بۇۇ قاۋىپسىزدىك كەڭەسىندەگى قازاقستاننىڭ تۇراقتى وكىلى قايرات وماروۆ كەڭەستىڭ اقش, فرانتسيا جانە ۇلىبريتانيانىڭ سيريا نىساندارىنا زىمىرانمەن سوققى جاساۋىنا وراي شۇعىل شاقىرىلعان وتىرىسىندا مالىمدەمە جاساپ, جاعدايدى ودان ارى ۋشىقتىرماۋعا شاقىردى.
«قازاقستان سيرياداعى احۋالدىڭ ۋشىعا تۇسۋىنە بايلانىستى ءوزىنىڭ بارىنشا الاڭداۋشىلىق تانىتىپ وتىرعاندىعىن بىلدىرەدى. ءبىز بارلىق تاراپتى مۇنان ارى ۋشىعا تۇسۋگە جول بەرمەۋگە جانە بۇۇ جارعىسى مەن قاۋىپسىزدىك كەڭەسىنىڭ قارارلارى نەگىزىندە ازاپ شەككەن سيرياعا سەنىم, بەيبىتشلىك جانە قاۋىپسىزدىكتى قايتارۋ ءۇشىن شارالار قابىلداۋعا شاقىرامىز. وسى زالدا شيەلەنىستەردىڭ ارتا تۇسكەندىگىن كورگەن سايىن, ءبىز بۇۇ جارعىلارىنا جانە حالىقارالىق قۇقىققا سايكەس جاۋاپكەرشىلىكپەن ارەكەت ەتۋگە شاقىرامىز», دەدى قايرات وماروۆ.
ول قازاقستان باسقا ەلدەردى دە حالىقارالىق قۇقىق پەن زاڭدى قاتاڭ ساقتاۋعا شاقىراتىنىن ايتتى. «دەگەنمەن, وكىنىشكە وراي كەشە ءبىز باسقا ۇلگىنى كوردىك. قانداي يگى ءىستى جەلەۋ ەتىپ شارا قابىلداسا دا ولار اسكەري كۇش قولدانۋدى اقتاي المايدى. وزبىرلىققا زورلىقپەن جاۋاپ بەرۋ ەش ۋاقىتتا دا بەيبىتشىلىك پەن تۇراقتىلىققا اكەلمەيدى. قازاقستان «اسكەري ءىس-قيمىل - قاۋىپسىزدىك كەڭەسى ماقۇلداعان جاعدايدا عانا قولدانىلۋى مۇمكىن سوڭعى شارا» دەگەن ۇستانىمدى قولدايدى جانە وسىلاي بولىپ قالا بەرەدى», دەپ اتاپ ءوتتى قازاقستاننىڭ تۇراقتى وكىلى.
قايرات وماروۆ سيريا ماسەلەسىن بارىنشا بايىپپەن تالقىلايتىن ۋاقىتتىڭ جەتكەنىن دە باسا ايتتى. ء«بىز اقش پەن رەسەي فەدەراتسياسىن ولاردىڭ سيريانى قولداۋ جونىندەگى حالىقارالىق توپتىڭ تەڭ توراعاسى بولىپ سانالاتىندىعىن جانە باسقا تاراپتارعا دا ىقپال ەتۋ مۇمكىنشىلىكتەرىنىڭ بار ەكەندىگىن ەسكەرە وتىرىپ, سيرياداعى جانجالدى ساياسي رەتتەۋگە قول جەتكىزۋ ءۇشىن بەلسەندى ارەكەت ەتۋگە شاقىرامىز. بۇۇ تاراپتار ءوزارا داۋلارىن رەتتەۋ ءۇشىن كەلىسسوزدەر جۇرگىزۋى ءتيىس. كەشە عانا بۇۇ باس حاتشىسى انتونيو گۋتتەريش وكىنىشكە وراي, «قىرعي قاباق سوعىستىڭ» قايتا ورالىپ كەلە جاتقانىن ەسكە سالعان ەدى. قازاقستان تاراپتاردى بۇۇ جارعىسى مەن حالىقارالىق قۇقىقتىق ساقتاۋعا شاقىرادى. ءبىز سونىمەن قاتار, جانجالدى تەك قانا بەيبىت جولمەن شەشۋگە شاقىرامىز»,دەدى ول.