
سونىمەن قاتار زاڭ جوباسىمەن جەكە جانە زاڭدى تۇلعالار ءۇشىن مىندەتتى قىزمەتتەردى كورسەتۋ جونىندەگى تابيعي مونوپوليا سۋبەكتىلەرى مەن كۆازيمەملەكەتتىك كاسىپورىنداردىڭ جۇمىسىن رەتتەۋ جونىندەگى ەرەجەلەر ەنگىزىلەدى. اتاپ ايتقاندا ۇكىمەتكە وسىنداي كورسەتىلەتىن قىزمەتتەردىڭ تىزبەسىن بەكىتۋ جونىندەگى, ال ەكونوميكا سالاسىنداعى ۋاكىلەتتى ورگانعا ولاردى كورسەتۋ ءتارتىبىن ايقىنداۋ جونىندەگى قۇزىرەت بەرەتىن ەرەجە كوزدەلدى.
مەملەكەتتىك رەتتەۋ قۇرالدارىن ساپالى باعالاۋ ءۇشىن زاڭ جوباسىمەن جەرگىلىكتى دەڭگەيدەگى جانە ورتالىق مەملەكەتتىك ورگاندار ۆەدومستۆولارىنىڭ بارلىق شەشىمدەرىنە رەتتەۋشى اسەردى تالداۋ ءراسىمىن قولدانۋ, سونداي-اق بيزنەسكە اسەر ەتۋدى باعالاۋدى كۇشەيتۋ ۇسىنىلادى.
قورشاعان ورتانى قورعاۋ جانە حالىقتىڭ سانيتاريالىق-ەپيدەميولوگيالىق سالاۋاتتىلىعى سالاسىندا تەكسەرۋلەردىڭ ناتيجەلەرى تۋرالى اكتىلەرگە شاعىم جاساۋ جونىندەگى اپەللياتسيالىق كوميسسيا ينستيتۋتى ەنگىزىلەدى.
زاڭ جوباسى پالاتانىڭ قاراۋىنا جىبەرىلدى.