شىمكەنت قالاسىنىڭ تۇرعىندارى, اسىرەسە, جاستار سەنبى كۇنى «سامال» شاتقالىنا قاراي اعىلدى. وندا «بىرگە جارقىرايمىز!» فەستيۆالى بارىسىندا 80 مىڭ جەمىس اعاشى وتىرعىزىلدى.
فەستيۆالگە قاتىسۋشىلارعا, سونداي-اق ۆيكتورينالىق سۇراقتار, جاستار ءۇشىن «ەنەرگيالىق ءتيىمدى تەحنولوگيالار الەمىندەگى ويىندار» كۆەستى, كونتسەرتتىك باعدارلامالار ۇيىمداستىرىلدى. سوڭىندا اۋقىمدى فلەشموب ءوتتى. ايتا كەتەيىك, ۇيىمداستىرۋشىسى – بۇۇ دامۋ باعدارلاماسىنىڭ قولداۋىمەن قوعامدىق ماڭىزدى بار باستامالاردى دامىتۋ قورى بولىپ تابىلاتىن فەستيۆال وتكەن ايدىڭ سوڭىندا استانا قالاسىنان باستاۋ العان بولاتىن. استانادان كەيىن ەستافەتا شىمكەنت قالاسىنا بەرىلگەن-ءدى. اتالمىش ءىس-شاراعا وقو اكىمى ج. تۇيمەباەۆ, شىمكەنت قالاسىنىڭ اكىمى ن. ساۋرانباەۆ, قازاقستانداعى بىرىككەن ۇلتتار ۇيىمىنىڭ تۇراقتى وكىلىنىڭ كەڭەسشىسى ي.گوريۋنوۆا قاتىستى.
- شىمكەنت – قازاقستاننىڭ ەڭ جاسىل قالالارىنىڭ ءبىرى. قالامىزدا ساياباقتار مەن گۇلزارلار كوپ. بۇعان قوسا وڭىرىمىزدە بىرەگەي «شاتقال» باعدارلاماسى جۇزەگە اسىرىلۋدا. ول باعدارلاما مەگاپوليسىمىزدىڭ اينالاسىندا جاسىل بەلدەۋ قالىپتاستىرۋگا مۇمكىندىك بەرەدى. ءدال قازىر ءبىز وسى باعدارلاما اياسىندا بوي كوتەرگەن قالاداعى 11 ساياباقتىڭ بىرىندە تۇرمىز.
الداعى ۋاقىتتا وسىنداي ساياباقتار دامىپ, شىمكەنت جاسىل قالا اتاۋىن ودان ءارى نىعايتا تۇسەدى دەپ سەنەمىز», – دەدى 38 گەكتار اۋماقتى الىپ جاتقان شاتقالداعى اعاش وتىرعىزۋ ءىس-شاراسىنا قاتىسقان وبلىس اكىم.
«بىرگە جارقىرايمىز!» فەستيۆالىنىڭ ەستافەتاسى اقتوبە قالاسىنا جولداندى.
ەركىن دوسىمباي,
وڭتۇستىك قازاقستان وبلىسى