استاناداعى ۇلتتىق اكادەميالىق كىتاپحانادا قازاقستان جازۋشىلار وداعىنىڭ توراعاسى ۇلىقبەك ەسدəۋلەت پەن توراعانىڭ ءبىرىنشى ورىنباسارى اقبەرەن ەلگەزەك استانا قالاسىندا تۇراتىن اقىن-جازۋشىلارمەن كەزدەسۋ جيىنىن وتكىزدى.
جاقىندا عانا سايلانعان توراعا استاناداعى اقىن-جازۋشىلارمەن امانداسا كەلگەنىن ايتىپ, الداعى جۇمىس جوسپارلارى تۋرالى اڭگىمەلەدى. وندا بيىل باستالىپ جاتقان قازاقستانداعى وزبەكستان جىلى اياسىندا ەكى ەلدىڭ ادەبي شىعارماشىلىق بايلانىسىن تەرەڭدەتىپ, ساپالى اۋدارما ارقىلى كىتاپتار شىعارۋ قولعا الىنىپ جاتقانىن, جالپى, قازاقستان جازۋشىلارىنىڭ شىعارمالارىن شەتەلدە ناسيحاتتاۋدا ءبىرشاما جوبا ازىرلەپ, ءتيىستى مەكەمەلەرگە ۇسىنىپ, ولاردان قولداۋ تاۋىپ وتىرعانىن ايتتى.
سونىمەن بىرگە جازۋشىلار وداعىنىڭ قاراماعىنداعى باياعى «شىعارماشىلىق ءۇيىن» قايتا جانداندىرىپ, ونى وسى ۇيىمعا مۇشە كەز كەلگەن قالامگەر جەڭىلدەتىلگەن تارتىپپەن پايدالانۋىنا مۇمكىندىك جاسالعانىن حابارلادى. ياعني, قوناق ءۇي ءۇش ۋاقىتقى تاماعى ىشىندە جوعارى ساپاداعى قىزمەتى ءۇشىن قالامگەرلەردەن كۇنىنە بەس مىڭ تەڭگە كولەمىندە عانا تولەم الادى. سونداي-اق ەڭبەك دەمالىسىنا شىققان قارت قالامگەرلەر ءۇشىن دە ەمدەۋ-دەمالىس ورىندارىنان جەڭىلدىكتەر قاراستىرىلعان ەكەن. ال, جاقىندا 20-دان استام جاڭا مۇشە قابىلداپ, وڭىردەگى بولىمشەلەرىنە جاس اقىن-جازۋشىلاردان ديرەكتور سايلاپ جاتقانىن وداقتى «جاسارتىپ», جۇمىسىن جانداندىرۋ ءۇشىن ىستەلىپ جاتقان جۇمىس دەپ اتادى.
«وڭىرلەردەگى بۇرىنعى اعا بۋىن وكىلدەرى وزدەرى دە «جاستار جۇمىس ىستەسە» دەپ ۇسىنىس جاسادى. ءسويتىپ قازاقستان جازۋشىلار وداعىنىڭ قاراعاندى وبلىسىنداعى فيليالىنا اقىن سەرىك اقسۇڭقار ۇلىنىڭ ورنىنا جازۋشى سەرىك ساعىنتاي ۇلىن, الماتى وبلىسىنداعى فيليالىنا جازۋشى ناعاشىبەك قاپالبەك ۇلىنىڭ ورنىنا اقىن ەرلان ءجۇنىستى, جامبىل وبلىسى فيليالىندا باسشى بولعان جازۋشى نەسىپبەك ءداۋتاي ۇلىنىڭ ورنىنا اقىن حاميت ەساماندى ديرەكتور ەتىپ سايلادىق. ەندى وسى استاناداعى فيليالىنىڭ جۇمىسىن اتقارىپ كەلگەن اقىن نەسىپبەك ايت ۇلىنىڭ ورنىنا ادەبيەت سالاسى بويىنشا جاقسى جوبالار جۇرگىزىپ جۇرگەن, اقىن باۋىرجان قاراعىز ۇلىن سايلاساق دەپ وتىرمىز», دەدى ۇلىقبەك ەسداۋلەت. توراعانىڭ ۇسىنىسىن جيىنعا قاتىسىپ وتىرعان قازاقستان جازۋشىلار وداعى مۇشەلەرى تولىق قولداپ ءبىر اۋىزدان داۋىس بەردى. ءسويتىپ, باۋىرجان قاراعىز ۇلى قازاقستان جازۋشىلار وداعىنىڭ استاناداعى بولىمشەسىنىڭ ديرەكتورى بولىپ سايلاندى.
جيىنعا 50-گە جۋىق قالامگەر قاتىسىپ, ءبىرازى ءوز ۇسىنىس-پىكىرلەرىن دە ورتاعا سالدى.
ۇلاربەك نۇرعالىم ۇلى,
«ەگەمەن قازاقستان»