رەسەيدىڭ كەمەروۆو قالاسىنداعى قايعىلى وقيعا وت پەن سۋدان قورعانۋدى ۇنەمى نازاردا ۇستاپ وتىرۋ كەرەكتىگىن ءبارىمىزدىڭ ەسىمىزگە سالدى. وسىدان ەكى جىل بۇرىن ماجىلىستەگى «اق جول» پارتياسىنىڭ فراكتسياسى ىشكى ىستەر مينيسترلىگىنە حات جازىپ, بيىك ۇيلەردەگى ءورت قاۋىپسىزدىگىن ساقتاۋ تالاپتارىنىڭ ورىندالماي جاتقانىن جەتكىزگەن ەدى.
مينيسترلىك بىزگە بەرگەن جاۋابىندا الاڭداۋشىلىعىمىزدىڭ ورىندى ەكەنىن ايتا وتىرىپ, ازاماتتىق قورعانىس ورگاندارىنىڭ تولىق تەكسەرىسكە وكىلەتتىگى جەتە بەرمەيتىندىگىن پايدالانعان كەيبىر كاسىپكەرلەر ءورت قاۋىپسىزدىگىن ساقتامايتىنىن جازعان. سىن-قاتەردى باعالاۋدىڭ جاڭا جۇيەسى ەنگىزىلگەننەن باستاپ, ءورت قاۋىپسىزدىگى مەملەكەت تاراپىنان باقىلاناتىن نىسانداردىڭ سانى 140 مىڭنان 29 مىڭعا دەيىن ءتۇسىرىلىپتى. سونىڭ ىشىندە حالىق كوپ ءجۇرىپ-تۇراتىن 110 مىڭ عيماراتتىڭ ءورت قاۋىپسىزدىگى مۇلدە تەكسەرىلمەيتىندىگى ايتىلعان.
ءبىز ۇكىمەت پەن الماتى قالاسى اكىمىنىڭ جۋىردا بارلىق ساۋدا ورتالىقتارى مەن بالالار مەكەمەلەرىنىڭ ءورت قاۋىپسىزدىگىن جوسپاردان تىس تەكسەرۋ تۋرالى بەرگەن تاپسىرماسىنا ءتانتىمىز. بۇل حالىق اراسىنداعى قوبالجۋلاردى ءبىرشاما ازايتاتىنى انىق.
سونىمەن قاتار بۇل پروبلەماعا ءۇستىرت قاراماۋ كەرەكتىگىن ەسكە سالامىز. قازىر ساۋدا ورتالىقتارى عانا ەمەس, كەز كەلگەن بيىك ۇيلەر مەن اكىمشىلىك عيماراتتاردىڭ جوعارعى قاباتىنان ءورت ءسوندىرۋ باسپالداقتارىمەن تۇسە المايسىز. ويتكەنى ولاردىڭ بارىنە ق ۇلىپ سالىنعان نەمەسە جولدا ءتۇرلى زاتتار ءۇيىلىپ قالعان. ءورت ءسوندىرۋ دابىلدارى مەن ءتۇتىن شىعاتىن مۇرجالاردىڭ دا تولىق جۇمىس ىستەيتىنىنە كۇمانىمىز بار. سوندىقتان تەكسەرىس جاپپاي جۇرگىزىلگەنى دۇرىس.
ءبىزدىڭ فراكتسيا ماسەلەنىڭ ءمانىسىن بىلمەي, الەۋمەتتىك جەلىلەردە ساۋدا ورتالىقتارىن عانا كىنالاپ, ولارعا بويكوت جاريالاۋعا شاقىرعان ۇندەۋلەرگە قارسى. ويتكەنى بۇلار عانا ەمەس 140 مىڭ عيمارات ءورت قاۋىپسىزدىگى تالابىنا تولىق جاۋاپ بەرە المايدى.
سونىمەن بىرگە ءبىز ءورت قاۋىپسىزدىگىن ساقتاۋ ورگاندارىنىڭ تەكسەرىستەرى كاسىپكەرلەردى تىعىرىققا تىرەپ, قورقىتىپ اقشا الۋعا سوقتىرماسا ەكەن دەپ الاڭدايمىز. سوندىقتان دا قازىر كەيبىر كاسىپكەرلەر عيماراتتارىنداعى ءورت قاۋىپسىزدىگى جۇيەسىن ءوز ەرىكتەرىمەن تەكسەرىپ جاتىر.
ماسەلەگە بىرجاقتى قاراماي, تولىق تالقىلايتىن بولساق, قاۋىپ قازىر ورتتەن عانا ەمەس, تاماق ونىمدەرىنەن, بالالار ويىنشىقتارىنان, ءتۇرلى ەسكى تەحنيكالار مەن ليفت شارۋاشىلىعى قىزمەتتەرىنىڭ ساپاسىزدىعىنان, ءتىپتى ستوماتولوگيالىق كابينەتتەردىڭ جاۋاپسىزدىعىنان دا بولىپ جاتىر. وسى جىلدىڭ باسىندا ۇلتتىق كاسىپكەرلەر پالاتاسى ۇكىمەتكە تاۋارلار مەن قىزمەتتەردىڭ قاۋىپسىزدىگى تالاپتارىن كۇشەيتۋگە باعىتتالعان زاڭ جوباسىن ازىرلەۋدى ۇسىنعان. ءبىز جۋىردا ۇكىمەت باسشىسى باقىتجان ساعىنتاەۆتىڭ اتىنا دەپۋتاتتىق ساۋال جولداپ, وسى زاڭ جوباسىن تەزىرەك ازىرلەۋگە شاقىردىق. سونىمەن بىرگە ونى ازىرلەۋگە ءوزىمىزدىڭ بەلسەنە قاتىسۋعا دايىن ەكەنىمىزدى جەتكىزدىك.
ازات پەرۋاشەۆ,
ءماجىلىس دەپۋتاتى