ورتالىق كوممۋنيكاتسيالار قىزمەتىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ايگۇل شايىموۆانىڭ جانە «رۋحاني جاڭعىرۋ» باعدارلاماسىنىڭ «وزگەرىستەردى وزىڭنەن باستا» اتتى ىشكى باعدارلاماسىنىڭ باس مەنەدجەرى شىڭعىس تورەگەلديننىڭ قاتىسۋىمەن ءباسپاسوز كونفەرەنتسياسى ءوتتى.
قازىرگى تاڭدا «100 ناقتى قادام» ۇلت جوسپارى شەڭبەرىندە مەملەكەتتىك قىزمەتتى رەفورمالاۋدىڭ ءۇشىنشى كەزەڭى جۇرگىزىلۋدە. ايگۇل شايىموۆانىڭ ايتۋىنشا, ۇلت جوسپارى جۇزەگە اسىرىلعالى بەرى مانساپ ساتىسىمەن قىزمەتتە جوعارىلاعان قىزمەتكەرلەردىڭ سانى 4 ەسە وسكەن. الەۋمەتتىك ساۋالدامالاردىڭ ناتيجەلەرى بويىنشا رەسپوندەنتتەردىڭ 77 پايىزىنان استامى كادرلىق شەشىمدەردىڭ قابىلدانۋى كەزىندە مەريتوكراتياعا سەنەدى, ال 2001 جىلى بۇل كورسەتكىش 39 پايىزى عانا بولعان. باسەكەلەستىكتەن تىس تاعايىنداۋلار, ياعني «كوماندالىق اۋىس-تۇيىستەر» 19 ەسەگە قىسقارتىلعان. اۋقىمدى الدىن الۋ جۇمىستارىنىڭ ارقاسىندا ەتيكالىق قۇقىق بۇزۋشىلىقتاردىڭ سانى ازايعان. ماسەلەن وتكەن جىلى 2015 جىلمەن سالىستىرعاندا ولاردىڭ سانى 43 پايىزعا (354-تەن 202-گە دەيىن) تومەندەگەن.
ساراپشىلاردىڭ باعالاۋى بويىنشا, بۇگىنگى تاڭدا قازاقستاندىق مەملەكەتتىك قىزمەت سالاسى حالىقارالىق ستاندارتتارعا سايكەس كەلەدى. «بۇگىنگى كۇنى مەملەكەتتىك قىزمەتكەرلەردىڭ ورتاشا جاسى – 39 جاس, ال 1991 جىلى ول 44 جاس بولعان. مەملەكەتتىك قىزمەتشىلەردىڭ ساپالىق قۇرامى ءوستى. قازاقستاندا دامىعان ەلدەردىڭ جەتىستىكتەرىن ۇلتتىق مەملەكەتتىك جۇيەنىڭ ەرەكشەلىكتەرىمەن بىرىكتىرەتىن وزىندىك مودەل قۇرىلدى دەپ سەنىممەن ايتا الامىز. بۇل ناتيجەلەرگە ءبىز مەملەكەت باسشىسىنىڭ كورەگەن ساياساتىنىڭ ارقاسىندا قول جەتكىزدىك», دەدى جيىندا ا.شايىموۆا.
ءباسپاسوز ءماسليحاتى قورىتىندىسىندا ايگۇل شايىموۆا مەملەكەتتىك قىزمەتشىلەر كۇنى قارساڭىندا بۇكىل ەل بويىنشا «ۇزدىك مەملەكەتتىك قىزمەتشى» اتاعىنا ىرىكتەۋ وتكىزىلىپ جاتقانىن اتاپ ءوتتى. ول ءار قىزمەتكەردى ازاماتتاردى الەۋمەتتىك تۇرعىدا قولداۋعا ۇلەس قوسۋعا شاقىردى.
راۋان قايدار,
«ەگەمەن قازاقستان»